Klei Aê Diê Blŭ: II Klei Yăl Dliê 20:13-21
Êlan kliăng: “Tơdah leh ñu bi trông čhai hŏng phung ƀuôn sang, ñu mdưm phung mmuñ leh anăn mpŭ mni kơ Yêhôwa hŏng kdrăp doh jăk, êjai diñu êbat ti anăp phung kahan, leh anăn lač, “Bi mni bĕ kơ Yêhôwa, kyuadah klei Ñu khăp sĭt suôr dôk nanao hlŏng lar.” (II Klei Yăl Dliê 20:21)
Klei êmuh ksiêm mĭn: Ya klei Aê Diê lač leh hŏng phung ƀuôn sang? Si klei mtao Y‑Jôsaphat leh anăn phung ƀuôn sang bi êdah klei diñu đăo kơ Khua Yang? Si Klei Aê Diê Blŭ bi ktang Ih êjai tlă anăp hŏng klei lông dlăng?
Leh klei mtao Y‑Jôsaphat wah lač, jih jang phung ƀuôn sang dôk dơ̆ng kriêp ñăt dôk guôn klei Aê Diê wĭt lač (êlan 13). Anei jing bruă ngă klei đăo kơ Aê Diê. Leh anăn Aê Diê lač leh kơ diñu snei, “hmư̆ bĕ” (êlan 15). Ti krah klei huĭ hyưt, rŭng răng, klei yuôm hĭn jing mđing hmư̆ Klei Aê Diê Blŭ. Đăm brei ya klei boh truh amâodah klei phung riêng gah blŭ ngă kơ drei kdŭn tluôn hlăm klei đăo, ƀiădah lŏ wĭt bĕ hŏng Klei Aê Diê Blŭ leh anăn mđing hmư̆ klei Yang Mngăt Jăk lač. Leh anăn Aê Diê lŏ mtô lač kơ phung ƀuôn sang snei: “Đăm huĭ ôh, đăm êdu ai ôh”. Khua Yang pô ăt lač mơh hŏng phung ƀuôn sang, phung roh jing lu lĭn, ƀiădah đăm huĭ ôh kyuadah “Yêhôwa srăng dôk mbĭt hŏng diih” (êlan 17). Klei dleh dlan jing prŏng leh anăn năng huĭ êdi, ƀiădah êlan đru drei dôk hơĭt ênang leh anăn amâo huĭ hyưt ôh, anăn jing drei mâo Aê Diê dôk mbĭt hŏng drei. Klei năng huĭ, năng rŭng răng hĭn amâo djŏ kyua phung roh jhŏng ktang đei ôh ƀiădah năng huĭ tơdah amâo mâo Aê Diê dôk mbĭt hŏng drei (I Y‑Samuel 18:12; Rô-ma 8:31).
Hĭn kơnăn mơh, Aê Diê ăt lač hŏng mtao Y‑Jôsaphat snei, kyuadah Aê Diê dôk mbĭt hŏng diñu, snăn klei bi blah anei jing bruă Aê Diê (êlan 15). Klei yuôm hĭn brei drei bi klă tơdah tlă anăp hŏng klei dleh dlan, klei anăn jing mâo Aê Diê dôk mbĭt hŏng drei mơ̆? Leh anăn tơdah mâo, snăn drei tŭ ư mơ̆ lui Aê Diê bi blah brei kơ drei hlăm klei bi blah anei, amâodah drei čiăng bi blah hjăn drei pô?
Klei Aê Diê lŏ mtă tui tluôn jing dleh dưi đăo leh anăn jhŏng êdi, tơdah ñu lač kơ mtao Y‑Jôsaphat ba phung ƀuôn sang Yuđa nao tlă anăp hŏng phung roh lu lĭn leh anăn knŏng dôk dơ̆ng sa anôk, amâo ngă sa mta klei ôh knŏng kăp dlăng bruă Aê Diê ngă (êlan 16-17). Ƀiădah lĕ, mtao Y‑Jôsaphat leh anăn jih jang phung ƀuôn sang gưt ngă kluôm ênŭm jih klei Aê Diê mtă kyuadah diñu đăo knang kơ Aê Diê. Leh anăn yuôm bhăn êdi tơdah truh kơ mmông anei, phung kahan ka kbiă nao, klei dưi hĭn ka truh, ƀiădah jih jang mnuih kkuh mpŭ leh anăn mpŭ mni kơ Aê Diê (êlan 19). Leh anăn ti êlan nao kơ kdrăn blah, mtao Y‑Jôsaphat ăt iêô mthưr nanao brei phung ƀuôn sang đăo knang kơ Khua Yang, leh anăn phung ƀuôn sang bi kjăp klei đăo hdơ̆ng diñu hŏng klei kkuh mpŭ kơ Aê Diê (êlan 20-21). Klei đăo brei bi kjăp hŏng tlâo mta phŭn yuôm: “Đăo kơ klei khua pô hưn êlâo Aê Diê blŭ” – Klei Aê Diê Blŭ; “Bi mni bĕ kơ Yêhôwa, kyuadah klei Ñu khăp sĭt suôr dôk nanao hlŏng lar” – Kkuh mpŭ kơ Aê Diê; leh anăn “mdưm phung mmuñ leh anăn mpŭ mni kơ Yêhôwa hŏng kdrăp doh jăk, êjai diñu êbat ti anăp phung kahan” – Dôk dơ̆ng mbĭt hlăm êpul phung ƀuôn sang Aê Diê, amâo tlaih kbưi mơ̆ng phung ƀuôn sang Ñu ôh.
Si drei bi êdah klei drei đăo knang kơ Aê Diê?
Wah lač: Ơ Khua Yang, bi mni kơ Khua Yang kyua Ih dôk mbĭt hŏng kâo nanao. Brei kâo mđing hmư̆ nanao kơ Klei Aê Diê Blŭ leh anăn dưm klei đăo kâo khut khat knŏng kơ Khua Yang thâodah si klei truh dưn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Êphêsô 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
