II Xwmtxheej Vajntxwv 20:13-21
Nqe cim:
“Thaum vajntxwv hais rau lawv tas lawm, nws hais rau cov ntaus suab nkauj kom hnav cov tsho ntev uas lawv hnav rau tej lub sijhawm tseemceeb, mus ua cov tubrog ntej thiab hu nkauj hais tias, cia li qhuas tus Tswv! Nws txojkev hlub nyob mus ibtxhis!” (II Xwmtxheej Vajntxwv 20:21)
Lus nug rau sawvdaws xav:
– Vajtswv hais li cas rau cov pejxeem?
– Vajntxwv Yehausafas thiab cov peejxeem txojkev ntseeg qhia tshwm li cas?
– Vajtswv Txojlus txhawb peb lub zog li cas thaum ntsib kev sim siab?
Tom qab uas Vajntxwv Yehausafas thov Vajtswv tas, tagnrho cov pejxeem nyob ntsiag to tos Vajtswv tej lus teb (nqe 13). Qhov no yog qhia tawm kev ntseeg tus Tswv. Thiab Vajtswv hais rau lawv hais tias, “cia li mloog” (nqe 15). Thaum ntsib kev txhawj ntshai, tsis kaj siab, qhov tseemceeb yog mloog tus Tswv lus. Tsis txhob cia lub tsamthawj thiab tej neeg ib ncig hais tej lus ua rau peb poob kev ntseeg, tiamsis cia li tig los mloog Vajtswv lus thiab mloog Vaj Ntsujplig qhia. Vajtswv rov qhia rau cov pejxeem ntxiv hais tias: “tsis txhob qaug zog lossis ntshai”. Tus Tswv kuj hais rau cov pejxeem tias tej yeenbcuab coob heev, tiamsis lawv tsis txhob txhawj ntshai, vim “tus Tswv yuav nrog nraim nej.” (nqe 17). Teebmeem yeej loj thiab txaus ntshai heev tiag, tiamsis lub tswvyim pab kom peb kaj siab thiab tsis txhawj ntshai yog muaj Vajtswv nrog nraim peb. Qhov uas txaus ntshai tshaj tsis yog yeebncuab muaj zog,tiamsis yog qhov uas Vajtswv tsis nrog peb nyob lawm. (I Xamuyees 18:12; Loos 8:31).
Dua li ntawd, Vajtswv kuj hais rau Vajntxwv Yehausafas hais tias, vim qhov uas Nws nrog nraim lawv ntaus kob tsovrog no, yog li Vajtswv yog tus uas ntaus rog rau lawv (nqe 15). Qhov tseemceeb peb cheemtsum paub meej thaum ntsib teebmeem yog Vajtswv puas nrog peb nyob xwb. Thiab yog muaj, ces peb puas cia Vajtswv ntaus rog rau peb hauv kob tsovrog no lossis cia peb xwbtim ntaus peb rog?
Vajtswv lo lus samhwm ntxiv nyuaj totaub txog thiab txaus ntshai heev thaum Nws kom Vajntxwv Yehausafas coj cov pejxeem mus tua cov yeebncuab, cia li sawv twj ywm, tsis ua dabtsi nyob ntsia Vajtswv ua haujlwm (nqe 16-17). Tiamsis, Vajntxwv Yehausafas thiab cov pejxeem yeem mloog lus vim lawv ntseeg Vajtswv. Thiab xav tsis thoob thaum txog sijhawm, tsis tau tso tubrog mus ntaus rog, tsis tau muaj yeej los sawvdaws puavleej pehawm thiab qhuas Vajtswv (nqe 19). Thaum mus ntaus rog, Vajntxwv Yehausafas nqua hu kom cov pejxeem cia siab rau Vajtswv, thiab cov pejxeem ib leeg txhawb ib leeg txojkev ntseeg thaum pehawm tus Tswv (nqe 20-21). Kev ntseeg cheemtsum tau txhawb los ntawm peb yam: “cia li ntseeg tus Tswv tej lus uas cov cev Vajtswv lus qhia rau nej” – Vajtswv Txojlus; “Cia li qhuas tus Tswv! Nws txojkev hlub nyob mus ibtxhis!” – pehawm Vajtswv; “hais rau cov ntaus suab nkauj kom hnav cov tsho ntev uas lawv hnav rau tej lub sijhawm tseemceeb, mus ua cov tubrog ntej” – nrog tus Tswv haivneeg sawv ua ke, tsis khiav tawm hauv Nws haivneeg mus.
Thov Vajtswv,
Tus Tswv, ua Koj tsaug vim Koj niaj hnub nrog nraim nyuam yaus. Thov Koj pab kom nyuam yaus paub mloog Koj lus thiab ntseeg Koj txhua lub sijhawm. Nyuam yaus tuav Tswv Yexus lub npe thov, Amees.
Peb qhia tshwm yus txojkev ntseeg tus Tswv zoo li cas?
Nyeem Vajluskub hauv peb lub xyoo: Efexus 3
Kênh Youtube BHKTHN:
