Filemoos nqe 8-12
Nqe cim:
“Kuv thov koj mloog, kuv yuav hais Auneximus zaj rau koj. Nimno nws yog kuv tus tub, rau qhov thaum kuv qhia Txojmoo Zoo rau nws, nws tau los ntseeg Yexus lawm” (Filemoos nqe 10).
Lus nug rau sawvdaws xav:
- Vim licas Timthawj Paulus yog ib tug thawjcoj tiamsis nws tseem thov Filemoos?
- Timthawj Paulus thov los ntawm tej vimchiv twg?
- Peb npaj siab ua dabtsi los pab coj kev sib haumxeeb rau sawvdaws?
Timthawj Paulus ib ke yog txwjlaug, yog Timthawj thiab yog Filemoos tus phoojywg, nws muaj cai yuam kom Filemoos ua raws li Vajtswv Txojlus qhia uas yog zam txim rau tus tub qhe khiav tawm hu ua Auneximus. Nws hais tias: “Wb ob leeg puavleej yog tus uas ntseeg Yexus Khetos, yog li ntawd, kuv yeej muaj cuabkav kom koj ua raws li kuv hais” (nqe 8). Tiamsis, Timthawj Paulus tsis ua li ntawd, nws ho taij thov Filemoos ua yam zoo los ntawm kev hlub, nws thiaj hais ntxiv hais tias: “tiamsis vim txojkev hlub kuv yuav thov koj thiaj li zoo dua” (nqe 9 HMOWSV). Lo lus “thov” nyob hauv lus Kilis ces yog taij tiag tiag, ntshaw kom tau. Ntawd yog ib yam zoo heev ntawm ib tug thawjcoj. Timthawj Paulus tsis siv hwjchim, meejmom los samhwm, yuam kom Filemoos ua raws li nws siab xav, tiamsis nws ho txo hwjchim taij thov los ntawm lub homphiaj ua kom muaj kev sib haum xeeb hauv cov kwvtij ntseeg Yexus.
Timthawj Paulus thov Filemoos los ntawm tej vimchiv zoo li no: Qhov tim ib, Filemoos yog ib tug neeg uas muaj npe nrov tias “muaj kev hlub”, nws muaj peevxwm yuav zam txim rau tus tub qhe Auneximus. Qhov tim ob, Timthawj Paulus hais tias nws twb laus lawm thiab tseem raug kaw vim tus Tswv Lub Npe, thiab tus Timthawj txaus hwm no tej lus thov yuav ua rau Filemoos tsis kam yig. Qhov tim peb, nws thov vim nws tus tub Auneximus uas los ntseeg thaum nws raug kaw (nqe 10). Qhov tim plaub, vim Auneximus muaj kev hloov tshiab lawm, “yav tas los nws yog tus neeg uas tsis tsimtxiaj, tiamsis nimno nws yog tus neeg tsimtxiaj rau koj thiab rau kuv lawm” (nqe 11). Qhov tim tsib, qhov uas Auneximus khiav tawm ntawm Filemoos mus ib ntus yeej nyob hauv tus Tswv kev tswjhwm, kom tus qhev no tau ntsib Timthawj Paulus, ntseeg Tswv Yexus thiab rov qab los. Vim tej no, Filemoos yuav tsum rov txais Auneximus zoo li ib tug kwvtij nyob hauv kev ntseeg.
Timthawj Paulus tau Vajtswv siv coj kev sib haum los rau Auneximus thiab Vajtswv. Tomqab ntawd, nws taij thov ntxiv kom muaj kev sib haum xeeb rau Filemoos thiab Auneximus. Niaj hnub nimno, Vajtswv kuj siv peb txhua tus ib yam nkaus li ntawd. Txawm peb yuav nyob lub meejmom twg los xij, los ntawm kev hlub tus Tswv, cia li txo hwjchim thov kom peb tej kwvtij sib zam txim thiab rov los nyob sib haum xeeb. Los ntawm txojkev hlub, peb tsis txhob cia ib tug kwvtij lossis phoojywg tuaj cuag tus Tswv txav deb lub Tuamtsev vim ib qhov teebmeem twg, kuj txhob cia ib tug ntseeg twg txav deb Pawg Ntseeg vim kev tsis sib haum. Thov Vajtswv pub rau peb paub txo hwjchim los ua tus coj kev sib haum rau txhua tus.
Thov Vajtswv,
Tus Tswv, nyuam yaus ua Koj tsaug uas Koj tuag vim nyuam yaus tej kev txhaum kom nyuam yaus tau rov sib raug zoo nrog Koj. Thov pab kom nyuam yaus paub hlub, paub thov kom tej kwvtij sib zam txim¸sib koom siab kom Pawg Ntseeg tau txhim kho thiab huamvam. Nyuam yaus tuav Yexus Khetos lub npe thov, Amees.
Peb puas txaus siab txo hwjchim thiab thov kom sawvdaws sib zam txim?
Nyeem Vajluskub hauv peb lub xyoos: Yaxayas 60
Kênh Youtube BHKTHN:
