Klei Aê Diê Blŭ: Y-Philêmôn êlan 8-12
Êlan kliăng: “Kâo kwưh kơ ih kyua anak kâo, Y-Ônêsim, pô kâo kkiêng leh êjai arăng krư̆ kâo” (Y-Philêmôn êlan 10)
Klei êmuh ksiêm mĭn: Ya ngă hlăm bruă klam jing khua gĭt gai ƀiădah Khua ƀĭng kna Y-Pôl ăt kwưh akâo kơ Y-Philêmôn? Ya mta phŭn ñu kwưh akâo? Ya drei srăng ngă čiăng đru ba klei êđăp ênang kơ hdơ̆ng pô?
Hŏng bruă klam jing khua mduôn, jing Khua ƀĭng kna ăt jing găp Y-Philêmôn, Khua ƀĭng kna Y-Pôl lač ñu mâo klei dưi mtrŭn asăp kơ Y-Philêmôn ngă ya klei hlăm Klei Aê Diê Blŭ mtô jing pap brei kơ pô hlŭn tlĕ đuĕ Y-Ônêsim: “Kyuanăn wăt tơdah hlăm Krist kâo mâo djăp klei jhŏng mtă kơ ih ngă klei djŏ,…” (êlan 8). Ƀiădah hrô kơ ngă snăn, Khua ƀĭng kna Y-Pôl kwưh akâo kơ Y-Philêmôn ngă klei djŏ kyua klei khăp, kyua anăn ñu lŏ lač: “ƀiădah kyua klei khăp kâo čiăng kwưh kơ ih” (êlan 9). “Kwưh” hlăm klei čih anei mblang jing kwưh akâo, čang hmăng. Klă sĭt jing sa ai tiê năng mpŭ mơ̆ng pô kiă kriê hlăm klei hdĭp mngăt. Khua ƀĭng kna Y-Pôl amâo bi êdah ôh klei dưi čiăng mtrŭn asăp, mgô̆ Y-Philêmôn ngă hlue si klei pô čiăng ƀiădah ñu luă gŭ, bi ti gŭ pô kwưh akâo hŏng klei kñăm ba klei thâo bi djŏ kơ ayŏng adei hlăm Khua Yang.
Khua ƀĭng kna Y-Pôl kwưh kơ Y-Philêmôn kyua dŭm mta phŭn snei: tal sa, Y-Philêmôn mâo klei hing ang jing mnuih mâo “ai tiê khăp” kyua anăn năng ai kyua klei khăp ñu srăng pap brei kơ sa čô hlŭn msĕ si Y-Ônêsim. Tal dua, Khua ƀĭng kna Y-Pôl brei thâo ñu mduôn leh leh anăn dôk jing mnă kyua Anăn Khua Yang, leh anăn klei kwưh akâo mơ̆ng Khua ƀĭng kna năng mpŭ anei srăng ngă kơ Y-Philêmôn dleh hngah. Tal tlâo, ñu “kyua anak kâo, Y-Ônêsim, pô kâo kkiêng leh êjai arăng krư̆ kâo” (êlan 10). Tal pă, kyua mâo sa klei bi mlih prŏng hlăm pô hlŭn Y-Ônêsim, “Mphŭn dô ñu amâo jing tŭ dưn kơ ih ôh, ƀiădah ară anei sĭt nik ñu jing tŭ dưn kơ ih wăt kơ kâo” (êlan 11). Tal êma, klei Y-Ônêsim tlĕ đuĕ kơ Y-Philêmôn sa wưng jing dôk hlăm klei jăk Aê Diê čiăng, čiăng kơ pô hlŭn anei dưi bi tuôm hŏng Khua ƀĭng kna Y-Pôl, đăo kơ Khua Yang leh anăn lŏ wĭt. Mơ̆ng anăn, Y-Philêmôn dưi lŏ jum Y-Ônêsim hŏng klei jing sa čô ayŏng adei hlăm klei đăo.
Khua ƀĭng kna Y-Pôl mâo Aê Diê yua ba klei bi grăng plah wah pô jing hlŭn Y-Ônêsim hŏng Aê Diê. Leh anăn ñu lŏ dơ̆ng kwưh akâo kơ klei bi grăng plah wah Y-Philêmôn hŏng Ô-nê-sim. Hruê anei, Aê Diê ăt yua grăp čô drei msĕ snăn mơh. Wăt hlăm ya bruă ngă, ƀiădah hŏng klei khăp kơ Aê Diê, brei bi ti gŭ pô kwưh akâo ayŏng adei pô bi pap brei hdơ̆ng pô leh anăn bi mrâo klei bi mguôp kruh hĕ leh. Kyua klei khăp, đăm brei ôh sa čô ayŏng amai adei pô nao kơ Khua Yang leh anăn lŏ kbưi hŏng Sang Aê Diê kyua sa klei amâo thâo bi djŏ, ăt kăn brei mâo sa čô phung đăo đuĕ kbưi hŏng Phung Sang Aê Diê kyua klei amâo thâo bi djŏ hdơ̆ng pô. Akâo kơ Khua Yang đru grăp čô drei brei luă gŭ jing pô bi grăng kơ Aê Diê.
Drei srăng bi ti gŭ pô kwưh akâo ayŏng adei pô bi pap brei hdơ̆ng pô mơ̆?
Wah lač: Ơ Khua Yang khăp hơiêng, kâo bi mni kơ Ih djiê leh kyua klei soh kâo čiăng bi grăng klei bi mguôp kruh leh kâo hŏng Khua Yang. Akâo kơ Ih đru kâo jih ai tiê đru, kwưh akâo ayŏng amai adei bi pap brei hdơ̆ng pô, sa ai tiê čiăng kơ Phung Sang Aê Diê mâo klei mđĭ ai leh anăn đĭ kyar. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 60
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
