Klei Aê Diê Blŭ: Klei Bi Hriêng 24:10-12
Êlan kliăng: “Tơdah ih êdu ai ti hruê knap mñai, klei ktang ih điêt êdi.” (Klei Bi Hriêng 24:10)
Klei êmuh ksiêm mĭn: Si ngă Mtao Salômôn bi hriăm anak hdĭp hlăm hruê knap mñai? Ya ngă brei dŏng mtlaih, đru kơ phung tuôm hŏng klei knap mñai? Si knuih drei mâo tơdah tuôm hŏng klei dleh dlan kơ pô leh anăn kơ phung riêng gah?
Êlan tui hlue Khua Yang jing êlan jăk mơak. Ƀiădah klei jăk mơak Phung đăo mâo amâo djŏ knŏng hlăm klei êđăp ênang ôh ƀiădah wăt hlăm klei rŭng răng, knap mñai. Phung ƀuôn sang Aê Diê brei hriăm čiăng kơ amâo djŏ knŏng dôk kjăp tơdah tuôm hŏng klei knap mñai ôh, ƀiădah lŏ dưi đru kơ phung mkăn hlăm klei dleh dlan diñu tuôm.
Mtao Salômôn mtô anak brei dôk kjăp hlăm djăp boh klei kyua tơdah anak êdu ai hlăm hruê knap mñai, brei ƀuh ai ktang anak awăt êdi (êlan 10). Êdu ai tơdah tuôm hŏng klei knap mñai lač kơ êdu awăt amâo djŏ knŏng hlăm asei mlei, ai tiê ôh, ƀiădah wăt hlăm klei hdĭp mngăt. Klei knap mñai truh hlăm klei hdĭp jing sa klei lông dlăng kơ klei dưi tŭ klei dleh dlan, klei jhŏng leh anăn ai ktang anak. Brei anak đăo hlăm Klei Aê Diê Blŭ ƀuăn: “Arăng bi mtlaih mnuih kpă ênô mơ̆ng klei rŭng răng” (Klei Bi Hriêng 11:8). Êngao anăn, tuôm hŏng klei knap mñai phung mkăn, mtao mtă kơ anak “Dŏng bĕ phung arăng atăt kơ klei djiê, bi mtlaih bĕ phung nao kơ anôk arăng bi mdjiê” (êlan 11). Anak đăm ngă ngơi mang, ngă mgưt amâo thâo ôh kyua anak dưi mdăp hŏng anak mnuih ƀiădah amâo dưi mdăp ôh hŏng Aê Diê. Aê Diê srăng bi wĭt kơ grăp čô tui si bruă gơ̆ ngă leh (êlan 12).
Tơdah anak pap kơ phung dôk nao hlăm klei djiê, Aê Diê srăng pap kơ anak. Si Aê Diê pap leh leh anăn bi mtlaih leh anak, snăn ăt brei anak pap leh anăn đru kơ phung ayŏng adei pô hlăm klei knap mñai msĕ snăn mơh.
Êlâo kơ djiê ti kyâo bi kal, Khua Yang Yêsu hưn êlâo leh kơ ƀĭng kna amâo mâo ôh pô tlaih mơ̆ng klei dleh dlan, ƀiădah Ñu mđĭ ai grăp čô drei jih ai tiê đăo knang kơ ai ktang Khua Yang čiăng dưi găn jih klei knap mñai. Khua Yang lač: “Kâo lač leh klei anei kơ diih, čiăng kơ diih dưi mâo klei êđăp ênang hlăm kâo. Hlăm lăn ala diih srăng mâo klei knap mñai; ƀiădah dôk kjăp bĕ, kâo dưi leh hŏng lăn ala.” (Y-Yôhan 16:33). Klei êđăp ênang leh anăn klei jăk mơak Aê Diê ƀuăn brei kơ drei tinei jing klei êđăp ênang, jăk mơak hlăm klei knap mnai. Brei drei ăt mđing uêñ đru kơ phung tuôm hŏng klei knap mñai, diñu jing phung riêng gah dôk čiăng drei đru. Khua Yang Yêsu mblang leh klă klei anei hlăm klei yăl dliê kơ mnuih Samari jăk đru leh mnuih tuôm hŏng klei knap mñai, kriê dlăng leh anăn đru jih ai tiê, leh anăn Khua Yang lač hŏng pô mtô klei bhiăn: “Nao bĕ ih leh anăn ngă msĕ” (Y-Luk 10:25-37). Grăp čô drei brei khăp kơ Khua Yang hŏng jih ai tiê leh anăn ăt brei khăp kơ pô riêng gah. Akâo kơ Khua Yang brei drei gưt asăp Khua Yang mtô, kjăp ktang hlăm hruê knap mñai, mbĭt anăn khăp leh anăn đru kơ phung tuôm hŏng klei knap mñai.
Drei mđing uêñ đru ayŏng adei pô dôk tuôm hŏng klei knap mñai mơ̆?
Wah lač: Ơ Khua Yang, akâo kơ Ih brei kơ kâo klei đăo, klei mĭn kjăp, hơĭt ai tiê, leh anăn thiăm ai ktang kơ kâo čiăng dưi găn jih klei knap mñai. Akâo kơ Ama đru kâo thâo khăp leh anăn mđing uêñ đru kơ phung tuôm hŏng klei knap mñai. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 59
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
