Pajlug 24:10-12
Nqe cim:
“Yog koj qaug zog thaum raug kev ntxhov siab, ces yog koj siab yau heev.” (Pajlug 24:10)
Lus nug rau sawvdaws xav:
- Vajntxwv Xalumoos qhia cov menyuam yuav tsum ua neej licas thaum ntsib kev ceeblaj?
- Vim licas yuav tsum cawm thiab pab cov uas raug kev ceeblaj?
- Peb muaj tus cwjpwm licas thaum peb ntsib kev ceeblaj thiab thaum lwm tus ibncig ntsib kev ceeblaj?
Txojkev nrog tus Tswv mus yog txojkev tau koob hmoov. Tiamsis, tej koob hmoov uas tus ntseeg txais tau tsis yog tsuas tau thaum muaj lubneej tau zoo xwb, tseem txais tau thaum lubneej txomnyem, ntsib kev ceeblaj. Vajtswv cov menyuam yuav tsum kawm kom sawv ruaj thaum tus kheej ntsib kev ceeblaj, thiaj pab tau lwm tus thaum lawv ntsib kev ceeblaj.
Vajntxwv Xalumoos qhia menyuam yuav tsum muaj lub siab tawv hauv txhua yam xwm txheej, vim yog poob siab, qaug zog thaum ntsib teebmeem, ces qhia tias koj lub siab yau heev (nqe 10). Poob siab thaum ntsib teebmeem tsis yog tsuas qhia tshwm kev qaug zog ntawm cev nqaij daim tawv thiab lub siab xwb, tiamsis tseem qhia txog kev qaug zog ntawm sab ntsujplig thiab. Tej kev ceeblaj tshwmsim hauv lubneej yog ib zaj tshuaj ntsuam koj kev ua siab ntev, lub siab tawv thiab lub zog ruaj khov. Koj yuav tsum cia siab rau Vajtswv tej lus cogtseg hais tias: “Cov neeg ncaj ncees tau txais kev cawmdim” (Pajlug 11:8) Tsis tas li ntawd xwb, thaum pom lwm tus raug kev ceeblaj, vajntxwv kuj qhia kom menyuam yuav tsum “cawm cov uas raug cab mus tua kom dim, cia li pab tus uas raug cab nrhaj nrhuj nrheev mus tua kom dim” (nqe 11). Koj tsis txhob tsis quav ntsej, ua zoo li tsis paub vim koj dag tau tibneeg tiamsis dag tsis tau Vajtswv. Vajtswv yuav muab nqe zog rau txhua tus raws li tej uas lawv ua (nqe 12). Yog koj khuvleej cov uas tabtom raug kev puastsuaj, Vajtswv yuav khuvleej koj. Vajtswv twb hlub koj thiab cawm koj licas lawm, ces koj yeej yuav tsum hlub thiab pab koj cov kwvtij uas tabtom raug kev ceeblaj ib yam nkaus li ntawd thiab.
Ua ntej Tswv Yexus raug tuag saum tus ntoo khaublig, Nws twb xub qhia rau cov thwjtim lawm hais tias tsis muaj leejtwg yuav qaij dhau kev ceeblaj txomnyem, tiamsis Nws txhawb peb lub zog kom muab siab rau ntseeg thiab tso siab rau Nws peb thiaj yuav tiv dhau tej kev ceeblaj. Nws hais tias: “Kuv qhia tej no rau nej kom nej cov uas txuas rau ntawm kuv muaj kev kaj siab. Neeg ntiajteb yuav tsimtxom nej. Tiamsis nej yuav tsum ua siab tawv, rau qhov kuv twb kovyeej lub ntiajteb no lawm!” (Yauhas 16:33). Kev kaj siab thiab txoj koob hmoov uas Tswv Yexus coglus ntawm no yog kev kaj siab thiab koob hmoov thaum raug kev tsimtxom. Peb kuj yuav tsum pab cov uas tabtom ntsib kev txomnyem, lawv yog cov uas cheemtsum kev pab nyob ibncig peb. Tswv Yexus qhia meej txog qhov no hauv zaj lus pivtxwv txog tus neeg Xamalis uas tau cawm, tu, thiab pab tus txivneej uas raug tub sab ntaus kawg siab kawg ntsws; tomqab ntawd Tswv Yexus thiaj hais rau tus xibhwb qhia Vajtswv txoj Kevcai hais tias: “Koj cia li mus ua ib yam li ntawd” (Lukas 10:25-37). Peb txhua tus yuav tsum hlub Vajtswv kawg siab kawg ntsws thiab hlub lwm tus ibncig. Thov Vajtswv pab peb paub ua raws li Nws tej lus qhia, sawv ruaj khov thaum ntsib kev ceeblaj thiab paub pab cov uas tabtom raug kev ceeblaj.
Thov Vajtswv,
Vajtswv, thov Koj pub rau nyuam yaus muaj kev ntseeg, lub siab tawv, ua siab ntev, thiab pub dag zog rau nyuam yaus tiv dhau tej kev ceeblaj. Thov Koj pab nyuam yaus paub hlub thiab pab cov neeg ntsib kev ceeblaj. Nyuam yaus tuav Yexus Khetos lub npe thov, Amees.
Peb puas pab peb cov kwvtij uas tabtom ntsib kev ceeblaj lawm tau?
Nyeem Vajluskub hauv peb lub xyoos: Yaxayas 59
Kênh Youtube BHKTHN:
