Kalatias 5:1
Nqe cim:
“Nimno peb muaj kev ywjpheej, rau qhov Yexus Khetos twb tso peb cov uas ua qhev dim lawm. Yog li ntawd, nej yuav tsum muab siab rau ntseeg tsis txhob pub leejtwg coj nej rov qab mus ua qhev dua.” (Kalatias 5:1)
Lus nug rau sawvdaws xav:
- Los ntawm yam dabtsi cov ntseeg thiaj dim ntawm txoj kevcai txiav thiab tej haujlwm ntawm txoj kevcai?
- Vim licas peb ib txhia pheej rov qab mus ua qhev rau tej haujlwm zoo?
- Peb yuav ua licas thiaj sawv ruaj hauv tus Tswv?
Timthawj Paulus pib Kalatias tshooj 5 los ntawm ib lo lus hais tawv qhawv, nrog rau ib lo lus ntuas uas yog “yuav tsum” thiab “tsis txhob.” Ua ntej yuav muaj lubneej “muab siab rau ntseeg” ces peb yuav tsum xub tau Yexus Khetos tso dim ntawm kev ua qhev, nyob hauv pawg ntseeg Kalatias lub tsamthawj ces yog tso dim ntawm txoj kevcai txiav thiab Mauxes txoj kevcai. Nyob hauv Tes Haujlwm 16:1-5 sau txog qhov uas Timthawj Paulus “ua kevcai txiav” rau Timautes thaum nws xav coj Timautes nrog nws mus. Rau qhov “cov Yudais uas nyob hauv lub tebchaws ntawd puavleej paub hais tias Timautes txiv yog neeg Kilis”, yog Timautes ua kevcai txiav nws thiaj yuav ua tau Vajtswv haujlwm yoojyim hauv cov neeg Yudais, tsis yog nws ua kevcai txiav kom tau cawmdim. Qhov ntawd ua rau “cov ntseeg thiaj muaj zog heev thiab niaj hnub muaj neeg los ntseeg coob zuj zus ntxiv”. Vim li ntawd, ua kevcai txiav thiab coj raws txoj kevcai, nyob hauv peb tiam no yog kev ua haujlwm, ua raws kevcai thiab ua haujlwm zoo,… yuav txhaum yog hais tias peb saib tej ntawd ua yam pab kom tau kev cawmdim. Tus Cawmseej twb zam txim rau peb kom peb dim ntawm tej haujlwm ntawd lawm.
Txawm li ntawd los, cov uas tau txais Tus Cawmseej kev ywjpheej lawm yeej tseem muaj ob txoj kev xaiv: Txojkev xubthawj, yog “muab siab rau ntseeg” hauv txojkev ywjpheej ntawd. Tej zaum peb yuav xav hais tias: Leejtwg ho tsis xav muaj kev ywjpheej? Yog li qhov uas “muab siab rau ntseeg” tsis muaj dabtsi nyuaj li! Tiamsis cov ntseeg hauv Kalatias ho tsis muab siab ntseeg, tsis sawv ruaj. Vim li ntawd, yuav sawv ruaj hauv txojkev ywjpheej ntawd, yuav tsum muaj kev ntseeg ruaj khov rau Vajtswv tej lus, thiab muab cov xibhwb cuav tej lus qhia povtseg, lawv yog cov uas “tuaj ua rau nej ntxhov, rau qhov lawv xav hloov Yexus Khetos Txojmoo Zoo” (Kalatias 1:7).
Txojkev tim ob, yog “rov qab mus ua qhev dua”. Hu ua “qhev” lawm ces yeej tsis muaj qhov zoo, tiamsis cov ntseeg hauv Kalatias, thiab peb ib txhia, ho yoojyim raug dag rov qab “mus ua qhev dua”. Tswv Yexus xav kom peb kwv tus ntoo khaublig, tsis yog kom peb kwv tus quab “ua qhev”.
Niaj hnub nimno, feem coob peb txhua tus puavleej ntseeg hais tias peb tau cawmdim los ntawm Vajtswv txoj koob hmoov hlub. Tiamsis, tomqab uas txais yuav txojkev cawmdim lawm, peb muaj coob tug ho rov qab mus ua raws li tej kevcai zoo li ib yam pab kom yus tsis poob txojkev cawmdim! Yuav tsum ua li ub li no thiaj tsimnyog mus hauv Tuamtsev! Txhob ua yam no, yam tod nyob tsam Vajtswv rau txim poob ntuj tawg!,… Timthawj Paulus qhia hais tias: “Vaj Ntsujplig twb pub txojsia rau peb lawm; peb yuav tsum cia nws kav tagnrho peb lub neej” (Kalatias 5:25).
Thov Vajtswv,
Vajtswv, yog thaum twg nyuam yaus raug ntxias tig rov qab los ua haujlwm zoo thiab coj kevcai kom qab siab rau tus kheej txojkev cawmdim, ces thov Vaj Ntsujplig qhuab ntuas kom nyuam yaus txais tau txojkev kaj siab thiab ywjpheej hauv Koj txoj koob hmoov hlub. Nyuam yaus tuav Yexus Khetos lub npe thov, Amees.
Peb tabtom ua neej raws txojkev xaiv twg?
Nyeem Vajluskub hauv peb lub xyoos: Yaxayas 53
Kênh Youtube BHKTHN:
