Tơdrong Pơđơ̆k 24:5-9
“’Blŏk băt bĕ kơ Kră Yang lăm rim trong ih pơm, Na sư gô pơm kơ trong ih tơpăt. ‘Nĕ lăng gơh hơgei kiơ̆ kơ măt kơdih, Mă-lei hli yom bĕ kơ Kră Yang, weh bĕ đơ̆ng trong kơnê̆.” (Tơdrong Pơđơ̆k 3:6-7)
Nơ̆r jet tơchĕng pơwao:
– Tơdrong gơh hơgei thoi yơ lăm tơdrong tơblah?
– Hŏk pơhrăm păng chă tơdrong gơh hơgei đơ̆ng yơ?
– Pơm thoi yơ bơ̆n kĕ jei lăm tơdrong tơblah gah bơhngol?
Arih gơh hơgei kiơ̆ tơdrong Kră Yang bơtho gô đei tơdrong ư-ang (Tơdrong Pơđơ̆k 3:35), đei tơdrong pơklaih, dŏng tơgŭm đơ̆ng Kră Yang (Tơdrong Pơđơ̆k 12:18). Păng lăm nơ̆r ‘Bok Kei-Dei lăm năr ‘nâu pơma hơđăl kơ tơdrong gơh hơgei gô đei tơdrong pran wă kĕ jei.
Gơh hơgei gĭt hloh kơ jơhngơ̆m pran. Gơh hơgei gô đei jơhngơ̆m pran păng đei đon hlôh wao wă năm tơblah gơh jei. Tơdrong tơblah ‘nguaih kơ kiơ̆ kơ bơngai lơ dah tŏ sĕt, jơhngơ̆m pran đơ̆ng lu linh, aseh lơ dah tŏ sĕt, kư̆m oei kăl kơ đei đon hlôh wao. Bơngai pơgơ̆r linh hơgei hŏk iŏk tơdrong hơgei đơ̆ng khul linh, jơ̆ lu bơngai khul tơpôl bơtho tơ’bôh ăn wă kơ kĕ jei. Nơ̆r “’bơ̆t ‘măng jang” pơma kơ lu anih sek tơlang, anih lu bơngai pơgơ̆r pơđâu hơdai, pơđâu hơmet lu tơdrong gĭt kăl, kơlih kơ thoi ei anih ‘nâu gô đei lơ nơ̆r pơma pơđâu, lăm noh đei lu nơ̆r gơh hơgei păng kư̆m đei lu nơ̆r kơtul kơhlôh. Nơ̆r đơ̆ng lu bơngai kơtul kơhlôh mă đei pơma tơlĕch ră lu bơngai pơgơ̆r kư̆m ưh kơ đei hiơ̆k păng pơm kiơ̆ ôh.
‘Bơ̆t ‘măng jang noh kư̆m anih lu bơngai kră wei lăng sek tơlang kon pơlei, lu bơngai kơnê̆, pơm yoch kư̆m kăl kơ bơtho pơjĭ (Bơtho Khôi juăt 21:19). Bơngai arih gơh hơgei ling lang pơm tơ’bôh tơdrong arih ‘lơ̆ng tơpăt, tơdrong ‘lơ̆ng rơgoh ‘nâu tơdrong kăl kơ bơwei lăm khul linh. Lu bơngai tơchĕng wă pơm tơdrong kơnê̆, hơlĕnh pơdăr, bơngai đei tơchĕng ưh kơ ‘lơ̆ng, pơrŏ pơang gô tơlĕch đơ̆ng lăm khul linh, pơm thoi noh na lăm khul linh gơh pran păng kĕ jei lăm tơdrong tơblah.
Dang ei, rim ‘nu Bơngai Lui bơih khul linh tơblah gah ‘long pơglang, bơ̆n athei tơblah hăm yang kơnê̆ rim năr, wă kơ gơh kĕ jei đơ̆ng tơdrong tơblah gah bơhngol ‘nâu kăl kơ bơ̆n băt arih gơh hơgei, mălei ưh kơ đei arih gơh hơgei kiơ̆ kơdih na athei chă tơdrong hơgei đơ̆ng ‘Bok Kei-Dei. Nơ̆r Kră Yang khan: ““’Blŏk băt bĕ kơ Kră Yang lăm rim trong ih pơm, Na sư gô pơm kơ trong ih tơpăt. ‘Nĕ lăng gơh hơgei kiơ̆ kơ măt kơdih, Mă-lei hli yom bĕ kơ Kră Yang, weh bĕ đơ̆ng trong kơnê̆.” (Tơdrong pơđơ̆k 3:6-7). Rim ‘nu kơ bơ̆n athei tơnăp păng adrin đŏk, pơhrăm nơ̆r ‘Bok Kei-Dei rim năr, krao khan tơ’bưh hăm Kră Yang wă chă tơdrong chông tơ’bôh, bơtho đơ̆ng Kră Yang kiơ̆ trong wă năm, tơdrong kơnê̆ weh wer. Athei tơbral păng hŭt đĭ dôm tơdrong tơchĕng kơnê̆, dôm tơdrong pơm yoch, păng hŏk pơhrăm pơm kiơ̆ tơdrong ‘mêm mơnat, tơdrong tơpăt Kră Yang. Bơ̆n ưh kơ đei pơsĕl kơplah bơ̆n tơblah, mălei jum dăr kơ bơ̆n ling lang đei lu bơngai wơ̆ ‘lŏ kơjăp gah bơhngol hơdai tơgŭm. Păng hloh kơ ‘noh, Yang Bơhngol ‘Lơ̆ng oei hơdai rim ‘nu kơ bơ̆n lăm tơdrong tơblah ‘nâu. Apinh Kră Yang tơgŭm kơ bơ̆n arih gơh hơgei lăm Kră Yang.
Kơkuh kơ Kră Yang, inh bơnê kơ Ih đei ăn Yang Bơhngol ‘Lơ̆ng bơtho tơ’bôh, bơtho inh kiơ̆ trong Ih. Apinh Kră Yang ăn kơ inh đĭ jơhngơ̆m chơ chă, hŏk iŏk tơdrong gơh hơgei păng weh đơ̆ng tơdrong yoch. Krao khan yua anăn Kră Yang Yêsu Krist, Amen.
Tơdrong kiơ bơ̆n kăl kơ tơplih wă kơ wơ̆ tŏk lăm tơdrong arih gơh hơgei lăm Kră Yang?
Đŏk Sơ̆p Hla bơar Đọc Kinh Thánh trong ba năm: Êsai 52
Kênh Youtube BHKTHN:
