Klei Aê Diê Blŭ: Y-Yakơ 4:13-16
Êlan kliăng: “Djŏ hĭn diih lač, “Tơdah Khua Yang čiăng, hmei srăng dôk hdĭp leh anăn hmei srăng ngă snei snăn” (Y-Yakơ 4:15)
Klei êmuh ksiêm mĭn: Si phung blei mnia mkra hdră kơ êdei anăp? Ya ngă klei anei dưi jing sa klei soh hlăm klei hdĭp lĕ? Si phung đăo srăng ngă tơdah mĭn kơ klei hdĭp êdei anăp?
Găn lu ênuk, phung Yuđa mâo klei hing ang knhâo snăk hlăm klei blei mnia. Ti krah phung đăo mơ̆ng phung pluh dua găp djuê bra đuĕ kyua klei arăng ngă jhat ăt mâo lu phung blei mnia mơh. Phung anei mĭn kơ klei hdĭp êdei anăp leh anăn mkra hdră: “Hruê anei amâodah mgi hmei srăng nao kơ sa boh ƀuôn, dôk tinăn sa thŭn, mnia leh anăn ƀơ̆ng đĭ lu” (êlan 13). Amâo mâo soh ôh tơdah mkra hdră kơ klei hdĭp êdei anăp. Amâo mâo ôh sa čô mnuih thâo mĭn leh anăn thâo răng amâo mkra hdră êlâo. Khua Yang Yêsu ăt bi êdah leh mơh boh yuôm kơ bruă ngă anei. “Kyuadah hlei pô hlăm phung diih tơdah ñu čiăng ngă sang tum, amâo dôk gŭ êlâo čiăng tĭng ênoh thâodah ñu mâo djăp dưi bi leh sang tum anăn?” (Y-Luk 14:28).
Klei mkra hdră kơ êdei anăp jing yuôm, ƀiădah klei anei dưi jing sa klei soh hlăm klei hdĭp. Anăn jing tơdah drei yap drei pô jing mnuih dưi gai jih klei hdĭp drei pô leh anăn lui hĕ Aê Diê, ƀiădah bi kơ mgi: “amâo thâo ôh ya srăng truh mgi, ya klei hdĭp diih jing?” (Y-Yakơ 4:14). Anăn jing tơdah drei bi mni kơ drei pô hlăm klei mĭn mgao, lač jih jang klei dưi amâodah hơăi hlăm bruă jing tui si klei thâo mĭn drei pô sơăi (êlan 16). Anăn jing tơdah yap lăn ala anei jing anôk drei dôk hlŏng lar êjai klei hdĭp drei “jing msĕ si êa hŭl bi êdah bhiâo leh anăn luč hĕ mliêt” (êlan 14).
Snăn yơh, klei čiăng lač jing amâo djŏ ôh “dưi mơ̆ mkra hdră êlâo amâodah hơăi” ƀiădah “si ngă srăng mkra hdră?” Jing phung đăo, brei drei mkra hdră hŏng klei luă gŭ, knang kơ Khua Yang hlăm djăp mta bruă, hŏng klei mĭn brei klei Aê Diê čiăng jing phŭn kơ jih jang hdră, hdră kơ klei hdĭp drei, “Tơdah Khua Yang čiăng, hmei srăng dôk hdĭp leh anăn hmei srăng ngă snei snăn.” (êlan 15). Hŏng klei mĭn anăn, êlâo hĭn brei drei duah si klei Khua Yang čiăng kơ bruă drei čiăng ngă, ksiêm dlăng ya jing klei bi mơak kơ Khua Yang leh anăn ngă. Ti tluôn anăn, mĭn hĕ bi nik kơ klei hdĭp mâo kdriêl anei čiăng drei dưi mkra hdră bi klă, guôp hŏng klei dưi drei pô, leh anăn amâo lŏ hƀlŏk ôh kơ ya klei êgao leh, kăn rŭng răng đei kơ klei hdĭp êdei anăp rei. Knhal tuč, knang bĕ kơ Khua Yang leh anăn ngă jih hdră drei mkra leh hŏng klei mĭn: “Ya mta bruă diih ngă, ngă bĕ hŏng jih ai tiê, msĕ si mă bruă kơ Khua Yang, amâo djŏ kơ mnuih ôh” (Kôlôs 3:23).
Si ngă drei mkra hdră kơ klei hdĭp êdei anăp tui si klei Khua Yang čiăng hĕ amâodah tui si êlan mkăn?
Wah lač: Ơ Khua Yang, pap brei kơ kâo đa kyuadah mâo lu blư̆ kâo hdĭp msĕ si kâo dưi čuăn mă kơ klei hdĭp êdei anăp kâo! Hruê anei, kâo hriê ti anăp Ih Khua Yang, akâo Ih kiă kriê leh anăn atăt gai klei hdĭp kâo. Brei klei kâo čiăng leh anăn hdră kâo mkra djŏ tui si klei Ih čiăng jăk, čiăng kơ klei hdĭp kâo mâo boh tŭ dưn kơ Ƀuôn ala mtao hlŏng lar Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êsai 49
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
