Yakaunpaus 4:13-16
Nqe cim:
“Tsimnyog nej yuav tsum hais tias, yog haum Vajtswv siab, peb yuav ua yam ub yam no.” (Yakaunpaus 4:15)
Lus nug rau sawvdaws xav:
– Cov neeg ua lag luam teeb kev ua haujlwm rau tom ntej zoo li cas?
– Vim li cas qhov no dhau los ua ib qhov kev txhaum rau kev ua neej?
– Cov ntseeg Yexus cheemtsum ua dabtsi thaum xav txog lub neej tom ntej?
Cov neeg Yudais ntau tiam dhau los lawv paub txog txojkev ua lag luam no zoo heev. Cov ntseeg Yexus hauv kaum ob xeem neeg Yixalayees uas khiav ri sua mus nyob rau txhua qhov kuj muaj cov neeg npluanuj ua lag luam. Cov neeg no xav txog lub neej tom ntej thiab teeb sijhawm: “Hnub no lossis tagkis, peb yuav mus rau lwm lub nroog. Peb yuav mus nyob hauv lub nroog ntawd ib xyoos ua lag ua luam kom tau nyiaj ntau ntau.” (nqe 13). Tsis muaj qhov txhaum thaum teeb haujlwm ua rau tom ntej. Cov neeg txawj ntse thiab paub feem xyuam lawv yeej teeb haujlwm ua ntej mam ua. Tswv Yexus kiag los kuj hais txog qhov tseemceeb ntawm tes haujlwm: “Nej cov yog muaj ib tug yuav ua ib lub chaw tsomfaj, tus ntawd yuav tsum xub zaum ua tib zoo xav saib yuav siv nyiaj npaum li cas, thiab nws puas yuav muaj nyiaj txaus ua tau.” (Lukas 14:28).
Qhov uas teeb haujlwm rau tom ntej yog qhov cheemtsum, tiamsis qhov ntawd muaj peevxwm yuav dhau los ua kev txhaum rau yus lub neej. Uas yog peb muab yus saib zoo li tus neeg tswj kav yus lub neej thiab muab Vajtswv tso tseg, tiamsis ho “tsis paub hais tias xyov tagkis nej txojsia yuav zoo li cas” (Yakaunpaus 4:14). Ua li ntawd yog peb khav txog yus lub peevxwm, xwbtim hais tias tej uas kuv ua tau lossis tsis tau yog kuv tus kheej npaj xwb (nqe 16). Ua li ntawd yog peb saib yus lub neej zoo li qhov chaw nyob mus ibtxhis, tiamsis qhov tseeb peb tsuas nyob ib vuag xwb, “zoo li tej huab uas nyob ib pliag xwb ces twb yaj tas lawm.” (nqe 14).
Yog li ntawd, qhov teebmeem tsis yog “teeb haujlwm lossis tsis teeb?” tiamsis yog “tsimnyog teeb haujlwm zoo li cas?” Yog ib tug ntseeg Yexus, peb cheemtsum teeb haujlwm ua los ntawm lub siab txo hwjchim, cia siab rau tus Tswv thaum ua txhua yam, yuav tsum xav tias ua raws li Vajtswv lub siab nyiam yog qhov tseemceeb thaum teeb txhua yam haujlwm rau lub neej, “yog haum Vajtswv siab, peb yuav ua yam ub yam no.” (nqe 15). Thaum muaj txojkev xav li no, qhov ua ntej hlo peb yuav nrhiav kev ua kom haum Vajtswv siab thaum ua tej haujlwm peb xav ua, xaiv tau yam uas raws li Vajtswv nyiam ua. Txuas ntxiv, yuav tsum paub yus lub neej muaj nrim, komxwv yus teeb tau haujlwm meej, haum yus lub peevxwm, yus thiaj tsis khuvxim yav tas thiab txhawj rau lub neej tom ntej. Qhov kawg, cia li vamkhom Vajtswv thaum ua tej uas yus teeb tau cia, muaj lub siab xav“Txhua yam uas nej ua, nej yuav tsum rau siab ntso ua ib yam li nej ua rau Vajtswv, tsis yog nej ua rau neeg.” (Kaulauxais 3:23).
Thov Vajtswv,
Vajtswv, thov Koj zam txim vim muaj ntau zaus nyuam yaus cia li xwbtim txiav txim siab ua rau nyuam yaus lub neej tom ntej! Hnub no, nyuam yaus nyob ntawm Koj lub xubntiag, thov Koj kav thiab coj qhia nyuam yaus kev ua neej kom haum Koj siab nyiam, nyuam yaus lub neej thiaj tawg paj txi txiv pub rau Koj. Nyuam yaus tuav Tswv Yexus lub npe thov, Amees.
Peb puas teeb haujlwm rau yus lub neej ua tom ntej raws li Vajtswv lub siab nyiam lossis tsis raws? Peb tabtom nrog tus Tswv mus zoo li cas?
Nyeem Vajluskub hauv peb lub xyoo: Yaxayas 49
Kênh Youtube BHKTHN:
