Klei Aê Diê Blŭ: II Klei Yăl Dliê 31:2-5
Êlan kliăng: “Bi kâo leh anăn phung hlăm sang kâo, hmei srăng mă bruă kơ Yêhôwa” (Y-Yôsuê 24:15)
Klei êmuh ksiêm mĭn: Ya klei Mtao Hêsêkia lŏ bi mbha? Mtao mă dŏ ñu pô ya pioh ngă leh anăn ya klei ñu mtă brei phung ƀuôn sang ngă? Ya drei srăng ngă kơ gŏ sang drei čiăng jih jang phung hlăm sang khăp kơ klei kkuh mpŭ kơ Khua Yang grăp hruê?
Ruê̆ Knăm Klei Găn leh anăn Knăm Ƀơ̆ng Kpŭng Amâo Mâo Kpei, Mtao Hêsêkia lŏ bi mbha lu êpul phung khua ngă yang leh anăn phung Lêwi. Ñu mbha digơ̆ jing dua pluh pă êpul kăp bi kmlah gak tui si klei bi mbha mâo leh mơ̆ng ênuk Mtao Đawit (I Klei Yăl Dliê 24:1-31). Ñu čiăng tơdah leh phung ƀuôn sang bi hdơr leh kơ hruê knăm hŏng klei mpŭ snăk snăn klei kkuh mpŭ kơ Aê Diê hlăm Sang kkuh mpŭ ăt srăng ngă nanao grăp hruê, grăp hruê kăm, grăp mlan leh anăn grăp thŭn djŏ tui si klei Aê Diê mtă leh. Phung khua ngă yang srăng ngă bruă myơr mnơ̆ng myơr čuh leh anăn mnơ̆ng myơr kơ klei êđăp ênang. Phung Lêwi đru phung khua ngă yang, bi mni leh anăn mmuñ hơêč hmưi kơ Aê Diê.
Mtao Hêsêkia myơr mơh dŏ ñu pô pioh kơ mnơ̆ng myơr čuh grăp hruê, hlăm anăn mâo mnơ̆ng myơr čuh kơ aguah leh anăn tlam, mnơ̆ng myơr čuh grăp hruê kăm jing mnơ̆ng myơr čuh kơ hruê Saƀat, mnơ̆ng myơr čuh grăp mlan jing mnơ̆ng myơr čuh kơ hruê mlan mrâo ƀlĕ, leh anăn mnơ̆ng myơr čuh grăp thŭn jing mnơ̆ng myơr čuh kơ hruê knăm bi kčah leh. Klei bhiăn Aê Diê bi kčah leh brei hdơr mpŭ kơ hruê knăm anei ƀiădah amâo mgô̆ mtao srăng thiê brei mnơ̆ng pioh kơ mnơ̆ng myơr čuh ôh (Bruă Lêwi 23; Klei Yap 28-29). Mơ̆ng klei ngă anăn brei ƀuh Mtao Hêsêkia myơr hŏng ai tiê kmah. Ñu lŏ mtă mơh kơ phung ƀuôn sang brei myơr kdrêč djŏ kơ phung khua ngă yang leh anăn phung Lêwi, čiăng kơ digơ̆ dưi jao kluôm digơ̆ pô kơ bruă Aê Diê. Tơdah leh arăng hưn klei mtă anăn, phung ƀuôn sang myơr mtam hŏng klei êbeh dlai boh hlâo hlang mơ̆ng mnơ̆ng digơ̆ buh pla leh anăn dŏ sa kdrêč hlăm pluh mơ̆ng djăp mta mnơ̆ng digơ̆ mâo.
Amâo djŏ Mtao Hêsêkia knŏng lŏ mkŏ mjing klei kkuh mpŭ hlăm Sang kkuh mpŭ djŏ pruê̆ êlan čiăng kơ phung ƀuôn sang dưi kkuh mpŭ kơ Aê Diê ôh, ƀiădah wăt ñu ngă klei bi hmô mơh hlăm klei myơr mnơ̆ng kơ klei kkuh mpŭ, leh anăn phung ƀuôn sang tui ngă hŏng klei jăk mơh. Brei grăp čô drei thâo uêñ mơh kơ klei hdĭp myang phung găp djuê drei čiăng kơ digơ̆ mâo klei hdĭp kkuh mpŭ kơ Khua Yang grăp hruê, grăp mlan, grăp thŭn. Čiăng snăk grăp boh gŏ sang mâo klei bi kƀĭn gŏ sang čiăng kơ jih jang mnuih hlăm gŏ sang dôk gŭ mbĭt hriăm Klei Aê Diê Blŭ leh anăn wah lač. Brei phung jing amĭ, jing ama bi hmô leh anăn bi hriăm phung anak čô sĭt suôr hlăm klei wah lač, dlăng Klei Aê Diê Blŭ grăp hruê, hlăm klei bi kƀĭn grăp hruê kăm. Brei phung anak čô hlăm gŏ sang ngă bi jăk klei amĭ ama bi hriăm hŏng klei sĭt suôr hlăm klei bi kƀĭn kkuh mpŭ hlăm gŏ sang, wăt hlăm klei pioh mmông wah lač hjăn leh anăn hlăm klei bi kƀĭn kkuh mpŭ kơ Aê Diê. Mtao Hêsêkia thâo knŏng hŏng klei kkuh mpŭ kơ Aê Diê grăp hruê yơh phung ƀuôn sang mâo klei Aê Diê pap brei kơ klei soh, dôk mbĭt leh anăn brei klei jăk jĭn. Tơdah drei ngă msĕ si klei Mtao Hêsêkia bi hmô leh, sĭt nik drei srăng đru gŏ sang drei mâo klei jăk jĭn mơh.
Drei ngă leh mơ̆ klei kkuh mpŭ hlăm gŏ sang? Drei sĭt suôr mơ̆ hlăm klei pioh mmông wah lač leh anăn hriăm Klei Aê Diê Blŭ grăp hruê?
Wah lač: Ơ Khua Yang, đru kâo dlăng yuôm kơ klei bi kƀĭn kkuh mpŭ hlăm gŏ sang wăt kơ klei dlăng Klei Ih Blŭ leh anăn wah lač grăp hruê, čiăng kâo dưi bi tuôm hŏng Ih leh anăn mă tŭ klei Ih bi hriăm grăp hruê. Đru kâo atăt gŏ sang kâo sĭt suôr kkuh mpŭ kơ Ih grăp hruê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êsai 43
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
