II Xwmtxheej Vajntxwv 31:2-5
Nqe cim:
“kuv thiab kuv tsevneeg, peb yuav pehawm tus Tswv tib leeg xwb.” (Yausuas 24:15).
Lus nug rau sawvdaws xav:
– Vajntxwv Hexekiyas rov txhim tsa yam dabtsi?
– Vajntxwv muab nws tej khoom los ua dabtsi thiab qhia rau cov pejxeem yam dabtsi?
– Peb yuav tau ua dabtsi rau tsevneeg kom tagnrho tsevneeg muaj lub siab pehawm Vajtswv txhua hnub?
Tomqab uas ua Kevcai Hla Dhau thiab Kevcai noj Ncuav tsis xyaw Keeb tas, Vajntxwv Hexekiyas txhim tsa cov povthawj thiab cov neeg Levis. Lawv tau muab faib ua nees nkaum plaub pab lossis faib ua haujlwm ib yam li Vajntxwv Daviv tau faib (I Xwmtxheej Vajntxwv 24:1-31). Vajntxwv xav kom thaum uas cov pejxeem koom ua kevcai pehawm tas, los lawv tseem ua tej haujlwm nyob hauv Tuamtsev txhua hnub, txhua lub limtiam, txhua hli, txhua xyoo raws li Vajtswv tau hais tseg. Cov povthawj muaj feem xyuam hlawv khoom fij thiab ua tej kevcai sib raug zoo; cov neeg Levis pab cov povthawj ua tej haujlwm hauv lub Tuamtsev, ua Vajtswv tsaug thiab hu nkauj qhuas Nws.
Vajntxwv Hexekiyas kuj pab nyiaj txiag los ntawm qhov uas nws muab nws tej khoom los ua tej khoom hlawv fij txhua hnub, siv ua khoom hlawv fij sawv ntxov thiab tsaus ntuj, txhua lub limtiam uas yog tej khoom hlawv fij rau hnub Xanpataus, tej khoom hlawv fij txhua lub hlis hnub xiab ib, thiab tej khoom hlawv fij txhua xyoo thaum sawvdaws tuaj ua kevcai. Vajtswv txoj kevcai qhia kom yuav tsum ua cov kevcai no tiamsis tsis hais kom vajntxwv yuav tsum muaj tej khoom ntawd ua khoom fij (Levis Kevcai 23; Teev Npe 28-29). Dhau qhov no, ua rau peb pom Vajntxwv Hexekiyas muaj lub siab dav fo fij khoom. Vajntxwv kuj nqua hu tej pejxeem koom tes fij khoom rau cov povthawj thiab cov Levis kom lawv rau siab ntso ua tau Vajtswv tes haujlwm. Thaum tej lus samhwm tshaj tawm, cov pejxeem muab lawv tej thawj qoobloo thiaj tej ib feem kaum ntawm txhua yam coj tuaj fij.
Vajntxwv Hexekiyas tsis yog txhim tsa kev pehawm Vajtswv hauv lub Tuamtsev kom muaj hauvpaus hauvntsis rau cov pejxeem pehawm xwb, nws tseem ua qauv ua tes haujlwm pab txojkev pehawm, thiab tej pejxeem kuj rau siab ntso koom tes pab. Peb txhua tus kuj yuav tsum muaj lub siab txhawb txog peb tej txheebze lub neej sab ntsujplig, kom lawv kuj ua lub neej pehawm Vajtswv txhua hnub, txhua hli, txhua xyoo. Txhua lub tsevneeg cheemtsum muaj sijhawm los thov Vajtswv kom txhua tus muaj sijhawm los thov Vajtswv thiab kawm Vajtswv Txojlus ua ke. Tus thawj hauv tsevneeg yuav tsum ua qauv thiab hais kom tej menyuam rau siab thov Vajtswv, nyeem Vajtswv Txojlus txhua hnub, koom kev pehawm txhua lub limtiam. Cov uas nyob hauv tsevneeg muaj feem xyuam yuav tsum rau siab ntso koom nrog tsevneeg thov Vajtswv thiab pehawm Vajtswv. Vajntxwv Hexekiyas paub hais tias lub tswvyim zoo uas cov pejxeem yuav tau zam txim, tau tus Tswv nyob nrog thiab tau koob hmoov yog pehawm Vajtswv txhua hnub xwb. Thaum ua raws li Vajntxwv Hexekiyas tus qauv peb yuav ua rau tsevneeg tau koob hmoov.
Thov Vajtswv,
Vajtswv, thov Koj qhia kom nyuam yaus paub saib lub sijhawm tsevneeg thov Vajtswv, nyeem Vajtswv Txojlus txhua hnub tseemceeb, ua li ntawd thiaj nrog tau Koj sib raug zoo thiab tau Koj qhia txhua hnub. Thov Koj coj qhia nyuam yaus tsevneeg kom ncaj ncees pehawm txhua hnub. Nyuam yaus tuav Tswv Yexus lub npe thov, Amees.
Peb puas tau npaj muaj kev thov Vajtswv hauv tsevneeg? Peb puas ncaj ncees thov Vajtswv txhua hnub?
Nyeem Vajluskub hauv peb lub xyoo: Yaxayas 43
Kênh Youtube BHKTHN:
