Klei Aê Diê Blŭ: Y-Tit 3:3-7
Êlan kliăng: “Ƀiădah tơdah klei jăk leh anăn klei khăp Aê Diê, Pô Bi Mtlaih drei, bi êdah leh” (Y-Tit 3:4)
Klei êmuh ksiêm mĭn: Mơ̆ng ya klei anak mnuih luč leh mâo klei bi mtlaih? Si Aê Diê Tlâo Čô Yang ngă leh hdră bi mtlaih anak mnuih? Mâo leh klei bi mtlaih kyua klei pap Aê Diê, si brei drei hdĭp?
Êlan 3 leh anăn êlan 4 lač kơ dua klei mdê mơ̆ng anak mnuih. Boh blŭ “ƀiădah” mphŭn êlan 4 brei ƀuh klei bi mlih mơ̆ng klei luč leh hruê êlâo jing mâo klei khăp leh anăn klei bi mtlaih hruê anei (êlan 3-4) kyua klei khăp Aê Diê hŏng anak mnuih, amâo djŏ kyua mơ̆ng ya bruă ngă jăk ôh.
Trăn Klei Aê Diê Blŭ anei brei ƀuh Aê Diê Tlâo Čô Yang hlăm klei bi mtlaih anak mnuih. Klei pap Aê Diê Ama brei Yang Mngăt Jăk bi doh klei soh, lŏ bi kkiêng mrâo leh anăn mlih mrâo kyua klei Khua Yang Yêsu săn asei djiê hrô klei soh anak mnuih ti kyâo bi kal. Snăn, drei kyua klei Aê Diê pap anăn dưi yap kpă ênô, dưi jing anak Ñu leh anăn mâo klei čang hmăng kơ klei hdĭp hlŏng lar (êlan 4-7). Anak mnuih soh jhat amâo dưi bi hriăm kpĭ mjuăt pô ôh, ngă klei jăk ñĕ kơ klei jhat… čiăng mâo klei bi mtlaih ƀiădah kyua klei pap hlăm klei đăo. Khua ƀĭng kna Y-Pôl mtô leh: “Ƀiădah Aê Diê, Pô mdrŏng hŏng klei pap, kyua klei Ñu khăp kơ drei prŏng snăk, wăt tơdah drei djiê leh hlăm klei soh drei dưn, Ñu lŏ bi hdĭp drei leh mbĭt hŏng Krist (hŏng klei pap yơh diih tlaih leh). Ñu bi kbiă lŏ hdĭp drei leh mbĭt hŏng Krist Yêsu, leh anăn Ñu brei drei dôk gŭ mbĭt hŏng Gơ̆ ti jih anôk hlăm adiê” (Êphêsô 2:4-6).
Mơ̆ng sa čô mnuih “mluk, amâo thâo gưt asăp ôh, klah đuĕ leh, jing hlŭn kơ djăp mta klei kđeh tluh leh anăn klei kđeh čiăng, drei hdĭp hlăm klei jhat ƀai leh anăn hlăm klei tluh, arăng bi êmut kơ drei leh anăn drei bi êmut hdơ̆ng drei” (êlan 3), jing phung đăo kơ Aê Diê, mâo Yang Mngăt Jăk brei klei hdĭp mrâo, leh anăn Ñu lŏ dơ̆ng mlih mrâo drei čiăng grăp hruê ƀrư̆ msĕ Khua Yang hĭn. Snăn, bruă drei ngă leh đăo kơ Khua Yang Yêsu jing pŏk ai tiê čiăng kơ Yang Mngăt Jăk kiă kriê hlăm klei hdĭp. Tơdah drei đup gưt kơ Yang Mngăt Jăk, Ñu srăng lŏ dơ̆ng brei ai ktang mrâo leh anăn đru čiăng kơ drei jing mrâo grăp hruê. Brei bi êdah ai tiê hdơr knga kơ Aê Diê hŏng klei mpŭ kơhưm yuôm bhăn jing anak Aê Diê, brei jih ai tiê sĭt suôr tui hlue Khua Yang wăt tơdah hlăm klei jăk amâodah klei rŭng răng, kjăp ai tiê hdĭp hlăm klei čang hmăng Khua Yang Yêsu srăng lŏ hriê drông drei wĭt hlăm klei hdĭp hlŏng lar hŏng Ñu hlăm ƀuôn ala mtao jăk mơak. Srăng mâo mmông drei tŭ klei mplư, klei lông dlăng, amâodah êbuh hlăm êlan tui hlue Khua Yang, brei drei kgŭ, knang kơ Yang Mngăt Jăk čiăng lŏ dơ̆ng hrăm mbĭt êbat hŏng Khua Yang grăp hruê.
Si drei čuăn hlăm ai tiê hdĭp năng hŏng klei Aê Diê bi mtlaih?
Wah lač: Hơêč hmưi bi mni kơ Aê Diê jing Pô brei leh klei bi mtlaih kơ anak mnuih, hlăm anăn mâo kâo pô. Akâo kơ Yang Mngăt Jăk thiăm ai ktang mrâo kơ kâo lŏ dơ̆ng kjăp knhuang êbat tui hlue Khua Yang truh knhal tuč. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Bruă Mtao 21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
