Loos 12:9-21
Nqe cim:
“Yuav tsum muaj lub siab ncaj ncees hlub tiag tiag; ntxub txojkev ua phem ua qias, thiab muab siab npuab qhov uas ua zoo” (Loos 12:9)
Lus nug rau sawvdaws xav:
– Tej yam twg ua ntxhov rau cov ntseeg Yexus lub neej tshiab?
– Timthawj Paulus hais txog lub neej sib hlub qhia tawm tes haujlwm zoo li cas?
– Peb cheemtsum ua li cas kom ua tau lub neej tshiab sib hlub hauv tus Tswv?
Timthawj Paulus hais txog qee tus mojyam ntawm lub neej tshiab hauv tus Tswv. Thib ib, tus mojyam tseemceeb yog hlub tiag tiag (nqe 9-10, 15-16). Txojkev hlub no tsis yog hais ntawm lub ncauj tias hlub, txhawb zog thiab ua neeg paub tab xwb, tiamsis ua haujlwm tawm, ib leeg pab ib leeg kom loj hlob hauv tus Tswv. Hlub tiag tiag tsis ua txhaum tiamsis sib pab kom qaij deb kev txhaum thiab xyaum ua neeg zoo. Txojkev hlub ua siab dawb siab zoo, nyob kaj siab, ib leeg saib taus ib leeg, ib leeg ua zoo rau ib leeg ib yam li kwvtij nyob hauv Vajtswv tsevneeg. Kev hlub ua rau peb ua taus siab ntev rau cov neeg nyob ibncig, zoo siab nrog lawv thiab lawv quaj peb nrog lawv quaj. Hauv tus Tswv txojkev hlub, peb thiaj nyob tau ua ke. Cov ntseeg Yexus paub hais tias txhua yam zoo thiab koob hmoov puavleej yog Vajtswv pub xwb. Yog li, tsis khav hais tias peb txawj ntse, muaj tswvyim tiamsis muaj lub siab txo hwjchim mloog lwm tus thiab.
Thib ob, cov ntseeg yuav tsum nquag ua haujlwm kom pab tau tus kheej, tsevneeg thiab fij ua Vajtswv haujlwm (nqe 11, 13, 17). Tus neeg uas ntseeg Vajtswv tsis yog pheej niaj hnub thov kom tus Tswv tso Manas los noj, tiamsis paub siv lub zog, koob hmoov thiab lub sijhawm tus Tswv pub los ua haujlwm kom muaj lub siab txais qhua dav fo, pab cov ntseeg. Nquag ua qhov zoo pub rau txhua tus kuj yog ib tus mojyam zeem paub tus ntseeg Yexus. Peb yuav tsum ua neej kom coj tau sawvdaws ua zoo thiab ua rau Vajtswv tau ntsejmuag.
Thib peb, cov ntseeg Yexus kuj yuav raug txomnyem thiab (nqe 12), yog li ntawd peb yuav tsum niaj hnub cia siab rau tus Tswv, tus uas pub txhua yam kev cheemtsum thiab kev kaj siab. Hauv kev ua neej, peb cheemtsum kawm ntxiv kom muaj kev ntseeg zoo, loj hlob sab ntsujplig. “Qhov uas nej cia siab rau Vajtswv yuav ua rau nej zoo siab, thiab thaum nej raug kev txomnyem nej yuav tsum ua siab ntev thiab thov Vajtswv tsis tseg tsis tu.”
Thib plaub, ib tug mojyam hauv lub neej tshiab yog hlub yeebncuab, “ Nej yuav tsum thov Vajtswv foom koob hmoov rau cov neeg uas tsimtxom nej; thov Vajtswv foom koob hmoov rau lawv, tsis txhob thov Vajtswv foom tsis zoo rau lawv.” “Yog nej cov yeebncuab tshaib plab, nej cia li muab mov rau lawv noj; yog lawv nqhis dej, nej cia li muab dej rau lawv haus.” “nej tsis txhob ua phem pauj” (nqe 14, 17-21), rau qhov tus txiav txim yog Vajtswv. Lub neej muaj kev hlub, sib pab thiab nyob sib haum xeeb nrog txhua tus yog cov txiv ntawm lub neej loj hlob, puv npo Vaj Ntsujplig.
Cia kom muaj lub neej tshiab nyob hauv Vajtswv, kev hlub yuav tsum yog lub plag. Vajtswv kev hlub ua lub zog txhawb kom peb ua neej muaj qabhau thiab ua rau Vajtswv tau ntsejmuag.
Thov Vajtswv,
Tus Tswv! Thov Koj pub kom nyuam yaus nyob hauv neej tshiab txhua hnub los ntawm Koj lub zog thiab txojkev hlub Koj pub. Thaum nyuam yaus tsis xav hlub lwm tus, thov Koj qhia tias: Vim yog Koj txojkev hlub thiab lub siab ntev es nyuam yaus thiaj muaj lub neej tshiab hnub no. Tuav Tswv Yexus lub npe thov, Amees.
Peb tabtom muaj kev tawmtsam dabtsi hauv lub neej tshiab?
Nyeem Vajluskub hauv peb lub xyoo: I Vajntxwv 7
Kênh Youtube BHKTHN:
