Klei Aê Diê Blŭ: Rôm 12:9-21
Êlan kliăng: “Brei klei khăp diih jing sĭt. Bi êmut kơ klei jhat, djă pioh ya jing klei jăk” (Rôm 12:9)
Klei êmuh ksiêm mĭn: Ya mta knuih ngă bi kah mbha klei hdĭp mrâo phung đăo kơ Krist? Khua ƀĭng kna Y‑Pôl mblang kơ klei hdĭp mrâo thâo bi khăp hŏng ya bruă ngă klă? Ya drei srăng ngă čiăng dưi mâo klei hdĭp mrâo thâo khăp hlăm Khua Yang?
Khua ƀĭng kna Y‑Pôl bi êdah dŭm mta knuih mdê mơ̆ng klei hdĭp mrâo hlăm Khua Yang snei: Tal sa, knuih phŭn jing klei khăp sĭt (êlan 9-10, 15-16). Klei khăp anei amâo mjưh mă tăp boh blŭ lač khăp tui si klei bhiăn, čiăng bi mđĭ ai ôh ƀiădah nao kbưi hĭn hŏng bruă ngă sĭt, bi đru hdơ̆ng ayŏng adei đĭ hriê kơ prŏng hlăm Khua Yang. Klei khăp sĭt amâo bi mguôp hŏng klei soh ôh ƀiădah bi đru hdơ̆ng ayŏng adei weh đuĕ kơ klei jhat leh anăn djă pioh ya jing klei jăk. Hlăm klei khăp mâo klei êdu êun, ai tiê êđăp ênang, thâo bi mpŭ, dôk dơ̆ng msĕ si ayŏng adei hlăm gŏ sang Khua Yang. Klei khăp đru drei thâo săng kơ pô riêng gah, mơak mbĭt hŏng phung mơak leh anăn hia mbĭt hŏng phung hia. Hlăm klei khăp Khua Yang yơh drei dưi bi mguôp jing sa. Brei phung đăo thâo, jih jang klei jăk leh anăn klei brei yuôm bhăn kbiă hriê mơ̆ng Ama drei hlăm adiê sơăi. Kyuanăn, đăm bi mđĭ drei pô jing mnuih mbruă, mnuih thâo mĭn ôh, ƀiădah brei drei bi luă gŭ drei pô nanao čiăng kăp hmư̆ klei pô mkăn blŭ.
Tal dua, brei phung đăo hur har mă bruă čiăng bi mâo djăp mnơ̆ng ƀơ̆ng huă kơ drei pô, kơ gŏ sang, leh anăn đru kơ bruă Khua Yang (êlan 11, 13, 17). Amâo djŏ grăp hruê phung đăo srăng akâo kơ Khua Yang brei mana lĕ mơ̆ng adiê ôh, ƀiădah brei phung đăo thâo yua ai ktang, mmông găl leh anăn klei brei Khua Yang brei pioh mă bruă čiăng dưi jum tue hŏng klei kmah, đru phung ayŏng adei hlăm klei đăo kƀah mnơ̆ng. Hur har ngă klei jăk ti anăp jih jang mnuih jing sa klei bi knăl brei thâo kral sa čô đăo kơ Krist mơh. Brei drei ngă klei bi hmăi jăk kơ phung ƀuôn sang leh anăn bi guh kơang kơ Anăn Khua Yang.
Tal tlâo, phung đăo ăt srăng tuôm hŏng klei knap mñai (êlan 12), kyuanăn brei drei knang nanao kơ Khua Yang, Pô brei mnơ̆ng drei kƀah leh anăn brei klei êđăp ênang kơ ai tiê. Hlăm klei hdĭp, brei drei hriăm thâo huĭ mpŭ kơ Aê Diê čiăng dưi hriê kơ prŏng hlăm klei hdĭp myang. “Hơ̆k mơak bĕ kyua klei diih čang hmăng, brei diih gĭr hlăm klei knap mñai, wah lač nanao.”
Tal pă, sa knuih mkăn hlăm klei hdĭp mrâo jing khăp kơ phung roh, “Hmưi klei jăk kơ hlei pô ngă jhat kơ diih; hmưi klei jăk kơ diñu, đăm tăm pah ôh.” “Tơdah pô roh ih êpa, brei mnơ̆ng ƀơ̆ng huă kơ ñu; tơdah ñu mhao, brei êa mnăm kơ ñu.” “Đăm bi wĭt klei jhat kơ klei jhat arăng ôh” (êlan 14, 17-21), kyuadah klei rŭ ênua jing bruă Khua Yang dê. Klei hdĭp thâo khăp, thâo bi đru leh anăn dôk êđăp ênang hŏng jih jang mnuih jing boh mơ̆ng klei hdĭp myang đĭ hriê kơ prŏng, bŏ hŏng Yang Mngăt Jăk.
Čiăng dưi mâo klei hdĭp mrâo hlăm Khua Yang, brei klei khăp jing atur. Klei khăp Khua Yang brei yơh srăng mtrŭt drei hdĭp mâo boh tŭ dưn leh anăn bi guh kơang kơ Anăn Khua Yang.
Ya klei drei dôk bi blah hlăm klei hdĭp mrâo?
Wah lač: Ơ Khua Yang, đru kâo hdĭp hŏng klei hdĭp mrâo grăp hruê hŏng klei ktang leh anăn klei khăp Ih brei leh kơ kâo. Tơdah kâo ƀuh dleh snăk khăp kơ sa čô mnuih, akâo Ih lŏ bi hdơr kơ kâo snei, kyua hŏng klei Ih khăp leh anăn klei Ih pap yơh kâo mâo klei bi mlih jing mrâo msĕ si ară anei. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Bruă Mtao 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
