Klei Aê Diê Blŭ: Y‑Luk 18:1-8
Êlan kliăng: “Yêsu blŭ sa klei bi hriêng kơ digơ̆ čiăng bi hriăm digơ̆ jing yuôm wah lač nanao amâo êdu ai ôh” (Y‑Luk 18:1)
Klei êmuh ksiêm mĭn: Si klei sa čô mnuih wah lač kơ Khua Yang hmăng hmưi hlăm klei yăl dliê anei? Ya atur čiăng kơ drei dôk gĭr wah lač nanao? Si ngă Khua Yang čiăng kơ drei wah lač nanao, đăm êdu ai ôh?
Knuih bhiăn sa čô mnuih wah lač hŏng Khua Yang hŏng jih ai tiê, jing čiăng snăk kơ Khua Yang wĭt lač djăl yơh klei pô akâo, klei dleh dlan dôk găn. Khua Yang pô ăt čiăng msĕ leh anăn hĭn kơnăn mơh (êlan 7-8)! Hŏng phung đăo kơ Khua Yang, wah lač brei jing bruă bhiăn ngă yang đar msĕ si klei drei bi êwa. Ƀiădah čiăng kơ suaih ktang hĭn, tăp năng ăt čiăng kơ drei gĭr ktưn hĭn hrip bi êwa čiăng kơ ksŏ drei blang jih hnơ̆ng. Kyua klei anăn Khua Yang mtô, “Jing yuôm wah lač nanao amâo êdu ai ôh”. Čiăng kơ kđeh asei mlei prŏng ktang, phung hriăm mjuăt bi ktang asei mlei amâo djŏ knŏng ep hriăm leh anăn ƀơ̆ng huă djăp ênŭm êjai ƀiă hruê ôh ƀiădah gĭr ktưn hlăm lu mlan. Čiăng dưi jing sa čô kahan wah lač, brei drei dôk gĭr nanao hlăm klei bi mguôp hŏng Khua Yang.
Čiăng bi mđĭ ai drei dôk gĭr wah lač nanao amâo mdei, Khua Yang Yêsu yăl dliê sa klei čiăng bi mngač hĭn kơ klei yuôm Khua Yang čiăng kơ drei wah lač nanao hŏng Khua Yang. Mâo sa čô khua phat kđi amâo huĭ mpŭ kơ Aê Diê ôh leh anăn amâo mđing uêñ kơ mnuih mkăn ôh, ƀiădah ti knhal tuč ăt ñu mkra brei bi kpă kđi kơ sa čô mniê djiê ung kŏ krei asei hjăn, kyuadah gơ̆ krao kwưh amâo mâo mdei ôh. Khua Yang yua klei mdê ti krah sa čô khua phat kđi amâo mđing uêñ kơ arăng ôh leh anăn sa Aê Diê mđing uêñ nanao kơ phung mnuih Ñu ruah, čiăng bi kjăp klei drei čang hmăng kơ sa klei wĭt lač sĭt nik, djŏ mmông . Klei krao kwưh mniê djiê ung ngă kơ sa čô khua phat kđi amâo thâo mđing uêñ kơ arăng ăt kgŭ mkra brei bi kpă kđi, snăn hĭn êjai mơh Aê Diê pô bŏ hŏng klei khăp, kreh răng kriê, si dưi phưi lui hĕ mnuih Ñu ruah leh? Si Aê Diê dưi lui hĕ klei wah lač sa čô mnuih “krao kwưh kơ Ñu hruê mlam” (êlan 7)?
Wah lač nanao amâo êdu ai ôh srăng đru drei đĭ hriê kơ prŏng hlăm klei đăo tơl drei kjăp ktang dưi tlă anăp hŏng kpur pui hlơr hĭn kơ yang đar kjuh blư̆, amâodah hŏng phung êmông gu êpa sui hruê msĕ si khua pô hưn êlâo Y‑Đaniel leh anăn tlâo čô mah jiăng ñu! Y‑Abraham jing sa rup bi hmô tloh ênoh kơ klei wah lač nanao amâo mdei. Ñu dôk guôn Khua Yang bi sĭt klei Nu ƀuăn truh kơ 25 thŭn, leh anăn “ăt dôk dơ̆ng kwưh akâo ti anăp Yêhôwa” krao kwưh brei năm blư̆ kơ ƀuôn Sôđôm tơl Khua Yang wĭt lač! (Klei Mphŭn Dơ̆ng 18:17-32). Bi klei găn kơ khua ƀĭng kna Y‑Pôl, ñu wah lač leh tlâo blư̆ akâo kơ Khua Yang mă hĕ mđuĕ “sa aruăt êruê hlăm asei mlei” (II Kôrantô 12:7-10), leh anăn năng ai drei bi kngăr kyuadah ñu amâo lŏ wah lač kơ klei anăn ôh! Ƀiădah amâo djŏ ñu êdu ai ôh, ñu mdei wah lač kyuadah Khua Yang wĭt lač leh kơ ñu.
Hŏng klei Khua Yang Yêsu mtô lač, brei ƀuh Khua Yang čiăng tơl truh ti knhal tuč Ñu ăt čiăng ƀuh klei đăo drei ti lăn ala ăt dôk kjăp nanao. Čiăng dưi mâo msĕ snăn, brei grăp čô drei dôk gĭr wah lač nanao amâo êdu ai ôh.
Drei srăng wah lač hŏng Ama drei hlăm adiê tơl truh kơ hbĭl?
Wah lač: Ơ Ama Doh Jăk, kâo thâo Ama čiăng kơ kâo wah lač nanao, knang leh anăn đăo kluôm dhuôm kơ Ama. Akâo Khua Yang brei klei đăo kâo ktang kjăp čiăng kơ kâo wah lač nanao hŏng Ama leh anăn čang guôn klei wĭt lač mơ̆ng Ama bŏ hŏng klei khăp. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Bruă Mtao 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
