Malakaus 6:34-44
Nqe cim:
“Yexus hais rau lawv tias, “Nej muaj pes tsawg lub ncuav? Nej cia li mus saib.” Thaum lawv saib lawd lawv txawm hais tias, “Muaj tsib lub ncuav thiab ob tug ntses” (Malakaus 6:38)
Lus nug rau sawvdaws xav:
– Tswv Yexus muab mov rau pab neeg coob coob noj dhau los ntawm txoj haukev twg?
– Zaj xwm no ntuas peb rov tig saib yus tus kheej saib twb tau koom tes li cas hauv kev qhia tus Tswv txojkev hlub rau lwm tus lawm?
– Peb muaj kev txiav txim siab li cas rau xyoo tshiab no?
Sawv ntawm ib qhov tsam thawj uas nyuaj daws, pab neeg coob coob tshaj li tsib txhiab tug raws tus Tswv qab, mloog tus Tswv qhuab qhia mus txog thaum yuav tsaus ntuj nyob rau ib qhov chaw tsis muaj dabtsi noj. Txawm li ntawd los tus Tswv hais rau cov thwjtim: “Nej cia li nrhiav rau lawv noj”. Thaum cov thwjtim tseem xav tsis thoob tsis paub yuav nrhiav rau pab neeg coob coob ntawd noj li cas ces tus Tswv nug lawv: “Nej cia li mus saib nej muaj pestsawg lub ncuav? Nej sim mus saib seb”. Lawv mloog tus Tswv lus mus saib tas rov los qhia rau Yexus hais tias lawv muaj tsib lub ncuav thiab ob tug ntses. Tswv Yexus txawm txais thiab ua txujci muab tsib lub ncuav thiab ob tug ntses pub rau pab neeg coob coob ntawd noj tsau npo thiab tseem seem kaum ob tawb puv nkaus. Tsuas muaj tsib lub ncuav thiab ob tug ntses me me muab fij rau tus Tswv, tiamsis nyob hauv tus Tswv txhais tes feem khoom noj tsawg tsawg ntawd dhau los ua ib pluag mov loj txaus rau tshaj tsib txhiab leej noj tsau npo, tseem seem thiab.
Xyoo no muaj ntau yam kev puastsuaj tshwm rau peb lub tebchaws, ntau tug tom qab kob cua daj cua dub tsis tshuav mov txaus noj, khaubncaws txaus hnav, tiamsis muaj qee tug ntseeg kuj xav tias yus tsis muaj dabtsi lossis muaj ib nyuag ntsis xwb twb tsis muaj nuj nqis dabtsi coj mus pab tej kwvtij uas raug kev puastsuaj. Zaj xwm hnub no txaus rau peb xav, nyob rau lub sijhawm uas yuav xaus xyoo, peb txhua tus koom siab tig saib yus twb koom tes li cas nrog Pawg ntseeg coj tus Tswv txojkev hlub mus pab cov neeg uas tabtom ntsib kev txomnyem lawm. Tsib lub ncuav thiab ob tug ntses yog tsis muab fij rau tus Tswv ces tsuas yog ib feem khoom noj txaus rau ib ob tug noj xwb. Yog peb pheej ceev tseg cia rau peb tus kheej ces tsis yog pab neeg coob coob tsis muaj dabtsi noj xwb tiamsis tseem tsis tau dabtsi ntxiv. Txawm li ntawd los, thaum muab fij rau tus Tswv, tsis yog pab neeg coob coob tau noj tsau npo xwb tiamsis tseem seem ntau npaug ntxiv. Nyob hauv tsab ntawv Efexus 2:10, Timthawj Paulus cov ntseeg yog cov uas Vajtswv txhais tes puab. Vajtswv tsim peb los nrog Yexus Khetos koom ib txojsia kom peb ua tau tej haujlwm zoo, tag siab pab lwm tus. Peb yeejmeem tag siab fij tej uas yus muaj rau tus Tswv, tus Tswv yuav siv thiab ua tawm tej haujlwm loj rau Nws.
Hnub yuav xaus xyoo, txhua tus, txhua lub tsev neeg rov tig ntsia nyob rau lub sijhawm dhau los peb tau koom tes pab dabtsi? Cia li ua tib zoo mloog tus Tswv lolus hais: “Nej muaj pestsawg lub ncuav?” Tus Tswv tsis taij kom peb ua ib yam dabtsi uas hnyav hla qhov uas peb ua tsis tau, tiamsis tus Tswv xav kom peb fij rau Nws tej uas yus tabtom muaj. Cia li mloog tus Tswv lus “sim mus saib” tamsim ntawd tas txiav txim siab ua neej fij tagnrho rau tus Tswv nyob rau lub xyoo tshiab no.
Thov Vajtswv,
Tus Tswv thov koj pab nyuam yaus tas siab koom tes fij tej uas nyuam yaus muaj rau Pawg ntseeg hauv tej haujlwm uas pab lwm tus. Thov tus Tswv ntxiv dag zog tshiab rau nyuam yaus thiab zoo siab siv nyuam yaus nyob rau lub xyoo tshiab no. Nyuam yaus tuav Yexus Khetos lub npe thov, A-mees.
Peb coglus li cas rau tus Tswv txog tes haujlwm sib hlub sib pab dhau los ntawm tej haujlwm meej pem nyob rau lub sijhawm yuav xaus xyoo no?
Nyeem Vajluskub hauv peb lub xyoo: 2 Xamuyees 23
Kênh Youtube BHKTHN:
