Klei Aê Diê Blŭ: Y‑Markôs 6:34-44
Êlan kliăng: “Yêsu lač kơ diñu, “Dŭm klŏ kpŭng diih mâo lĕ? Nao dlăng bĕ.” Tơdah diñu nao dlăng leh, diñu lač, “Êma klŏ kpŭng leh anăn dua drei kan.” (Y‑Markôs 6:38)
Klei êmuh ksiêm mĭn: Si hdră Khua Yang Yêsu mkăp mnơ̆ng ƀơ̆ng huă kơ êpul phung ƀuôn sang? Êlan anei mñă kơ grăp čô drei lŏ dlăng wĭt ya klei drei mguôp leh hlăm bruă kah mbha klei khăp Aê Diê kơ grăp čô mnuih? Ya klei drei bi mklă hlăm thŭn mrâo hlue mlan ƀlĕ?
Dôk ti anăp klei dleh dlan, êpul ƀuôn sang êbeh êma êbâo čô tui hlue Khua Yang, mđing hmư̆ Ñu mtô tơl adiê tlam ti sa anôk kriêp ñăt, amâo mâo ôh mnơ̆ng ƀơ̆ng. Khădah snăn Khua Yang mtă kơ phung ƀĭng kna: “Diih yơh brei mnơ̆ng ƀơ̆ng huă kơ digơ̆.” Hlăk êjai phung ƀĭng kna ka thâo săng ôh si hdră srăng brei kơ êpul ƀuôn sang mnơ̆ng ƀơ̆ng huă snăn Khua Yang lŏ êmuh diñu: “Dŭm klŏ kpŭng diih mâo lĕ? Nao dlăng bĕ.” Diñu gưt asăp Khua Yang nao dlăng leh anăn lač hŏng Ñu diñu mâo êma klŏ kpŭng leh anăn dua drei kan. Khua Yang Yêsu mă leh anăn ngă klei myang mkăp kơ êpul mnuih huă ƀơ̆ng trei leh anăn lŏ êbeh pluh dua bai bŏ kpŭng leh anăn kan. Knŏng êma klŏ kpŭng leh anăn dua drei kan điêt dhiêt đuč myơr kơ Khua Yang, ƀiădah hlăm kngan Ñu kdrêč ƀiă anăn jing leh sa klei huă mnăm prŏng kơ êbeh êma êbâo čô mnuih huă ƀơ̆ng trei lŏ dơ̆ng êbeh lu mơh.
Thŭn anei yan adiê ngă leh ti lu anôk hlăm lăn čar drei, lu mnuih leh gưl angĭn êbŭ amâo lŏ mâo êsei huă djam ƀơ̆ng, ao hơô, ƀiădah đa đa phung đăo lač pô amâo mâo mnơ̆ng ôh amâodah mâo mă knŏng ƀiă amâo lu ôh čiăng mguôp bi đru hŏng ayŏng amai adei pô. Klei yăl dliê hruê anei năng kơ drei ksiêm mĭn hlăm hruê jih thŭn hlue mlan ƀlĕ, grăp čô drei hrăm mbĭt lŏ dlăng wĭt pô đru mguôp leh ya mnơ̆ng hŏng Phung Sang Aê Diê čiăng ba klei khăp Khua Yang truh hŏng phung dôk tuôm hŏng klei dleh dlan snăk. Êma klŏ kpŭng leh anăn dua drei kan tơdah amâo myơr kơ Khua Yang snăn knŏng jing sa kdrêč mnơ̆ng ƀơ̆ng điêt kơ sa dua čô mnuih đuč. Tơdah drei knŏng djă pioh kơ hjăn pô snăn amâo djŏ knŏng êpul mnuih ƀuôn sang amâo mâo mnơ̆ng ƀơ̆ng ôh ƀiădah kăn lŏ mâo thiăm rei. Khădah snăn tơdah myơr kơ Khua Yang, amâo djŏ knŏng jih êpul ƀuôn sang ƀơ̆ng trei ôh ƀiădah lŏ êbeh lu mơh. Hlăm hră Êphêsô 2:10, Khua ƀĭng kna Y‑Pôl brei thâo phung đăo kơ Krist jing hdră mkŏ mjing amâodah mnơ̆ng Aê Diê hrih mjing hlăm Khua Yang Yêsu hŏng mta kñăm jing ngă bruă jăk, hŏng jih ai tiê đru kơ pô mkăn. Drei jih ai tiê myơr kơ Khua Yang ya klei pô mâo, Aê Diê srăng yua leh anăn mjing bruă prŏng prĭn kơ Ñu.
Hruê knhal jih thŭn, grăp čô mnuih, grăp gŏ sang lŏ dlăng wĭt hlăm wưng êgao ya klei pô mguôp leh? Brei mđing hmư̆ Klei Aê Diê lač, “Dŭm klŏ kpŭng diih mâo lĕ”? Khua Yang amâo guôn drei ngă ya bruă êgao hnơ̆ng klei dưi drei ôh ƀiădah Khua Yang knŏng čiăng drei myơr kơ Ñu ya mnơ̆ng drei mâo. Brei gưt Klei Aê Diê Blŭ “nao dlăng bĕ” mtam ară anei leh anăn bi čuăn hdĭp myơr hlăm thŭn mrâo hlue mlan ƀlĕ.
Ya klei drei ƀuăn hŏng Khua Yang kơ klei bi kah mbha klei khăp hŏng bruă ngă hlăm hruê knhal jih thŭn?
Wah lač: Ơ Khua Yang, akâo kơ Ih đru kâo jih ai tiê đru mguôp hŏng ya mnơ̆ng kâo mâo hŏng Sang Aê Diê hlăm bruă đru kơ phung ka đăo. Akâo kơ Aê Diê thiăm ai ktang kơ kâo leh anăn mơak yua kâo hlăm thŭn mrâo hlue mlan ƀlĕ anei. Kâo wah lač hlăm Anăn Khua Yang Yêsu Krist, Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Dlăng Klei Aê Diê Blŭ hlăm tlâo thŭn: II Y-Samuel 23
Kênh Youtube BHKTHN:
