Klei Aê Diê Blŭ: Rôm 9:14-23
Êlan kliăng : “… Mâo mơ̆ klei amâo mâo kpă hlăm Aê Diê? Hơăi, amâo mâo ôh!” (Rôm 9:14)
Klei êmuh ksiêm mĭn: Ya klei Khua ƀĭng kna Y-Pôl lač hlăm klei Aê Diê ruah? Si ngă ñu bi klă leh klei sĭt nik anei? Mơ̆ng klei hriăm anei drei bi mĭn ƀuh si Aê Diê jing?
Ti tluôn klei yăl dliê kơ klei Aê Diê ruah Y-Yakôp, mâo sa klei êmuh snei, “Mâo mơ̆ klei amâo mâo kpă hlăm Aê Diê?”, Khua ƀĭng kna Y-Pôl lač: “Hơăi, amâo mâo ôh!” Ñu amâo mâo mblang ôh kơ phung dlăng hră ñu čih thâo ya ngă Aê Diê ruah hă Y-Yakôp leh anăn amâo ruah ôh Y-Êsâo, ƀiădah ñu yua klei bi hmô čiăng kơ jih jang mnuih thâo Aê Diê mâo klei dưi ngă tui si klei Ñu čiăng kluôm dhuôm.
Tal sa, Aê Diê lač kơ Y-Môis snei: “Kâo srăng pap kơ hlei pô Kâo pap, leh anăn Kâo srăng hơiêng kơ hlei pô Kâo hơiêng” (êlan 15, Klei Kbiă 33:19). Klei bi mtlaih Aê Diê brei kơ drei jing klei bi mtlaih brei kyua klei Aê Diê pap, drei amâo dưi mâo klei bi mtlaih hŏng klei yua ai ktang drei pô ôh kyuadah drei knŏng jing phung mnuih soh năng hŏng klei djiê (êlan 16).
Tal dua, “Kyuadah Klei Aê Diê Blŭ čih lač kơ Pharaôn, “Kâo mđĭ leh ih kyua Kâo čiăng bi êdah klei myang Kâo hlăm ih, čiăng kơ anăn Kâo arăng dưi hưn tar ƀar lăn ala.” Snăn Ñu pap kơ hlei pô Ñu čiăng, leh anăn Ñu bi khăng ai tiê kơ hlei pô Ñu čiăng” (êlan 17-18).
Lŏ mâo sa klei êmuh mkăn snei: Tơdah snăn, “Si ngă Aê Diê ăt kčŭt kơ klei soh lĕ? Kyuadah hlei pô dưi bi kdơ̆ng hŏng klei Ñu čiăng?” (êlan 19). Klei lŏ wĭt lač jing hlei drei jing tơl drei jhŏng kčŭt kơ Aê Diê? Pô mmai amâo mâo klei dưi hă ngă čeh prŏng leh anăn čeh điêt tui si ñu čiăng yua? Hŏng klei thâo mĭn Khua ƀĭng kna Y-Pôl mblang brei jih jang mnuih thâo săng djŏ kơ Aê Diê. Sĭt nik, Aê Diê mâo klei dưi ngă tui si Ñu čiăng kơ anak mnuih dŏ Ñu hrih mjing leh, ƀiădah Ñu amâo bi mjhua ôh klei dưi anăn čiăng ngă soh hŏng klei kpă ênô leh anăn klei khăp Ñu. Aê Diê “tŭ leh hŏng klei gĭr lu boh čeh mmai leh pioh kơ klei rai tuč” (êlan 22). Msă mơh, Aê Diê čiăng bi êdah klei mdrŏng klei guh kơang Ñu pioh kơ lu boh čeh Ñu pap, mmai leh mơ̆ng êlâo pioh kơ klei guh kơang (êlan 23). Aê Diê khăp kơ jih jang mnuih, Ñu čiăng jih jang mnuih mâo klei bi mtlaih sơăi. Aê Diê bi êdah klei kpă ênô leh anăn klei pap tơdah Ñu ruah.
Êlan leh anăn hdră Aê Diê êgao kdlưn hĭn kơ klei thâo săng anak mnuih. Aê Diê dưi yua klei hdĭp drei kluôm dhuôm pioh bi guh kơang kơ Ñu. Wăt tơdah tăp năng drei amâo dưi mblang ôh kơ bruă Aê Diê ngă, ƀiădah drei đăo sĭt nik, Aê Diê jing Pô Mâo Jih Klei Myang, bŏ hŏng klei pap, hlăm Ñu amâo mâo sa mta klei jhat ôh, leh anăn klei kpă ênô Ñu dôk nanao hlŏng lar. “Snăn, drei thâo Aê Diê mjing jih jang klei jing jăk kơ phung khăp kơ Aê Diê, čiăng lač phung Aê Diê iêô leh tui si klei Ñu čuăn” (Rôm 8:28).
Si ngă ih gưt mơ̆ kơ klei Aê Diê kiă kriê hlăm klei hdĭp ih?
Wah lač: Ơ Khua Yang, kâo lač jăk kơ Ih kyuadah klei Ih pap, Ih brei leh klei bi mtlaih kơ kâo! Đru kâo thâo huĭ mpŭ kơ Ih, đăo leh anăn gưt kơ hdră Ih mkra leh kơ kâo, čiăng hŏng klei hdĭp kâo, Anăn Ih mâo klei mpŭ mni. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôsuê 21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
