Loos 9:14-23
Nqe cim:
“…Peb yuav hais li cas? Peb yuav hais tias Vajtswv ua tsis ncaj no los? Tsis yog li ntawd!” (Loos 9:14).
Lus nug rau sawvdaws xav:
– Timthawj Paulus hais meej yam dab tsi hauv Vajtswv kev xaiv?
– Nws ua kom pom meej qhov tseeb no li cas?
– Peb totaub Vajtswv yog tus zoo li cas dhau zaj kawm no?
Txuas ntxiv zaj xwm uas Vajtswv xaiv Yakhauj, ua rau muaj ib lo lus nug hais tias “Vajtswv ua tsis ncaj lov?”, Timthawj Paulus teb meej tias: “Tsis yog li ntawd!” Paulus tsis siv zog piav qhia txog vimchiv Vajtswv xaiv Yakhauj, tsis xaiv Exaus, tiamsis nws ua tib zoo muab tej lus pivtxwv los piv qhia kom txhua tus paub meej hais tias Vajtswv muaj cai xaiv raws li Nws siab nyiam.
Tim 1, Vajtswv hais rau Mauxes hais tias: “Kuv pom zoo hmov tshua tus twg, kuv yuav hmov tshua tus ntawd, thiab kuv pom zoo hlub tus twg, kuv yuav hlub tus ntawd.” (nqe 15; Khiavdim 33:19). Qhov khoom plig uas yog txoj kev cawmdim Vajtswv pub rau peb yog los ntawm Vajtswv lub siab hlub tshua, tsis muaj leejtwg siv zog ces txawm tau vim peb txhua tus puavleej yog neeg txhaum tsimnyog tuag (nqe 16).
Tim 2, “Vajtswv txojlus hais rau Falaus hais tias, “kuv tsa Koj ua vajntxwv, kom sawvdaws pom kuv lub hwjchim, thiab kom kuv lub npe nrov ncha moo lug mus thoob qab ntuj.” Yog li ntawd, Vajtswv pom zoo hlub tus twg, Vajtswv yeej hlub tus ntawd, thiab Vajtswv pom zoo kom tus twg tawv ncauj tus ntawd yeej tawv ncauj” (nqe 17-18).
Ib lolus nug ntxiv: “Yog li ntawd, ua li cas Vajtswv tseem hais tias muaj tus ua txhaum thiab? Leejtwg tseem yuav tawv dhau Vajtswv thiab?” (nqe 19). Lo lus teb, Koj yog leejtwg, ua li cas Koj tseem nrog Vajtswv sib cav thiab?
Tus kws puab laujkaub av nws tsis muaj cai puab lub laujkauj loj lossis me raws li nws kev cheemtsum lov? Timthawj Paulus ua tib zoo qhia kom txhua tus nkag siab thiab totaub Vajtswv kom yog. Vajtswv yeej muaj cai yuav ua li cas rau txhua tus neeg uas Nws tau tsim los. Tiamsis Nws tsis ua li ntawd vim tawmtsam Nws txoj kev ncaj ncees thiab kev hlub. Vajtswv “ua siab ntev rau cov neeg uas nws chim rau, cov neeg ntawd yog cov uas raug txojkev puastsuaj” (nqe 22). Thiab Vajtswv kuj qhia hais tias Nws yuav muab Nws txoj kev hlub thiab lub tshwjchim rau txhua tus uas Nws twb xaiv lawm (nqe 23). Vajtswv hlub txhua tus, Nws xav kom txhua tus dim. Vajtswv qhia tshwm kev ncaj ncees thiab kev hlub tshua hauv nws kev xaiv.
Vajtswv txoj hau kev thiab kev npaj siab siab tshaj tibneeg kev nkag siab. Vajtswv yeej muaj cai siv peb lub neej qhia tshwm Vajtswv lub hwjchim. Txawm muaj tej lub sijhawm uas peb tsis totaub tej uas Vajtswv ua, tiamsis peb ntseeg hais tias Vajtswv yog tus uas muaj hwjchim thiab puv npo kev hlub tshua, yeej tsis muaj txoj kev phem twg nyob hauv Vajtswv thiab Vajtswv yuav ncaj ncees mus ib txhis li “Peb paub hais tias peb cov uas hlub Vajtswv, txawm yog peb tau zoo thiab txomnyem los Vajtswv yuav ua kom tej ntawd muaj nqis rau peb cov uas Vajtswv pom zoo hu los raws li Vajtswv npaj tseg lawm” (Loos 8:28).
Thov Vajtswv:
Tus Tswv, nyuamyaus ua tsaug rau Koj txoj kev hlub tshua thiab pub qhov khoom plig kev cawmdim rau nyuamyaus! Thov pab nyuamyaus paub hwm, ntseeg thiab mloog raws li tej uas Koj twb npaj tseg thiab teem tseg rau nyuamyaus lawm. Nyuam yaus tuav Tswv Yexus Khetos lub npe thov, Amees.
Ib tsoom mloog uas hmov tshua,
Peb puas mloog raws li Vajtswv kev tswj kav nyob rau hauv peb lub neej?
Nyeem Vajluskub hauv peb lub xyoos: Yausuas 21
Kênh Youtube BHKTHN:
