II Xwmtxheej 26:5-15
Nqe cim:
“Nws ua lub neej hwm tus Tswv raws li Xakhaliyas qhia nws, Vajtswv thiaj foom koob hmoov rau nws lub neej vammeej mus tas Xakhaliyas tiam.” (II Xwmtxheej 26:5b)
Lus nug rau sawvdaws xav:
– Nyob hauv ntu sijhawm no, Vajntxwv Uxiyas ua licas rau tus Tswv?
– Tus Tswv pub rau vajntxwv thiab lub tebchaws tau tej kev vammeej twg?
– Peb tau ua thiab tseem yuav ua dabtsi kom tau tus Tswv tej kev vammeej?
Nyob ntu sijhawm xubthawj, Vajntxwv Uxiyas tau nrhiav tus Tswv thiab vajntxwv nrhiav tus Tswv ntev npaum cas, ces tus Tswv ua rau vajntxwv tau kev vammeej npaum ntawd. Hais txog sab nraud tebchaws, vajntxwv tau tus Tswv pub tua yeej cov Filitees, cov Alav thiab cov Munis. Cov Amoos kuj raug them nyiaj kub ntau heev rau vajntxwv. Cov Filitees ibtxwm yog cov Yixalayees li yeebncuab, yog li ntawd vajntxwv thiaj siv tswvyim mus tua lawv thiab txeeb tau tej nroog uas tseemceeb. Vajntxwv Uxiyas txhim ntsayeej tiv thaiv tej nroog uas nyob hauv tebchaws Filitees. Vajntxwv lub koobmeej nrov ncha mus txog tebchaws Iziv vim nws muaj hwjchim heev.
Hais txog sab hauv tebchaws, vajntxwv Uxiyas hais kom cov pejxeem cog qoobloo thiab ua tej lub chaw tseemceeb xws li ua ntau lub chaw tsomfaj hauv nroog Yeluxalees thiab tom moj sab qhua. Ntawd yog tej chaw tsomfaj ua rog pab kom lub tebchaws nyob ruaj khov. Vajntxwv kuj hais kom khawb ntau lub qhov dej pab rau kev yug tsiaj thiab cog qoobloo. Tej no yog lub cim qhia hais tias lub tebchaws muaj kev vammeej thiab tau tus Tswv foom koobhmoov.
Vajntxwv muaj cov tubrog uas txawj ua rog thiab muaj txaus cuabyeej ua rog, ntawd yog lubcim qhia pom txog lub tebchaws tau tus Tswv pub muaj kev vammeej. Vajntxwv kom cov kws ua cuabyeej ua tau tej cuabyeej tua xubvos thiab tua pob zeb loj, muab tso rau saum tej chaw tsomfaj, ntawd yog tej cuabyeej ua rog uas muaj zog heev nyob tiam ntawd. Ib zaug ntxiv, phau Xwmtxheej hais txog vajntxwv lub koobmeej nrhov ncha moo lug mus rau txhua qhov, qhia pom txog kev vammeej ntawm tiam uas Vajntxwv Uxiyas ua vajntxwv kav “rau qhov Vajtswv yog tus pab nws.”
Muaj zog nyob txhua fab yog yam tshwjxeeb nyob hauv tiam uas Vajntxwv Uxiyas kav. Los ntawm Vajtswv kev pab thiab kev muab pub, vajntxwv thiaj muaj tswvyim, muaj zeem muag deb dav thiaj ua rau lub tebchaws muaj zog thiab vammeej. Vajntxwv tau tej ntawd twb yog vim nws “ua lub neej hwm tus Tswv” (nqe 5). Tus Tswv yog lub hauvpaus ntawm kev muaj zog, lub tswvyim, kev paub, kev vammeej, lub peevxwm tswj teb kav chaw, thiab kev muaj yeej. Tus Tswv txaus siab pub tej yam ntawd raws tus Tswv siabnyiam tiamsis qhov tseemceeb yog yuav tsum hwm Nws. Nyob hauv phau Xwmtxheej, hwm tus Tswv yuav tsum ua raws li tus Tswv tej lus qhia thiab tej lus samhwm (II Xwmtxheej 14:4). Niaj hnub nimno, peb nrhiav tus Tswv dhau ntawm kev pehawm, thov Vajtswv thiab kawm xyaum nrog rau kev ua raws Nws tej lus qhia. Vim li ntawd, tus Tswv cov menyuam txhua tus yuav tsum hwm tus Tswv thiaj yuav totaub Nws tej lus qhia, paub tus Tswv lub siabnyiam thiab ua raws . Ntawd yog yam yuav tsum ua thiaj yuav tau koob hmoov, kev muaj yeej thiab kev vammeej hauv lubneej.
Thov Vajtswv,
Tus Tswv, thov kom nyuam yaus niaj hnub hwm Koj, nrhiav ua raws Koj lub siabnyiam kom tau Koj nrog nraim thiab foom koob hmoov txhua fab hauv nyuam yaus lubneej. Nyuam yaus tuav Yexus Khetos lub npe thov, Amees.
Peb tabtom qhia tshwm nplooj siab nrhiav tus Tswv licas?
Nyeem Vajluskub hauv peb lub xyoos: II Kevcai 19
Kênh Youtube BHKTHN:
