Klei Aê Diê Blŭ: II Klei Yăl Dliê 26:5-15
Êlan kliăng: “Ñu čuăn duah Aê Diê hlăm ênuk Y-Sakari, pô bi hriăm ñu klei huĭ mpŭ kơ Aê Diê; leh anăn êjai ñu duah Yêhôwa, Aê Diê brei ñu čăt đĭ” (II Klei Yăl Dliê 26:5b)
Klei êmuh ksiêm mĭn: Hlăm ênuk mrâo kiă kriê anei, si ngă Mtao Y-Usia ngă hŏng Aê Diê? Ya klei čăt đĭ Aê Diê brei kơ ñu leh anăn kơ lăn čar ñu? Ya klei drei ngă leh – leh anăn dôk ngă čiăng mă tŭ klei čăt đĭ Aê Diê brei?
Hlăm ênuk mrâo kiă kriê, Mtao Y-Usia čuăn duah leh Aê Diê leh anăn êjai ñu duah Aê Diê, Aê Diê brei ñu čăt đĭ. Hŏng čar tač êngao, Aê Diê đru ñu bi blah dưi hŏng phung Philistin, phung Arap leh anăn phung Mêun. Phung Amôn tuh jia kơ ñu mơh. Phung Philistin jing roh hŏng phung Yuđa mơ̆ng sui leh kyuanăn ñu pô čŏng nao blah phung roh anei leh anăn plah mă lu boh ƀuôn mdơ̆ng ti anôk yuôm bhăn snăk. Mtao Y-Usia mdơ̆ng lu boh ƀuôn hlăm čar Philistin čiăng ênưih kiă kriê. Klei hing ang ñu arăng hmư̆ hing truh ti čar Êjip kyuadah ñu đĭ jing ktang snăk.
Hŏng čar pô, Mtao Y-Usia mkŏ mjing hdră ngă lŏ hma leh anăn bruă rŭ mdơ̆ng yuôm bhăn snăk hlăm anăn mâo bruă mdơ̆ng sang tum ti ƀuôn Yêrusalem leh anăn hlăm kdrăn tač. Anei jing kđông kahan tal êlâo hĭn pioh răng mgang klei hơĭt ênang kơ bruă mkŏ mjing klei hdĭp mda mnuih ƀuôn sang leh anăn bruă kđi čar ala čar. Msĕ mơh, ñu brei arăng klei lu kbăng êa čiăng bi mđĭ kyar bruă rông hlô mnơ̆ng leh anăn buh pla. Jih jang mnơ̆ng ñu mkŏ mjing anei brei ƀuh lăn čar mâo klei čăt đĭ leh anăn mâo klei Aê Diê hơêč hmưi.
Ñu mâo sa phung kahan thâo bi blah leh anăn mprăp djăp kdrăp bi blah ăt jing klei bi knăl brei ƀuh kơ lăn čar ñu Aê Diê brei klei đĭ kyar mơh. Ñu mâo phung knhâo mčeh mrâo mra êdeh dưm ti sang tum pioh mnah ƀrăm leh anăn boh tâo prŏng, anei jing mnơ̆ng bi blah mâo klei ktang snăk hlăm ênuk anăn. Lŏ sa blư̆, hdruôm hră Klei Yăl Dliê lŏ mñă klei hing ang ñu arăng hmư̆ hing kbưi, brei ƀuh kơ ênuk Mtao Y-Usia kiă kriê bŏ hŏng klei hing ang kyuadah “Khua Yang đru ñu yuôm bhăn tơl ñu jing ktang.”
Mâo klei đĭ kyar hlăm lu mta klei anăn jing anôk kdlưn hĭn hlăm ênuk Mtao Y-Usia kiă kriê. Kyua mâo klei Aê Diê đru leh anăn brei snăn ñu mâo klei thâo mĭn, thâo ƀuh êlam čiăng ba hriê klei đĭ kyar leh anăn klei čăt đĭ kơ lăn čar. Ñu dưi mâo klei anăn kyuadah ñu “čuăn duah Aê Diê” (êlan 5). Aê Diê jing Pô brei klei ktang, klei knhâo, klei thâo mĭn, klei čăt đĭ, klei dưi gĭt gai lăn čar, wăt klei đĭ kyar msĕ mơh. Aê Diê srăng brei jih klei anăn tui si klei Ñu čiăng jăk ƀiădah yuôm hĭn jing brei drei duah Ñu hŏng jih ai tiê. Hlăm hdruôm hră Klei Yăl Dliê, klei duah Khua Yang nao mbĭt hŏng klei djă pioh klei bhiăn Ñu leh anăn gưt klei Ñu mtă (II Klei Yăl Dliê 14:4). Hruê anei, drei duah Aê Diê hlăm klei drei kkuh mpŭ, wah lač, hriăm leh anăn ngă tui si Klei Ñu Blŭ. Kyuanăn, brei grăp čô phung đăo čuăn duah Aê Diê čiăng săng klei Ñu mtă, thâo si klei Ñu čiăng leh anăn hlue ngă, anăn yơh jing klei čoh čuăn čiăng dưi mâo klei myun, klei đĭ kyar leh anăn klei čăt đĭ hlăm klei hdĭp.
Si ngă drei dôk bi êdah kơ klei drei čuăn duah Aê Diê?
Wah lač: Ơ Khua Yang, đru kâo duah Ih nanao, duah klei Ih čiăng leh anăn hlue ngă čiăng dưi mă tŭ klei Ih dôk mbĭt leh anăn brei klei jăk jĭn hlăm djăp mta klei hlăm klei hdĭp kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
