Klei Aê Diê Blŭ: II Klei Yăl Dliê 26:1-5
Êlan kliăng: “Jăk mơak yơh grăp čô huĭ mpŭ kơ Yêhôwa, leh anăn êbat hlăm êlan Ñu. Ih srăng ƀơ̆ng boh mơ̆ng bruă kngan ih; ih srăng mơak leh anăn ih srăng mâo klei jăk” (Klei Mmuñ Hđăp 128:1-2).
Klei êmuh ksiêm mĭn: Ya mnơ̆ng Aê Diê brei kơ Mtao Y-Usia? Ya ngă ñu dưi mâo klei msĕ snăn lĕ? Si êlan hdră hdĭp drei mă kơ drei pô čiăng dưi mâo klei đĭ kyar, klei čăt đĭ?
Jih jang phung ƀuôn sang Yuđa mă Y-Usia, anak êkei mtao mjing gơ̆ mtao hlăk gơ̆ mrâo pluh năm thŭn. Leh ama ñu djiê, Mtao Y-Usia “mdơ̆ng ƀuôn Êlat leh anăn lŏ bi wĭt kơ čar Yuđa”. Ƀuôn Êlat jing sa bĭt anôk mjưh kŭmpăn găl leh anăn yuôm bhăn snăk hlăm klei blei mnia hŏng phung Arap, hŏng čar Klơ̆ng leh anăn hŏng phung Indian. Mphŭn dô dih, ƀuôn Êlat jing dŏ Mtao Y-Salômôn (II Klei Yăl Dliê 8:17-18) ƀiădah êdei tinăn phung Êđôm plah mă. Mtao Y-Amasia ama ñu tuôm bi blah leh hŏng phung Êđôm ƀiădah amâo dưi plah mă ƀuôn Êlat ôh. Ară anei, Mtao Y-Usia lŏ mă bi wĭt ƀuôn Êlat kơ čar Yuđa leh anăn lŏ mdơ̆ng anôk mjưh kŭmpăn yuôm bhăn anei.
Hdruôm hră Klei Aê Diê Blŭ brei thâo Mtao Y-Usia “ngă klei djŏ ti anăp ală Yêhôwa, tui si jih jang klei ama ñu Y-Amasia ngă leh”, čiăng lač hlăk tal êlâo ñu ăt hdĭp bi mơak kơ Aê Diê msĕ ênuk tal êlâo ama ñu mơh. Ñu mâo sa čô pô kčĕ thâo mĭn anăn gơ̆ Y-Sakari, jing pô bi hriăm ñu klei huĭ mpŭ kơ Aê Diê. Kyuanăn ñu tui duah Aê Diê hŏng jih ai tiê. Dŭm boh sui ñu tui duah Aê Diê dŭm anăn mơh thŭn Aê Diê brei kơ ñu mâo klei čăt đĭ. Boh blŭ “čăt đĭ” hlăm klei mblang phŭn jing, jing bruă, đĭ kyar. Mtao Y-Usia mâo leh sa klei mphŭn kčưm jăk snăk hlăm klei huĭ mpŭ kơ Aê Diê, tui duah Aê Diê hŏng jih ai tiê leh anăn Aê Diê brei kơ ñu klei jing, klei čăt đĭ. Bruă lŏ mdơ̆ng ƀuôn Êlat ênuk dôk hđeh snăk jing klei mphŭn kčưm bŏ hŏng klei jăk jĭn Aê Diê brei kơ Mtao Y-Usia tơdah ñu tui duah Aê Diê hŏng jih ai tiê.
Klei čiăng anak mnuih, grăp čô mnuih čiăng sơăi mâo klei đĭ kyar, klei čăt đĭ, boh nik nak êjai thŭn dôk hđeh mâo lu klei mơai hlăm klei mă bruă knuă. Arăng mĭn mâo klei đĭ kyar jing duah mâo lu prăk kăk leh anăn mâo klei arăng mpŭ hlăm klei hdĭp. Ƀiădah lĕ, đĭ kyar hlăm bruă knuă msĕ snăn dưi mjing drei jing mnuih mgao leh anăn lui wir Aê Diê (II Klei Yăl Dliê 26:16), mơ̆ng anăn lŏ bi luč klei đĭ kyar. Klei bi knal mơ̆ng klei hdĭp Mtao Y-Usia brei drei ƀuh, mnuih đĭ kyar ti anăp ală Aê Diê jing mnuih tui duah Aê Diê hŏng jih ai tiê leh anăn êbat tui si Ñu atăt gai. Klei đĭ kyar hlăm Khua Yang amâo djŏ kbiă hriê mơ̆ng klei thâo, klei gĭr ôh ƀiădah jing boh tŭ dưn Khua Yang brei kơ hlei pô duah Ñu leh anăn êbat nanao hlăm êlan Khua Yang čiăng kơ ñu “ngă klei djŏ nanao ti anăp Yêhôwa” leh anăn “čuăn duah Aê Diê”. Đĭ kyar hlăm klei hdĭp êbat sĭt suôr hŏng Khua Yang srăng đru drei lŏ mâo klei đĭ kyar hlăm klei mkăn msĕ mơh. Brei grăp čô phung đăo akâo bĕ klei jăk hĭn kơ klei hdĭp drei pô ƀiădah lĕ brei drei hdĭp hlăm klei huĭ mpŭ kơ Aê Diê leh anăn duah Ñu hŏng jih ai tiê.
Hlăm ya mta klei hlăm klei hdĭp drei dôk čiăng mâo klei đĭ kyar? Ya drei ngă čiăng dưi mâo?
Wah lač: Ơ Khua Yang, pap brei kơ kâo đa kyuadah mâo lu blư̆ kâo duah klei đĭ kyar msĕ msi phung amâo đăo khăng duah mơh. Đru kâo duah Ih hŏng jih ai tiê leh anăn êbat hlăm êlan Ih čiăng kơ klei hdĭp kâo dưi mă tŭ klei đĭ kyar Ih brei. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
