II Xwmtxheej 26:1-5
Nqe cim:
“Cov neeg uas mloog tus Tswv lus thiab ua raws li tus Tswv tej lus samhwm yog cov uas tau kev kaj siab. Koj yuav noj tej uas koj txhais tes khwv tau los; koj yuav muaj kev zoo siab thiab koj lub neej yuav vammeej.” (Ntawv Nkauj 128:1-2)
Lus nug rau sawvdaws xav:
– Vajntxwv Uxiyas tau tus Tswv pub yam dabtsi?
– Vim licas vajntxwv thiaj tau tej ntawd?
– Peb kawm tau txojcai ua neej twg kom tau tus Tswv pub ua tiav txhua yam thiab vammeej?
Tub vajntxwv Uxiyas tau cov Yudas tsa ua vajntxwv thaum nws nyuam qhuav muaj kaum rau xyoo. Tomqab uas nws txiv tuag lawm, Vajntxwv Uxiyas “rov mus txeeb tau lub nroog Elas thiab muab txhim kho dua tshiab”. Elas yog ib lub nroog muaj chaw nres nkoj thiab tseemceeb heev rau kev saibxyuas tej kev ua luam hla hiavtxwv nrog tej tebchaws nyob Alav, Afikas thiab Idias. Thaum ub, Elas yog Vajntxwv Xalumoos tug (II Xwmtxheej 8:17-18) tiamsis tomqab ntawd raug cov neeg Edoos txeeb tau. Vajntxwv Amaxiyas tau tua yeej cov Edoos tiamsis txeeb tsis tau lub nroog Elas. Nimno, Vajntxwv Uxiyas rov txeeb tau Elas rau cov Yudas thiab rov txhim kho dua tshiab.
Vajluskub qhia paub hais tias Vajntxwv Uxiyas “coj raws li nws txiv tus yamntxwv, nws ua haum tus TSWV lub siab nyiam”, txhais hais tias vajntxwv kuj muaj thawj ntu sijhawm ua neej haum tus Tswv siab zoo li nws txiv. Vajntxwv muaj ib tug tuav xam muaj tswvyim npe hu ua Xakhaliyas, nws yog tus qhia vajntxwv ua lubneej hwm Vajtswv. Vim li ntawd, vajntxwv thiaj tas siab nrhiav tus Tswv. Vajntxwv nrhiav Vajtswv ntev npaum cas, ces Nws ua rau vajntxwv ua tiav txhua yam npaum ntawd. Lo lus “vammeej” yog ua tiav txhua yam, muaj txiag npluanuj. Vajntxwv Uxiyas muaj kev qhib thawj zoo, mus raws tus Tswv txojkev, tas siab ntsws nrhiav tus Tswv thiab tau tus Tswv pub rau ua tiav txhua yam, vammeej. Qhov uas rov txhim kho lub nroog Elas puag thaum tseem hluas yog qhov qhib thawj ntawm tej koob hmoov uas tus Tswv pub rau Vajntxwv Uxiyas thaum nws tas siab nrhiav tus Tswv.
Nyob hauv tibneeg kev xav, leej twg los yeej xav ua tiav txhua yam thiab vammeej, tshwjxeeb yog cov hluas uas tseem muaj dag zog, xav tawm mus ua neej. Luag pheej xav hais tias ua tiav txhua yam yog nrhiav tau nyiaj ntau thiab muaj meejmom siab hauv tebchaws. Tiamsis kev xav zoo li ntawd muaj peevxwm ua rau peb dhau mus ua neeg khav theeb thiab tso tus Tswv tseg (II Xwmtxheej 26:16), qhov ntawd ua rau peb plam kev vammeej. Tej yam uas tshwmsim hauv Vajntxwv Uxiyas lubneej qhia pom hais tias, tus neeg ua tiav txhua yam raws li tus Tswv siabnyiam yog tus uas tas siab ntsws nrhiav tus Tswv thiab mus raws li tus Tswv coj qhia. Kev ua tiav hauv tus Tswv tsis yog los ntawm kev txawjntse, lub peevxwm tiamsis yog tus Tswv muab pub rau tus neeg paub nrhiav Nws, tswj tus kheej mus raws Nws txojkev kom tus neeg ntawd niaj hnub “ua haum tus Tswv lub siab nyiam” thiab “ua lub neej hwm tus Tswv”. Thaum vammeej hauv kev ua neej ncaj ncees nrog tus Tswv mus, yuav ua rau peb vammeej nyob hauv lwm seem. Tus Tswv cov menyuam cia li ntshaw kom tau yam zoo tshajplaws rau nws lubneej tiamsis yuav tsum ua neej hwm tus Tswv thiab tig nrhiav Nws.
Thov Vajtswv,
Tus Tswv, thov zamtxim rau nyuam yaus vim ntau zaug tsuas nrhiav kev vammeej li neeg ntiajteb. Thov pab nyuam yaus niaj hnub nrhiav Koj thiab mus raws Koj txojkev kom xwv nyuam yaus lubneej tau txojkev vammeej Koj pub. Nyuam yaus tuav Yexus Khetos lub npe thov, Amees.
Peb tabtom ntshaw kom tau vammeej mus rau seem twg hauv lubneej? Peb ua dabtsi kom tau tej ntawd?
Nyeem Vajluskub hauv peb lub xyoos: II Kevcai 18
Kênh Youtube BHKTHN:
