Pajlug 7:22-27
Nqe cim:
“Cov metub, nimno nej cia li mloog kuv hais thiab khaws kuv tej lus cia.”(Pajlug 7:24)
Lus nug rau sawvdaws xav:
– Vajntxwv Xalumoos qhia txog tus nqis thaum poob rau niam ntiav txhais tes yog li cas?
– Nws qhia menyuam paub tej kevcai twg thiaj pab tau kovyeej txoj kev dag ntxias ntawm kev nkauj nraug?
– Peb siv qhov ntawd li cas thiaj kovyeej kev dag ntxias?
Yam xub thawj uas ib tug neeg xav kovyeej txoj kev dag ntxias mas yuavtsum nres, tsis cia yus lub qhovmuag thiab lub qhov ntsej tig mus rau ntawm tus neeg dag ntxias. Tiamsis tig rov los cuag Vajtswv kom zeem paub tej kev dag ntawm tus neeg dag ntxias thiab tej nuj nqis thaum raug kev dag ntxias yuav tau them. Dab Ntxwgnyoog pheej muab txoj kev txhaum los plooj rau tej tsoos tsho zoo nkauj, ntxim nyiam thiab txaus siab, tiamsis Vajtswv Txojlus hais tias, tus neeg ruam uas mloog raws tej lus dag ntxias zoo li “luag cab tus txiv nyuj mus khi ntawm tswg tua” lossis zoo li “luag puav tus muaslwj dhia mus mag vojhluas” (nqe 22-23). Tswv Yexus hais tias, “Kuv qhia tseeb rau nej hais tias txhua tus uas ua txhaum puavleej ua txojkev txhaum qhev” (Yauhas 8:34). Teebmeem tsis yog them nuj nqis rau txoj kev txhaum, tiamsis yog kev txhaum khi tau lawm thiab yuav khiav kom dim los tibneeb lub zog ua tsis tau li.
Ntau tus tibneeg thaum ntsib kev dag ntxias mus ua kev nkauj nraug, pheej xav hais tias: “Kuv muaj txaus zog thiab peevxwm paub txog qhov chaw twg yuav tau nres”. Tiamsis thaum uas rhais ruam mus ua kev nkauj nraug lawm ces tsis muaj coob leej yuav tawm taus rov los! Xaxoos yog ib tug ua qauv txog qhov ntawd. Yog li ntawd, txhob xav hais tias yus muaj txaus zog, thiab txhob ntseeg li tej lus mos muag ntawm tus neeg dag ntxias hais, lossis txoj kev ntshaw hauv yus lub siab. Tiamsis cia Vajtswv Txojlus ci pom kev, pab peb ceevfaj txawj zeem paub tej lus dag ntxias ntawm peb tus yeebncuab. Tsis yog mloog Vajtswv Txojlus xwb tiamsis yuavtsum ua raws Vajtswv Txojlus thiab ua neej li yus coglus nrog Vajtswv lawm (nqe 24). Ntawd yog qhov tseemceeb uas yuav pab tau peb kovyeej kev dag ntxias (Ntawv Nkauj119:11).
Yuavtsum nco ntsoov hais tias kev txhaum tshwm hauv lub siab thiab txoj kev xav tuaj, vim li ntawd, “Tsis txhob pub tej pojniam uas zoo li tus pojniam hais hauv ntu Vajluskub no ntxias tau peb lub siab; tsis txhob ua tus neeg uas tsis paub qabhau dabtsi thiab raws nws qab mus” (nqe 25). Txhob ywj yus lub siab ntshaw thiab txoj kev xav phem “Koj yuav tsum ceevfaj thiab xav zoo zoo, rau qhov koj lub neej mus raws li koj tej kev xav” (Pajlug 4:23). Cia li txav deb cov phoojywg uas muaj kev xav ntshaw ua kev nkauj nraug, thiab txhob saib tej duab yees liab qab uas tsis tsimnyog saib tso saum huabcua vim tej ntawd yog yam yoojyim coj peb mus ua txhaum kev nkauj kev nraug. Yog li ntawd, peb cia li txhim tsa tsev neeg kom muaj kev kaj siab (Pajlug 5:18-19), thiab ua phoojywg nrog cov ntseeg uas ua lub neej hwm Vajtswv.
Nqe 26-27 ntuas peb hais tias, tsis paub muaj tsawg tus lub neej raug rhuav puastsuaj vim ntsigtxog kev txhaum ua nkauj ua nraug. Yuavtsum nco ntsoov ceevfaj yus tus kheej thiab zeem paub meej txog nuj nqis ntawm kev txhaum ua kev nkauj kev nraug. Yog ib tus tibneeg ua ntej yuav ua txhaum, nws siv sijhawm los ua tib zoo xav txog nuj nqis uas yuav muaj raug nws tus kheej, rau Vajtswv lub npe, rau pojniam menyuam, rau tsev neeg thiab rau pawg ntseeg ces nws yuav kovyeej txoj kev dag ntxias ntawd.
Thov Vajtswv:
Vajtswv, thov siv Koj Txojlus los ntxuav nyuam yaus lub siab thiab txoj kev xav. Thov pab nyuam yaus muaj lub neej ncaj ncees thiab dawbhuv ntawm Koj lub xwbntiag kom nyuam yaus tsis mus ua txhaum txoj kev nkauj nraug. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb twb kovyeej lossis swb kev dag ntxias mus ua kev nkauj nraug?
Nyeem Vajluskub hauv peb lub xyoos: Teev Npe 32
Kênh Youtube BHKTHN:
