Klei Aê Diê Blŭ: I Têsalônik 5:20-22
Êlan kliăng: “Đăm bi êmut kơ klei hưn êlâo ôh, ƀiădah ksiêm bi nik jih jang klei. Djă pioh ya klei jing jăk; brei diih hngah jih jang klei jhat” (I Têsalônik 5:20-22)
Klei êmuh ksiêm mĭn: Si mblang “Đăm bi êmut kơ klei hưn êlâo ôh”? Ya tur knơ̆ng čiăng kơ phung ƀuôn sang Aê Diê ksiêm dlăng ya jing klei jing jăk čiăng djă pioh leh anăn klei jhat čiăng hngah? Hruê anei si drei mă yua klei mtô anei?
Khua ƀĭng kna Y-Pôl mtă kơ phung đăo ti Têsalônik “Đăm bi êmut kơ klei hưn êlâo ôh”. “Bi êmŭt” jing “dlăng hơăi mang”. “Klei hưn êlâo” hlăm Klei Bi Mguôp Hđăp jing “hiu hưn Klei Aê Diê Blŭ”, leh anăn boh blŭ anei ăt lač kơ “Klei Aê Diê Blŭ”. Jing Klei Aê Diê hưn kơ anak mnuih msĕ si Khua ƀĭng kna Y-Pêtrôs čih leh: “Êlâo hĭn kơ jih jang, brei diih thâo săng klei anei: amâo mâo sa čô dưi mblang hjăn tui si klei mĭn ñu pô klei hưn êlâo hlăm Klei Aê Diê Blŭ, kyuadah amâo tuôm mâo ôh sa mta klei hưn êlâo kbiă hriê mơ̆ng klei mnuih mĭn, ƀiădah Yang Mngăt Jăk mtrŭt mnuih blŭ klei kbiă mơ̆ng Aê Diê” (II Y-Pêtrôs 1:20-21). Snăn, “klei hưn êlâo” Khua ƀĭng kna Y-Pôl lač jing Klei bŏ hŏng klei myang Aê Diê brei čiăng “mtô, ƀuah, mkra, leh anăn bi hriăm arăng klei kpă ênô” (II Y-Timôthê 3:16), leh anăn “klei hưn êlâo” amâodah Klei Aê Diê Blŭ jing tur knơ̆ng pioh ksiêm dlăng ya jing klei jăk, klei siam čiăng djă pioh, leh anăn ya jing klei jhat, klei ƀai, wăt ya klei msĕ si ƀai čiăng hngah.
Lăn ala ăt mâo lu phung mtô kơ knhuah hdĭp, klei bhiăn čiăng bi mklă klei jăk, klei jhat, ƀiădah jih jang mơ̆ng tur klei blŭ anak mnuih soh jhat, amâo kluôm ênŭm ôh anăn tur knơ̆ng knhuah hdĭp ăt kăn kluôm ênŭm rei, khăng bi mlih hlue si anôk hdĭp mda, năng ai djŏ ti anôk anei ƀiădah amâo djŏ ôh ti anôk mkăn, leh anăn bi mlih hlue si hruê mmông, srăng dưi lač djŏ hlăm ênuk êtuh thŭn êlâo ƀiădah amâo djŏ ôh hlăm ênuk mrâo mrang. Khădah snăn, “klei hưn êlâo” jing Klei Aê Diê Blŭ jing klei sĭt nik, amâo mlih ôh, “Rơ̆k krô, mnga dliu,ƀiădah klei Aê Diê drei blŭ srăng dôk nanao hlŏng lar” (Y- Êsai 40:8). Klei Aê Diê Blŭ jing tur knơ̆ng amâo mlih ôh čiăng bi mklă djŏ, soh, jăk, ƀai kơ anak mnuih dưi hdĭp djŏ, hdĭp jăk leh anăn hdĭp tŭ dưn.
Hruê anei, drei mâo Klei Aê Diê Blŭ hlăm kngan, klei brei mđing jing brei drei hdĭp mpŭ kơ Klei Aê Diê Blŭ, hriăm Klei Aê Diê Blŭ grăp hruê. Yang Mngăt Jăk srăng mtrang mngač đru drei thâo klei jăk čiăng jih ai tiê gưt asăp, leh anăn thâo klei soh, klei djŏ čiăng hngah, amâo nao hgŭm. Tơdah drei amâo dlăng hơăi mang klei hưn êlâo, knang kơ Klei Aê Diê Blŭ čiăng bi mklă djăp bruă êlâo kơ ngă, klei hdĭp drei srăng mâo Khua Yang yua tŭ dưn kơ pô, gŏ sang, Sang Aê Diê leh anăn ala ƀuôn. Lač mdê, drei knŏng dưi jing hra kơ lăn, klei mngač kơ lăn ala tơdah drei hdĭp djŏ hlue si klei Aê Diê mtô hlăm Klei Aê Diê Blŭ.
Drei khăng bi mklă djăp mta bruă mơ̆ng tur knơ̆ng Klei Aê Diê Blŭ mơ̆?
Wah lač: Ơ Aê Diê! Bi mni kơ Ih brei leh kơ kâo Klei Aê Diê Blŭ čiăng ktrâo atăt kâo êbat hlăm klei sĭt nik. Akâo kơ Klei Aê Diê Blŭ đru kâo thâo klei jăk, klei jhat čiăng kơ kâo hdĭp bi mơak Aê Diê leh anăn tŭ dưn kơ lu mnuih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Lêwi 22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
