Efexus 6:1-3
Nqe cim:
“Cov menyuam, nej yuav tsum mloog nej niam nej txiv lus, thiaj raws li tus Tswv txoj kevcai. Vajtswv txoj kevcai qhia hais tias: Nej yuav tsum hwm nej niam nej txiv” (Efexus 6:1-2).
Lus nug rau sawvdaws xav:
– Vim licas tus Tswv haivneeg yuav tsum hwm niam txiv?
– Hwm niam txiv raws li Vajtswv Txojlus qhia muaj lub ntsiab licas thiab ua qhia tshwm licas?
– Peb qhia tshwm lub siab hwm tus Tswv dhau ntawm kev hwm niam txiv zoo licas?
Hwm niam txiv yog ib lo lus samhwm uas Vajtswv kom Nws haivneeg yuav tsum ua. Timthawj Paulus rov hais txog nqe kevcai tim tsib nyob hauv Kaum Nqe Kevcai uas tus Tswv pub rau Nws haivneeg (Khiavdim 20:1-17). Thib ib, lub siab hwm niam txiv tau qhia tshwm dhau ntawm kev “mloog…niam…txiv lus, thiaj raws li tus Tswv txoj kevcai.” Nqe kevcai hwm niam txiv tau muab rau tus Tswv haivneeg coj thiab nqe kevcai ntawd nyob kiag tomqab plaub nqe hais txog kev hwm tus Tswv, vim li ntawd yog muab cais hwm niam txiv tawm ntawm kev hwm Vajtswv yeej tsis tau. Hais tau hais tias, kev mloog tus Tswv lus yuav tsum yog yam nyob siab tshajplaws, thiab kev mloog niam txiv lus yuav tsum raws li tus Tswv txoj kevcai. Thib ob, lo lus “hwm”, nyob hauv lus Kilis yog “muaj nqis” lossis “meej thawj”. Yog li ntawd hwm niam txiv muaj lub ntsiab hais tias menyuam yuav tsum ua lubneej licas kom niam txiv tau lwm tus saib muaj nqis, saib taus, thiab ua rau niam txiv tau meej thawj. Qhov kawg, menyuam hwm niam txiv yog yam haum tus Tswv siab, tus Tswv yeej yuav foom koobhmoov rau tus hwm niam txiv.
Nyob hauv Mathais 15:4-7, Tswv Yexus muab cov neeg uas pheej hais tias: “Yog leejtwg muaj ib yam dabtsi uas yuav pab tau nws niam nws txiv, tiamsis nws hais tias, kuv twb muab rau Vajtswv lawm, tsis tas tus ntawd yuav hwm nws niam hwm nws txiv lawm…” hu ua cov neeg ntsejmuag ncaj siab nkhaus. Yog li ntawd, tsis muaj ib tug neeg twg lossis ib qhov vimchiv twg ua rau tibneeg tau tshwj tawm ntawm feemxyuam hwm niam txiv. Ntawm no tsis yog cov menyuam li haujlwm thiab feemxyuam xwb, tseem yog kev qhia tshwm nplooj siab hwm tus Tswv thiab. Nyob ntawm nyias haiv neeg, nyias txojkev coj noj coj ua, nyias tsevneeg, nyias tus kheej,… nyias muaj nyiaj kev qhia tshwm nplooj siab hwm lwm tus, tiamsis tus Tswv haivneeg yuav tsum xyuamxim ua raws li tus Tswv samhwm.
Nyob hauv hnub Hwm Niam Txiv xyoo no, peb txhua tus cia li rov ntsuam xyuas nyias tus kheej saib tau ua rau tus Tswv tau koobmeej licas dhau ntawm kev hwm niam txiv. Hais txog sab ntsujplig, peb puas thov Vajtswv, puas pab kom niam txiv ruaj siab ntseeg tus Tswv thiab muaj kev zoo siab hauv kev sib raug zoo nrog Pawg Ntseeg lawm tau? Hais txog sab hauv siab, peb lub neej puas ua rau niam txiv muaj kev kaj siab, tau meej thawj lawm tau? Hais txog sab nqaij tawv, peb puas hmov tshua, pab, tu niam txiv tas siab ntsws lawm tau? Thaum tus Tswv tseem cia peb muaj sijhawm, cia li thov Vajtswv pub rau niam txiv kom ntau, hlub lawv kom ntau, ua siab ntev rau lawv kom ntau. Tsis txhob xam txog qhov poob qhov tau, vim tus Tswv paub peb txhua tus tej haujlwm thiab paub tseeb hais tias Nws yuav foom koobhmoov rau peb li Vajtswv Txojlus tau samhwm.
Thov Vajtswv,
Tus Tswv, thov ua Koj tsaug vim koj tsim nyuam yaus thiab pub nyuam yaus muaj niam txiv tu qhia. Thov Koj pab nyuam yaus qhia tshwm nplooj siab hwm tus Tswv dhau ntawm kev hwm niam txiv. Thov pub rau nyuam yaus muaj kev hlub, ua siab ntev, thiab muaj txaus khoom nyiaj txiag los pab nyuam yaus niam thiab txiv. Nyuam yaus tuav Yexus Khetos lub npe thov, Amees.
Peb ua dabtsi los qhia tshwm nplooj siab hwm niam txiv txij hnub no mus?
Nyeem Vajluskub hauv peb lub xyoo: Levis Kevcai 5
Kênh Youtube BHKTHN:
