Klei Aê Diê Blŭ: Êphêsô 6:1-3
Êlan kliăng: “Ơ phung anak, gưt bĕ kơ amĭ ama hlăm Khua Yang, kyuadah klei anăn jing djŏ. Mpŭ bĕ kơ amĭ ama ih” (Êphêsô 6:1-2)
Klei êmuh ksiêm mĭn: Ya ngă brei phung anak čô Khua Yang mpŭ hĕ kơ amĭ ama? Mpŭ kơ amĭ ama tui si klei Khua Yang mtă si čiăng lač leh anăn si ngă srăng bi êdah? Si ngă drei bi êdah klei huĭ mpŭ kơ Khua Yang hlăm klei mpŭ kơ amĭ ama?
Mpŭ kơ amĭ ama jing sa klei Aê Diê mtrŭn brei phung ƀuôn sang Ñu ngă. Khua ƀĭng kna Y-Pôl lŏ mñă kơ klei bhiăn tal êma hlăm Pluh Mta Klei Bhiăn Aê Diê brei leh kơ phung ƀuôn sang Ñu (Klei Kbiă 20:1-17). Tal sa, klei mpŭ kơ amĭ ama bi êdah hŏng klei “gưt kơ amĭ ama hlăm Khua Yang”. Klei bhiăn mpŭ kơ amĭ ama Aê Diê mtrŭn kơ phung ƀuôn sang Ñu leh anăn dăp ti tluôn pă mta klei bhiăn huĭ mpŭ kơ Aê Diê, kyuanăn, amâo dưi bi ktlah ôh klei mpŭ kơ amĭ ama hŏng klei huĭ mpŭ kơ Aê Diê. Amâodah lač snei, klei gưt asăp kơ Aê Diê srăng dưm ti anôk dlông hĭn, klei mpŭ kơ amĭ ama srăng dưm ti dlông tur gưt kơ klei bhiăn Aê Diê. Tal dua, boh blŭ “mpŭ” hlăm klei Grek lŏ mblang jing “ênoh” amâodah “knuih kơhưm”. Snăn yơh klei mpŭ kơ amĭ ama lŏ mblang jing si ngă phung anak srăng dôk dơ̆ng ƀơ̆ng huă čiăng kơ amĭ ama mâo klei arăng mpŭ, leh anăn hdĭp bi mơak kơ amĭ ama leh anăn brei kơ amĭ ama mâo knuih kơhưm. Ti knhal tuč, phung anak mpŭ kơ amĭ ama jing klei bi mơak kơ Khua Yang, sĭt nik Khua Yang srăng brei klei jăk jĭn.
Hlăm hdruôm hră Klei Mrâo Mrang Jăk Y-Mathiơ 15:4-7, Khua Yang Yêsu pia kơ phung lač snei: “Ya mnơ̆ng kâo dưi đru ih, kâo myơr leh kơ Aê Diê, amâo lŏ yuôm brei ñu đru amĭ ama ñu ôh” jing phung ai ngăm. Snăn yơh, amâo mâo sa čô mnuih amâodah sa mta klei dưi hngah ôh kơ bruă mpŭ kơ amĭ ama. Klei mpŭ anei amâo djŏ knŏng bruă ngă leh anăn bruă klam kơ sa čô pô jing anak ôh ƀiădah jing klei bi êdah kơ klei huĭ mpŭ kơ Aê Diê mơh. Klei mpŭ srăng bi êdah hŏng lu êlan mdê mdê tui si klei dhar kreh grăp djuê ana, ênuk dôk hdĭp, klei jing kơ gŏ sang amâodah klei jing grăp čô mnuih mdê mdê, ƀiădah brei phung anak čô Khua Yang ngă bi jăk klei mtă anei.
Hlăm hruê Mpŭ Kơ Amĭ Ama hruê anei, brei grăp čô drei lŏ ksiêm kơ ai tiê drei pô si ngă drei bi guh kơang leh kơ Anăn Khua Yang hlăm klei drei mpŭ kơ amĭ ama. Tĭng kơ klei hdĭp mngăt, si ngă drei wah lač, đru amĭ ama dôk kjăp hlăm klei đăo kơ Khua Yang leh anăn mâo klei mơak hlăm klei bi mguôp hŏng Phung Sang Aê Diê leh mơ̆? Tĭng kơ ai tiê, si ngă klei hdĭp drei ba hriê klei mơak, klei mpŭ kơ amĭ ama mơ̆? Tĭng kơ mnơ̆ng mnuă, si ngă drei uêñ mĭn, đru mtrah leh anăn răng kriê amĭ ama hŏng jih ai tiê leh mơ̆? Brei drei wah lač lu kơ amĭ ama, khăp leh anăn gĭr lu hŏng digơ̆ êjai Khua Yang brei kơ drei dôk mâo mmông myun. Đăm drei tĭng gŭ dlông ôh hdơ̆ng ayŏng adei, kyuadah Khua Yang thâo bruă grăp čô drei ngă leh anăn sĭt nik Ñu srăng brei klei jăk jĭn kơ drei msĕ si klei Ñu ƀuăn leh.
Ya klei drei ngă čiăng bi êdah klei mpŭ kơ amĭ ama hlăm hruê anei mtam?
Wah lač: Ơ Khua Yang, kâo bi mni kơ Ih kyuadah Ih hrih mjing leh kâo leh anăn brei kơ kâo mâo amĭ ama kăp rông ba. Akâo Khua Yang đru kâo bi êdah klei huĭ mpŭ kơ Khua Yang hŏng klei mpŭ kơ amĭ ama. Akâo Khua Yang thiăm kơ kâo klei thâo khăp, klei thâo gĭr, leh anăn prăk kăk čiăng kâo dưi đru amĭ ama kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Bruă Lêwi 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
