Yelemis 52:1-2
Nqe cim:
“Kuv nco ntsoov hais tias koj muab siab rau ntseeg ib yam li koj pog Lau-is thiab koj niam Enikes. Nimno kuv cia siab hais tias koj tseem muab siab rau ntseeg” (2 Timautes 1:5).
Lus nug rau sawvdaws xav:
– Ob tug vajntxwv twg tau hais txog nyob hauv ntu Vajluskub no?
– Vim li cas Xedekiyas tsis ua yam zoo li nws txiv?
– Zaj kawm hnub no pab peb ua neej li cas?
Ob tug vajntxwv uas hais txog hauv ntu Vajluskub no yog Xedekiyas thiab Yehauyakees. Ob tus puavleej yog vajntxwv Yauxiyas tub, Yauxiyas yog ib tus vajntxwv hwm Vajtswv thiab muaj lub siab txo hwjchim mloog Vajtswv tej lus ntuas (Yelemis 1:3; 2 Vajntxwv 22:19). Vajntxwv Yehauyakees lub npe tiag hu ua Eliyakees, nws tau vajntxwv Iziv tsa ua vajntxwv thaum nws hnubnyoog 25 xyoo (Yelemis 36:1-32) thiab tswj tebchaws Yudas tau 11 xyoo. Yehauyakees tus pojniam lub npe muaj lub ntsiab hu ua “tus Tswv tsa ruaj khov”, tiamsis nyob rau tiam nws kav nws ho ua ntau yam kev phem ntawm tus Tswv xubntiag, uas yog tso tus Tswv tseg, mus pe luag tej mlom, thiab nws tsuas xav txog nws tus kheej xwb, txawm yog tamsim no lub tebchaws tej pejxeem raug them se nyhav heev rau vajntxwv Falaus los nws tseem ua tej ntsa loog, roojvag loj thiab siab kawg, tsis quavntsej txog tej pejxeem li; tsis tas li ntawd xwb, nws tseem tsis kam mloog Vajtswv tej lus ceebtoom, lus ntuas tig rov los kom tau tus Tswv kho thiab zam txim (Yelemis 22:13-19). Ib yam li ntawd, vajntxwv Xedekiyas yog tus vajntxwv kawg hauv Yeluxalees tebchaws Yudas, nws yog vajntxwv Yauxiyas thiab Hamutas tus tub ntxawg (nqe 1), nws lub npe tiag tiag hu uas Mataniyas thiab tau vajntxwv Nenpukajnexales tsa ua vajntxwv thaum nws hnub nyoog muaj 21 xyoo thiab hloov npe hu ua Xedekiyas muaj lub ntsiab hais tias “ncaj ncees rau tus Tswv” (2 Vajntxwv 24:17). Xedekiyas tau keebkwm hais txog nws yog ib tus vajntxwv tawv ncauj, ua ntau yam kev phem ntawm tus Tswv lub xubntiag thiab tsis kam mloog tus Tswv tej lus ceebtoom, lus ntuas dhau ntawm cov cev lus (2 Xwmtxheej Vajntxwv 36:12-13).
Nqe 2 qhia paub “Vajntxwv Xedekiyas ua txhaum rau tus Tswv ib yam li Vajntxwv Yehauyakees ua”. Xedekiyas yog tub ntawm ib tug vajntxwv uas hwm tus Tswv tiamsis nws tsis xyaum ua raws nws txiv tus qauv, nws ho mus xyaum ua raws li Yehauyakees tej kev phem. Vim li cas? Vim yog nws tsis hwm tus Tswv, nws tsis pom hais tias nws ua vajntxwv yog Vajtswv xaiv los ua haujlwm rau Vajtswv thiab Nws haivneeg. Thaum ib tus thawjcoj nws saib tsis pom Vajtswv kev hlub, kev xaiv, tsuas pom yus muaj hwjchim xwb ces nws yuav ua neej tsis paub nco Vajtswv txiaj ntsig li. Tus ntawd nws yuav nyiam xyaum thiab ua phoojywg nrog cov neeg uas tsis paub hwm tus Tswv, thaum ntawd tsis yog poob koob hmoov xwb tseem yuav ua piam Vajtswv haivneeg huv tibsi thiab.
Peb pom tus duab no tsis thooj li tus duab tom phau Vajluskub tshiab ntawm Timautes. Nws txiv yog neeg Kilis ntseeg ntau tus vajtswv, nws niam thiab niamtais yog cov uas muab siab rau ntseeg thiab hwm Vajtswv. Ua Vajtswv tsaug Timautes tsis xyaum li nws txiv kev ua neej tiamsis xyaum raws nws niam thiab niamtais tus qauv kawm Vajtswv Txojlus thaum me los. Timautes ua lub neej hwm Vajtswv, vim li ntawd thaum uas tau Paulus cob qhia tas, nws dhau los ua ib tus xibhwb ua Vajtswv tes hawjlwm kawg siab kawg ntsws. Thov Vajtswv pab kom peb khaws Nws tej lus ntuas cia kom ua neej paub hwm Vajtswv thiab kom ua neej muaj nqis rau Vajtswv thiab lwm tus.
Thov Vajtswv,
Vajtswv, nyuam yaus ua Koj tsaug uas Koj pub muaj ntau tus qauv nyob rau hauv keebkwm Pawg Ntseeg zoo phem muaj, kom nyuam yaus saib qhov ntawd paub zam tus qauv phem thiab xyaum tus quav zoo kom txawj ua lub neej hwm Koj, tau txais koob hmoov thiab kom ua neej muaj nqis rau Vajtswv thiab tibneeg. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb tabtom xyaum ua peb lub neej sab ntsujplig raws li leejtwg tus qauv?
Nyeem Vajluskub hauv peb lub xyoos: Mathais 20
Kênh Youtube BHKTHN:
