Klei Aê Diê Blŭ: Y-Yêrêmi 52:1-2
Êlan kliăng: “Kâo hdơr kơ klei ih đăo sĭt suôr. Klei đăo anăn hdĭp leh êlâo hlăm aduôn ih H’Lôis, leh anăn hlăm amĭ ih H’Ônis, leh anăn kâo thâo sĭt ară anei klei đăo anăn ăt hdĭp hlăm ih” (II Y-Timôthê 1:5)
Klei êmuh ksiêm mĭn: Hlei dua čô mtao čih hlăm trăn Klei Aê Diê Blŭ anei? Ya ngă Mtao Sêdêkia amâo ngă ôh klei jăk msĕ si ama ñu? Si klei hriăm anei đru drei hdĭp hŏng Khua Yang?
Dua čô mtao dưi mñă tinei jing Mtao Y-Jêhôyakim leh anăn Mtao Sêdêkia. Jih dua jing anak Mtao Y-Jôsia sơăi, sa čô mtao huĭ mpŭ kơ Aê Diê, mâo ai tiê êdu êun mđing hmư̆ klei ƀuah mkra mơ̆ng Yêhôwa (Y-Yêrêmi 1:3; II Bruă Mtao 22:19). Mtao Y-Jêhôyakim anăn jing Y-Êliakim, mâo mtao Êjip mđĭ mjing mtao hlăk dua pluh êma thŭn (Y-Yêrêmi 36:1-32) leh anăn kiă kriê Yuđa 11 thŭn. Anăn ñu mblang jing “Yêhôwa mkŏ mjing”, ƀiădah hlăm wưng kiă kiê, mtao lŏ ngă lu klei soh jhat ti anăp Aê Diê msĕ si lui Aê Diê, kkuh kơ rup yang, hdĭp čuôt klih knŏng bi mĭn kơ pô hlăm bruă rŭ mdơ̆ng lu pưk sang prŏng hlăk mnuih ƀuôn sang tŭ klei tuh jia ktrŏ snăk mơ̆ng Pharaôn, leh anăn khăng ai tiê amâo mđing hmư̆ klei Yêhôwa ƀuah mkra čiăng mâo klei pap brei leh anăn bi mrâo (Y-Yêrêmi 22:13-19). Msĕ snăn mơh, Mtao Sêdêkia jing mtao knhal tuč mơ̆ng Yuđa ti Yêrusalem, anak kluč Mtao Y-Jôsia leh anăn H’Hamutal (êlan 1), anăn ñu jing Y-Mathania, mâo mtao Y-Nêƀukatnetsar mđĭ jing mtao hlăk dua bluh sa thŭn leh anăn mlih anăn jing Sêdêkia jing “Kpă ênô hŏng Yêhôwa” (II Bruă Mtao 24:17). Ñu mâo hƀuê ênuk čih jing sa čô mtao mâo ai tiê khăng, ngă klei soh jhat ti anăp Aê Diê leh anăn amâo mđing hmư̆ Klei Aê Diê Blŭ mtă mơ̆ng phung khua pô hưn êlâo Ñu ôh (II Klei Yăl Dliê 36:12-13).
Êlan 2 brei thâo Mtao Sêdêkia “ngă klei jhat ti anăp ală Yêhôwa msĕ si jih jang klei Y-Jêhôyakim ngă leh”. Jing anak sa čô mtao huĭ mpŭ Y-Jôsia ƀiădah mtao Sêdêkia amâo hriăm tui si klei mtao ama bi hmô ôh ƀiădah lŏ tui ngă msĕ si mtao ƀai Y-Yêhôyakim. Ya ngă? Mta phŭn jing kyua mtao amâo huĭ mpŭ kơ Aê Diê ôh, amâo ƀuh bruă ñu dưi ngă mtao jing kyua Aê Diê ruah čiăng mă bruă kơ Aê Diê leh anăn phung ƀuôn sang Ñu. Tơdah sa čô khua gĭt gai amâo ƀuh ôh klei pap Aê Diê ƀiădah knŏng ƀuh klei dưi hlăm kngan snăn srăng hdĭp amâo thâo hdơr knga ôh. Pô anăn khăp snăk kơ klei tui leh anăn bi mguôp hŏng phung amâo huĭ mpŭ atăt klei hdĭp amâo djŏ knŏng luč jih klei hơêč hmưi ôh ƀiădah lŏ hmăi kơ phung ƀuôn sang Aê Diê.
Drei ƀuh sa rup mklăk hlăm Klei Bi Mguôp Mrâo, anăn jing Y-Timôthê. Ñu mâo ama jing mnuih Grĕk hlue đăo kơ lu yang, mâo amĭ leh anăn aduôn jing mnuih huĭ mpŭ kơ Aê Diê. Bi mni kơ Aê Diê kyua ñu amâo hmăi knuih hdĭp ama ñu ôh ƀiădah hlue si klei bi hmô mơ̆ng amĭ leh anăn aduôn ñu čiăng hriăm Klei Aê Diê Blŭ mơ̆ng hlăk điêt. Ñu hdĭp huĭ mpŭ kơ Aê Diê, kyua anăn hlăk mâo Khua ƀĭng kna Y-Pôl ktrâo lač, ñu jing sa čô khua pô mtô mă bruă kơ Aê Diê jih ai tiê. Akâo kơ Khua Yang đru drei hdĭp hŭi mpŭ kơ Aê Diê leh anăn hdơr knga kơ Ñu čiăng kơ klei hdĭp drei tŭ dưn kơ Khua Yang leh anăn kơ lu mnuih.
Klei hdĭp mngăt drei dôk hmăi mơ̆ng hlei pô?
Wah lač: Ơ Aê Diê! Bi mni kơ Ih brei leh kơ kâo lu phung bi hmô huĭ mpŭ hlăm hƀuê ênuk Phung Sang Aê Diê. Akâo kơ Ih đru kâo grăp hruê tui hlue klei hdĭp huĭ mpŭ mơ̆ng phung nao êlâo čiăng kơ kâo jing pô bi hmô jăk kơ anak čô tui hlue. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Mathiơ 20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
