Mathais 16:5-12
Nqe cim:
“Ib qhov keeb me me xwb ua rau lub ncuav su tuaj.”( 1 Kauleethaus 5 :6b)
Lus nug rau sawvdaws xav:
– Tswv Yexus siv tus duab “keeb” los qhia cov thwjtim yam dab tsi?
– Vim li cas Tswv Yexus qhia lawv “yuav tsum ceevfaj cov Falixais thiab cov Xadukais cov keeb”?
– Tus Tswv lolus ntuas peb yam dab tsi hauv lub neej uas nrog Nws mus?
Tomqab uas Tswv Yexus tsis kam ua txujci rau Falixais thiab Xadukais, Nws thiab cov thwjtim nce nkoj hla hiavtxwv mus rau sab tim ub, thaun mus txog tid cov thwjtim mam nco txog hais tias lawv tsis coj zaub mov mus, lub sijhawm no Tswv Yexus thiaj siv tus duab “keeb” los ceebtoom cov thwjtim txog cov Falixais thiab cov Xadukais cov “keeb”. Nyob hauv Vajluskub tshiab tshwj Mathais 13:33 thiab Lukas 13:21, “keeb” muaj lub ntsiab hais txog yam phem ntau. Tswv Yexus txiav txim cov Falixais tus cwjpwm ntsejmuag ncaj siab nkaus thiab cov Xadukais lub siab nyiam uas ua li neeg ntiajteb ua, tiamsis cov thwjtim tsis totaub lub ntsiab, lawv xav hais tias tus Tswv cem lawv vim lawv tsis nqa zaub mov mus. Tswv Yexus thiaj ntuas cov thwjtim hais tias lawv twb pom Nws ua txujci ob zaug pub mov rau ntau txhiab leej nrog lawv nyob noj lawm, cas lawv tsis nco qab. Thaum kawg Tswv Yexus thiaj txhais qhia rau cov thwjtim hais tias kom lawv tsis txhob xyaum li cov Xadukais lub siab tawv tsis ntseeg thiab cov Falixais ntsejmuag ncaj siab nkaus.
Tomqab no Paulus sau ntawv rau Pawg Ntseeg, nws kuj ceebtoom kom cov ntseeg tsis txhob cia tej kev phem kev qias hauv ntiajteb no tswj lawv. “Ib nyuag qhov keeb xwb, yeej ua rau lub ncuav su tagnrho” (Kalatias 5:9; 1Kauleethaus 5:6), yog peb pheej yug kev phem, peb xav hais tias yau yau xwb tsis ntshai ces yuavtsum ceevfaj twb vim qhov yau yau uas nyob twjywm hauv peb lub siab ntawd yuav loj tuaj tua peb tuag ib yam li ib nyuag qhov keeb ua rau lub ncuav su tagnrho. Twb yog vim li ntawd Tswv Yexus thiaj qhia rau Nws cov thwjtim hais tias “yuav tsum ceevfaj cov Falixais thiab cov Xadukais cov keeb”.
Cov ntseeg yuavtsum ceevfaj tsis txhob ua neej li cov Xadukais, uas hais tias muaj kev ntseeg tiamsis ua neej li neeg ntiajteb ua, yog ua neej li ntawd peb yeej yuav tuag nrog neeg ntiajteb. Tsis tas li ntawd peb kuj tsis txhob ua neej li cov Falixais ntsejmuag ncaj siab nkaus. Sab nraud zoo tiamsis sab hauv mas phem kawg li “…zoo ib yam li lub ntxa uas pleev hmoov sib sab nraud dawb paug, tiamsis sab hauv puv nkaus pobtxha neeg tuag thiab tsw lwj ntxiag xwb” (Mathais 23:27). Cov “keeb” no txaus ntshai vim neeg ntsia tsis pom sab hauv xav hais tias lawv yog cov uas hlub Vajtswv thiab ncaj ncees ua haujlwm tiamsis yuavtsum ceevfaj vim “Tsis muaj ib yam dabtsi uas neeg yuav muab ntis tau tsis pub Vajtswv pom. Ib puas tsav yam uas Vajtswv tsim los lawm Vajtswv yeej pom huv tibsi, thiab peb txhua tus nyias yuav tsum piav nyias lub neej qhia rau Vajtswv” (Henplais 4:13).
Thov Vajtswv,
Vajtswv, thov pab nyuam yaus paub hais tias nyuam yaus puas tabtom ua neej li cov Xadukais thiab Falixais? Yog muaj thov Koj hloov nyuam yaus lub neej kom ua neej tseeb thiab ncaj ncees rau Vajtswv Koj thiab kwvtij sawvdaws. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Muaj muaj yam “keeb” twg tabtom kis peb lub neej?
Nyeem Vajluskub hauv peb lub xyoos: Mathais 17
Kênh Youtube BHKTHN:
