Klei Aê Diê Blŭ: Klei Mtô Mñă Klei Bhiăn 21:15-17
Êlan kliăng: “Ƀiădah ñu srăng tŭ anak kkiêng tal êlâo anak êkei mơ̆ng mniê ñu amâo khăp ôh, hŏng klei ñu brei kơ gơ̆ dua blư̆ lu hĭn mơ̆ng jih ngăn ñu mâo, kyuadah gơ̆ jing boh êlâo kơ klei mơai ñu; klei bhiăn jing ayŏng khua bha gơ̆.” (Klei Mtô Mñă Klei Bhiăn 21:17)
Klei êmuh ksiêm mĭn: Ya jing klei mdê klei ayŏng khua dưn ngăn mkă hŏng phung anak mkăn hlăm gŏ sang? Ya klei Aê Diê ghă amâo brei pô jing ama ngă? Aê Diê brei klei bhiăn anei hŏng ya klei kñăm čiăng?
Knhuah yuôm bhăn kơ klei bi dôk ung mô̆ hlăk tal êlâo hĭn pioh knŏng kơ sa čô êkei leh anăn sa čô mniê. Ƀiădah lĕ phung Israel hmăi klei bhiăn dôk lu mô̆ mơ̆ng phung găp djuê krĭng Giăm Ngŏ kyuanăn diñu amâo lŏ gưt ôh kơ hdră bi dôk ung mô̆ Aê Diê mjing leh hlăk êlâo. Kyua hŏng klei amâo gưt kơ klei kruak čua anăn mơh atăt truh kơ klei bi keh koh hdơ̆ng mnuih hlăm gŏ sang, mjing klei bi roh kyua bi mmiă klei dưi, ngăn drăp hŏng klei êdah amâodah hŏng klei hgăm hlăm anôk arăng pia jing gŏ sang. Wăt snăn dưn mơh, Aê Diê ăt kiă kriê jih jang gŏ sang anăn leh anăn Ñu brei klei bhiăn čiăng rơ̆ng kjăp klei tŭ dưn leh anăn klei mtăp mđơr kơ grăp čô mnuih hlăm gŏ sang.
Trăn Klei Aê Diê Blŭ anei bi êdah klă klei jing mơ̆ng phung êkei dôk lu mô̆, khăp kơ mô̆ anei hĭn kơ mô̆ mkăn, atăt truh kơ klei hngah kơ klei jing anak khua kơ anak êkei mô̆ ñu amâo khăp ôh kkiêng leh. Ƀiădah tui si klei bhiăn Aê Diê, ayŏng khua srăng dưi dưn kdrêč ngăn dưn lu hĭn, arăng amâo dưi plah mă ôh klei tŭ dưn tui si klei bhiăn bi kdriêl leh kơ gơ̆ kyua klei ama amâo khăp ôh kơ amĭ gơ̆. Wăt tơdah klei dôk sa ping hlăm klei khăp plah wah ung hŏng mô̆, ama hŏng anak jing sa klei dleh dưi mkhư̆ mgang dưn, ƀiădah klei bhiăn Aê Diê đru djă pioh klei mtăp mđơr kơ klei tŭ dưn tui si klei bi kdriêl leh kơ grăp čô mnuih hlăm gŏ sang. Klei Aê Diê kñăm jing čiăng kơ phung anak êkei kkiêng tal êlâo anăn wăt tơdah digơ̆ hriă kơ klei khăp dưn ƀiădah ăt mâo mơh klei Aê Diê Pô bŏ hŏng klei jăk đru dŏng mgang.
Boh klă kơ klei bi keh koh mđĭ mđal hlăm lu boh gŏ huă phung ƀuôn sang Israel kbiă hriê mơ̆ng klei diñu amâo gưt ôh kơ hdră bi dôk ung mô̆ Aê Diê mjing leh. Klei Aê Diê Blŭ mtă:
“Wăt êwa hdĭp Aê Diê dôk êbeh dlai, Amâo djŏ hĕ Aê Diê mjing sa čô mnuih anăn, Leh anăn ya klei Ñu čiăng? Kyua Ñu tui duah phung anak čô huĭ mpŭ kơ Aê Diê” (Y‑Malaki 2:15a). Čiăng đăm mâo klei ênguôt amâo năng mâo hlăm gŏ sang, tal êlâo hĭn brei phung đăo kơ Krist gưt kơ êlan hdră sa mô̆ sa čô ung, êngao kơ klei anăn, brei amĭ ama ngă klei mtăp mđơr mơh hŏng phung anak čô diñu. Đăm ôh kyua bi djŏ hŏng sa čô anak anei hĭn snăn ngă klei dôk sa ping hŏng digơ̆. Brei phung anak aneh thâo hdơr knga kơ klei amĭ ama rông ba, tơdah prŏng khue leh, brei mĭn kơ klei duah ƀơ̆ng huă, thâo mpŭ kơ amĭ ama, đăm ôh knŏng bi hmăng kơ dŏ ngăn amĭ ama snăn ngă klei bi mmiă klei tŭ dưn hdơ̆ng ayŏng amai adei, ngă klei bi rŭng leh anăn bi êka kƀeh hlăm gŏ sang.
Drei hdĭp leh anăn dôk dơ̆ng ƀơ̆ng huă djŏ tui si klei Khua Yang mtă hlăm gŏ sang leh mơ̆?
Wah lač: Ơ Khua Yang, Ih jing Pô đru msir jih jang klei mčah rai hlăm gŏ sang kyua klei kâo ngă amâo djŏ. Đru gŏ sang kâo, amĭ ama dôk dơ̆ng mtăp mđơr, anak čô thâo mpŭ čiăng kơ grăp čô thâo bi mguôp, bi khăp leh anăn thâo kơ Ih jing Pô jăk.
Dlăng Klei Aê Diê Blŭ hlăm tlâo thŭn: Y‑Sakari 1:1-2:13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
