Tơdrong jang 8:1-5
Trong tơm: “Athei bơtho tơdrong Sư ling lang; mă đe mơ̆ng mă đe ưh, ih kư̆ bơtho đĕch” (II Timôthê 4:2a)
Nơ̆r jet tơchĕng pơwao:
– Khul Lui blŭng a sơ̆ đe pơm kơnê̆ kơ lu sư liơ?
– Lu bơngai lui tơklah tơklang ei năm tơyơ?
– Dang ei bơ̆n pơhrăm pơm rok kơmĭl Khul Lui blŭng a sư thoi yơ?
Đơ̆ng rŏng kơ Êtien lôch, (Tơdrong jang 7:56) păng đơ̆ng rŏng đe pơm kơnê̆ tơdrong lui kơ Kră Yang, ngeh kơ jơhngơ̆m lu bơngai lui rơdu tơrăn hloi bơih lăm tơdrong pơm kơdranh ră roi Tơdrong ‘Nao ‘Lơ̆ng. Mă-lei tơplơ̆ kơ ‘noh, lu sư kang pran hloh dơ̆ng. Đơ̆ng tơdrong đe pơm kơnê̆ ‘noh pơdrŭt lu sư kang hưch hanh ‘maih ră roi Tơdrong ‘Nao ‘Lơ̆ng Kră Yang hloh dơ̆ng, mă lu sư năm tơyơ tơyơ, lu sư roi Tơdrong ‘Nao ‘Lơ̆ng tơ noh (trong 4).
Hla bơar Tơdrong jang đơ̆ng chăl 4 truh tơ chăl 7 chih roi tơdrong lu bơngai lui pơlei Jêrusalem tơ’bơ̆p tơdrong đe pơm kơnê̆ rai đunh rai dêh. Blŭng a, đe pơma pơjuă, tơan tơhli, pơtrơp kơ ‘noh, đe tôn teh, đơ̆ng rŏng kơ ‘noh đe pơlôch ‘bok Êtien, pơtrơp dơ̆ng, “đe pơm kơnê̆ rai dêh hloh dơ̆ng.” Ưh kơ dơ̆ng tôch ‘bơ̆t doh, đei dơ̆ng ‘bok Sôl pơm kơnê̆ pơlôch pơrăm Khul Bơngai Lui, kư̆m đei lơ ‘nu bơngai lui, ‘bok Sôl rôp chĭt lăm hnam phak (trong1-2). Mă khan lei ră, đơ̆ng tơdrong gleh pơmat noh kang pơdrŭt lu bơngai lui mă tơklah tơklang ei đei jơhngơ̆m pơm kiơ̆ nơ̆r Kră Yang wơh athei ră roi noh, lu sư năm ră roi tơ âu tơ noh, Tơdrong ‘Nao ‘Lơ̆ng lanh jơ̆p jang kơ teh đak. Kră Yang pơih să Dêh char Sư tŏk-bŏk lu ayăt hil areh blah plơ̆ noh hloi. Sơ̆p Hla bơar ’Bok Kei-Dei lăm Hla bơar Tơdrong Jang ‘nâu hei pơkeh nơ̆r Kră Yang Yêsu khan gah tơdrong jing bơngai pơm kơdranh ră roi tơdrong Kră Yang tơ “pơlei Jêrusalem, jơ̆p kơ dêh Juđê, dêh Samari, đơ̆ng noh jơ̆p kơ teh đak”. Tơdă Kră Yang hơmet oei hơnơ̆ng kơ wơ̆ tŏk ling-lang đĕch. Mă khan lu bơngai kơplah ei sơ̆ phŏ ưh kơ ‘bôh ră tơdrong Kră Yang kơnhăm wă đơ̆ng tơdrong lu sư chu pŭ iŏk pơmat tat noh pơm kơ tơdrong lui wơ̆ tŏk, mă-lei ‘bôh rơđah hơđăl dêh Tơdă Kră Yang hơmet noh lu bơngai tŏk-bŏk jang, pơm, na Tơdrong ‘Nao ‘Lơ̆ng hơtai wơ̆ tơpă. Yua kơ “lu bơngai mă tơklah tơklang noh đơ̆ng anih ‘nâu năm tơ anih nai bơtho ră roi Tơdrong ‘Nao ‘Lơ̆ng” (trong 4).
Tơdrong mă Khul Lui tơ pơlei Jêrusalem, đe pơm kơnê̆ noh bơih jơ năr trŏ ’blep wă kơ năm bơtho ră roi Tơdrong ‘Nao ‘Lơ̆ng wă pơklaih, chông ba lu bơngai brŏk tơ Kră Yang lơ hloh dơ̆ng. Tơdrong hil areh, pơm kơnê̆, ‘noh lĕch đơ̆ng jơhngơ̆m lu bơngai mă ayăt kơ tơdrong Kră Yang, mă-lei ‘Bok Kei-Dei kư̆m lê̆ tơdrong ‘noh truh mơ̆n ‘mơ̆i, păng Sư yua lu tơdrong đe pơm kơnê̆ noh wă pơih să Dêh char Sư. Tơdrong ‘noh hơtŏk thim ăn jơhngơ̆m lu bơngai lui pơ̆n nuih lăm tơdrong bơtho Nơ̆r Kră Yang păng ba ăn tơdrong pŭn hiôk chhôk ngă ‘nă hal kơ anih ayơ mă sơng iŏk Tơdrong ’Nao ’Lơ̆ng Kră Yang. Dang ei tơdrong lui, Tơdrong ‘Nao ‘Lơ̆ng, đe oei hơnơ̆ng kơ hil areh, pơm kơnê̆ đĕch tơ lơ anih lăm teh đak âu. Yua kơ đơ̆ng kon pơlei Kră Yang lui tơpă kơ Kră Yang iung arih đơ̆ng lôch, na lơ kon pơlei bơngai lui kơ Sư oei hơnơ̆ng yak năm hlôi đơ̆ng tơdrong pơlong wă bơtho ră roi Tơdrong ‘Nao ’Lơ̆ng mă năr hiôk tơproh ’bônh dah năr anat anot, đe mơ̆ng dah đe kuă kơ mơ̆ng. Kră Yang tŏk-bŏk oei pơgơ̆r, tơdrong gơh pơgơ̆r tih hloh noh chĕp lăm tơpang ti Sư. Sư oei pơgơ̆r tôm tơdrong đei tơ’bơ̆p ‘bơ̆t anăp bơ̆n, tăp tang kơ bơ̆n; na tơdă sư hơmet noh oei hơnơ̆ng đĕch ưh kơ đei la-yơ tơplih ôh. Dah rim ‘nu bơngai lui ling-lang tơchĕng‘blŏk kơ mưh đe kang hil areh pơm kơnê̆ noh tơdrong lui kang wơ̆ tŏk, na jơhngơ̆m kang hưch hanh bơtho ră roi Tơdrong ‘Nao’Lơ̆ng lei Tơdrong’Nao’Lơ̆ng gô hrĕnh tĕnh jah lanh să truh tơ jơ̆p jang teh đak.
Mưh tơ’bơ̆p tơdrong đe pơm kơnê̆, pơmat tat, pơlong lăng, bơ̆n hăm oei hơnơ̆ng kư̆ kơ bơtho ră roi Tơdrong ‘Nao ‘Lơ̆ng đĕch dah mă jơhngơ̆m bơ̆n bơ̆l hăl kơdŭn tơ rŏng?
Kơkuh kơ Ih ơ Kră Yang, apinh Ih ăn kơ inh mơsêh pran đơ̆ng Yang Bơhngol ’Lơ̆ng păng đei jơhngơ̆m pơ̆n nuih thoi lu bơngai lui blŭng a sơ̆ wă kơ inh kĕ hlôi đơ̆ng tơdrong pơlong, ling-lang tơnăp, kư̆ kơ bơtho ră roi Tơdrong ’Nao ‘Lơ̆ng dŏng pơklaih lơ bơngai mă khan tơ’bơ̆p tơdrong đe hil areh pơm kơnê̆ dah tơ’bơ̆p tơdrong anat kiơ truh ‘bơ̆t anăp. Inh krao khan yua anăn Kră Yang Yêsu Krist, Amen!
Đŏk Sơ̆p Hla bơar ‘Bok Kei-Dei lăm pêng sơnăm: I Samuel 5
Kênh Youtube BHKTHN:
