I Timautes 1:3-11
Nqe cim:
“Kuv xav kom koj nyob twjywm hauv lub nroog Efexus. Kuv twb xub ntuas koj li ntawd thaum kuv yuav mus rau pem lub xeev Makedaunias. Kuv xav kom koj nyob twjywm hauv, rau qhov muaj qee leej txivneej uas nyob hauv lub nroog Efexus qhia tej zaj uas tsis tseeb; yog li ntawd, koj yuav tsum txwv tsis txhob pub lawv qhia. Koj yuav tsum kom lawv muab tej dabneeg thiab lawv cov yawgkoob tej npe uas sau cia rau hauv ntawv uas lawv hais tsis paub tas ntawd tso tseg, rau qhov tej ntawd yuav ua rau sawvdaws muaj lus sib cav sib ceg xwb, pab tsis tau kom sawvdaws ua haum Vajtswv siab…” (I Timautes 1:3-4a)
Lus nug rau sawvdaws xav:
– Pawg Ntseeg Efexus tabtom ntsib teebmeem dabtsi?
– Vim li cas qhov uas tau tseg nyob hauv Efexus thiaj yog ib qho kev sim siab rau tus xibhwb hluas Timautes?
– Yuav ua li cas peb thiaj sawv ruaj khov tabmeeg tej kev ntseeg cuav?
Thaum sawv kev mus rau cheebtsam Makedaunias tshajtawm Txojmoo Zoo, Timthawj Paulus yeej paub zoo txog Pawg Ntseeg Efexus tej xwm txheej. Los ntawm ob lo lus “tsis txhob”, nws qhia peb paub txog tej xwm txheej uas muaj nyob qhov ntawd: Qhov xubthawj, “txwv qee leej kom tsis txhob qhia tej uas txawv peb qhia” (nqe 3b HMOWSV) qhia tau hais tias hauv Pawg Ntseeg Efexus muaj cov neeg tabtom qhia tej kev ntseeg yuam kev; qhov ob, “tsis txhob kub siab rau tej dab neeg thiab tej zaj uas hais txog poj koob yawm txwv tsis paub tag” (nqe 4 HMOWSV) qhia tau hais tias qee leej hauv Pawg Ntseeg raug poob rau hauv kev sib cav tsis muaj hnub kawg txog tej yam uas yeej tsis muaj nqis kiag li. Sau zog hais tias, Pawg Ntseeg Efexus tabtom ntsib kev nkag los ntawm kev ntseeg cuav thiab tej kev sib cav uas tsis muaj nqis. Nyob hauv lub tsamthawj zoo li ntawd, Timthawj Paulus pom tias nws tsis tsimnyog tshem nws cov neeg ua haujlwm tawm tag nrho mus, es ho tso cov ntseeg tshiab nyob qhov ntawd nrog kev ntxhov siab thiab sib cais. Vim li ntawd nws thiaj li txib nws tus tub hauv txojkev ntseeg uas yog Timautes kom “nyob twjywm hauv lub nroog Efexus”. Nws hais tias “Kuv twb xub ntuas koj li ntawd” (nqe 3) qhia tau hais tias nws yeej ib txwm thiab tseem ruaj siab rau qhov uas Timautes yuav tsum nyob twjywm hauv Efexus rau lub sijhawm no.
Lub homphiaj uas Timthawj Paulus txib kom Timautes nyob yog cia nyob cob qhia qee leej uas tsuas “xav ua xibhwb qhia Vajtswv txoj kevcai, tiamsis tej zaj uas lawv muaj siab tawv qhia ntawd lawv tsis totaub, tsis hais tej lus uas lawv hais thiab tej ntsiab lus los lawv yeej tsis paub” (nqe 7). Yuav tsum txwv lawv, vim hauv Pawg Ntseeg muaj qee leej “qhia tej zaj uas tsis tseeb”, thiab muaj cov uas nyiam sib cav txog tej yam uas tsis pab dabtsi rau kev ntseeg thiab kev loj hlob ntawm Pawg Ntseeg. Qhov no yog ib qho kev sim siab loj thiab yeej tsis yooj yim ua li, yog li ntawd Timthawj Paulus thiaj li qhia tus xibhwb hluas Timautes kom muaj siab tawv los tawmtsam tej kev ntseeg yuam kev ntawd, thiaj tiv thaiv tau pab yaj hauv Pawg Ntseeg (II Timautes 1:7).
Niaj hnub nimno, nyob hauv thiab sab nraud Pawg Ntseeg kuj tseem muaj ntau tus xibhwb cuav uas tabtom tshaj tawm tej kev ntseeg cuav kom ntxias cov ntseeg tseeb. Nyob saum xovxwm huabcua kuj tsis tsawg tej zaj qhia cuav uas muaj peevxwm ua rau tus Tswv cov menyuam txoj kev ntseeg raug yoj yees. Kev tiv thaiv kev ntseeg cuav tsis yog cov thawjcoj sab ntsujplig li feemxyuam xwb, tiamsis tseem yog txhua tus ntseeg li feemxyuam thiab. Peb tsis txhob khiav deb tej feemxyuam ntawd, es ho cia kev ntseeg cuav ua cuamtshuam Pawg Ntseeg txoj kev ntseeg thiab kev loj hlob, kuj tsis txhob mus sib cav tej yam tsis muaj nqis, tiamsis txhua tus yuav tsum tiv thaiv los ntawm kev npaj tus kheej kom muaj Vajtswv Txojlus ruaj khov, vamkhom Vaj Ntsujplig taw qhia kom paub qhov tseeb thiab qhov cuav. Ua li ntawd, peb tus kheej thiaj li sawv tau ruaj hauv kev ntseeg thiab pab tau lwm tus sawv ruaj thiab.
Thov Vajtswv,
Tus Tswv, thov pab kom nyuam yaus kawm Vajtswv Txojlus txhua hnub, kom nyuam yaus tau Vaj Ntsujplig taw qhia, thiab txiav txim siab tsis mloog tej kev ntseeg cuav uas cuam tshuam nyuam yaus txoj kev ntseeg Koj. Thov pab kom nyuam yaus niaj hnub raws Koj qab thiab ua Koj tes haujlwm. Nyuam yaus tuav Yexus Khetos lub npe thov, Amees.
Peb puas mob siab kawm Vajtswv Txojlus txhua hnub kom peb sawv ruaj khov tabmeeg tej kev ntseeg cuav lawm tau?
Nyeem Vajluskub hauv peb lub xyoos: II Xwmtxheej 31
Kênh Youtube BHKTHN:
