Klei Aê Diê Blŭ: I Y-Timôthê 1:3-11
Êlan kliăng: “Tui si kâo mtrŭt ih leh tơdah kâo nao kơ čar Masêdôn, brei ih ăt dôk ti ƀuôn Êphêsô čiăng kơ ih mtă kơ đa đa mnuih đăm mtô mta klei đăo mdê, leh anăn đăm mĭn ôh kơ klei yăl dliê đưm amâo sĭt leh anăn kơ klei răk anăn aê aduôn amâo thâo tuč. Klei anăn bi truh klei bi tăng…(I Y-Timôthê 1:3-4a)
Klei êmuh ksiêm mĭn: Ya klei Phung Sang Aê Diê ti Êphêsô dôk tuôm? Ya ngă bruă ăt lŏ dôk ti Êphêsô jing klei lông dlăng hŏng Khua pô mtô mda asei Y-Timôthê? Si ngă čiăng kơ drei dôk kjăp ti anăp klei mtô soh mơ̆ng klei đăo soh?
Hlăk êjai nao ti krĭng Masêdôn čiăng lŏ dơ̆ng hiu hưn klei đăo, Khua ƀĭng kna Y-Pôl thâo klă boh klei Phung Sang Aê Diê Êphêsô. Mơ̆ng dua boh blŭ “đăm”, ñu brei drei thâo boh klei tinăn: Tal sa, “đăm mtô mta klei đăo mdê” (êlan 3b) brei ƀuh ti Sang Aê Diê Êphêsô, mâo phung dôk mtô klei đăo soh; tal dua, “đăm mĭn ôh kơ klei yăl dliê đưm amâo sĭt leh anăn kơ klei răk anăn aê aduôn amâo thâo tuč” (êlan 4) brei ƀuh đa đa mnuih hlăm Sang Aê Diê lĕ hlăm klei bi tăng mgăl amâo mâo klei ruĕ ôh kơ klei amâo mâo yuôm. Klah čŭn, Phung Sang Aê Diê ti Êphêsô tlă anăp hŏng klei đăo soh mŭleh anăn klei bi tăng mgăl amâo tŭ dưn. Hlăm boh klei anăn, Khua ƀĭng kna Y-Pôl ƀuh amâo dưi ba wĭt jih ôh phung mă bruă hŏng ñu, huĭdah phung mrâo đăo tinăn lĕ hlăm klei rŭng răng leh anăn bi kah mbha, kyua anăn ñu mtă kơ anak ñu hlăm klei hdĭp myang jing Y-Timôthê “brei ih ăt dôk ti ƀuôn Êphêsô”. Ñu lač “Tui si kâo mtrŭt ih leh” anăn sa blư̆ dơ̆ng (êlan 3) brei ƀuh ñu ngă leh leh anăn ăt kjăp hŏng bruă Y-Timôthê čiăng snăk brei ăt dôk ti Êphêsô hlăm wưng anei.
Klei kñăm Khua ƀĭng kna Y-Pôl mtă kơ Y-Timôthê brei lŏ dôk jing čiăng mtô lač kơ phung knŏng “čiăng jing pô mtô klei bhiăn” ƀiădah “diñu amâo thâo săng ôh klei diñu pô lač” (êlan 7). Brei kăm ghă kyua Phung Sang Aê Diê mâo lu mnuih “mtô” klei đăo soh mkăn, phung khăp klei bi tăng mgăl kơ klei amâo đru ôh kơ klei đăo leh anăn klei đĭ kyar Phung Sang Aê Diê. Anei jing sa klei lông dlăng prŏng leh anăn ngă amâo ênưih ôh, anăn jing mta phŭn Khua ƀĭng kna Y-Pôl mtă kơ Khua pô mtô mda asei Y-Timôthê brei mâo klei ktang bi kdơ̆ng hŏng klei mtô soh čiăng răng mgang phung biăp hlăm Phung Sang Aê Diê (II Y-Timôthê 1:7).
Hruê anei, hlăm lam leh anăn ti êngao Phung Sang Aê Diê ăt mâo lu phung mtô soh hiu mtô kơ klei soh čhuai čiăng ktŭng lu phung đăo. Hlăm kdrăp hâo hưn ăt kăn kƀah mơh klei mtô mơ̆ng klei đăo soh čiăng bi mgei klei đăo phung ƀuôn sang Aê Diê. Bruă klam bi kdơ̆ng hŏng klei đăo soh amâo djŏ knŏng jing bruă klam khua kiă kriê klei hdĭp myang ôh ƀiădah wăt jing bruă klam kơ grăp čô phung đăo kơ Krist. Drei amâo dưi ñĕ đuĕ ôh kơ bruă klam lui klei đăo soh ngă bi hmăi kơ klei đăo leh anăn klei đĭ kyar Phung Sang Aê Diê, ăt kăn bi tăng mgăl hơăi mang rei, ƀiădah grăp čô mnuih brei bi kdơ̆ng hŏng klei anăn, hŏng klei mprăp kơ drei Klei Aê Diê Blŭ bi kjăp, knang kơ Yang Mngăt Jăk mtrang mngač čiăng thâo kral klei djŏ klei soh. Hŏng klei anăn drei pô dưi dôk kjăp hlăm klei đăo leh anăn dưi đru wăt kơ pô mkăn.
Drei gĭr hriăm Klei Aê Diê Blŭ hrăm hruê čiăng dôk kjăp ti anăp klei mtô soh čhuai mơ̆?
Wah lač: Ơ Khua Yang, akâo kơ Ih brei kâo hriăm Klei Aê Diê Blŭ hrăm hruê čiăng kơ kâo mâo Yang Mngăt Jăk mtrang, amâo hmư̆ hluê ya klei mtô soh ngă hmăi kơ klei đăo hlăm Khua Yang. Akâo kơ Ih đru kâo êbat kjăp tui hlue Khua Yang leh anăn mă bruă kơ Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 31
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
