Mathais 10:34-39
Nqe cim:
“Tus uas khuvxim nws txojsia, tus ntawd yuav tsis tau txojsia, tiamsis tus uas tsis khuvxim nws txojsia, vim nws ntseeg kuv, tus ntawd yuav tau txojsia” (Mathais 10:39).
Lus nug rau sawvdaws xav:
- Tswv Yexus hais tias Nws nqa dab tsi los hauv ntiajteb?
- Vim li cas Tswv Yexus thiaj hais li ntawd?
- Tswv Yexus xav kom Nws cov thwjtim muaj lub siab zoo li cas?
- Peb tab tom ua neej nrog tus Tswv mus zoo li cas?
Tswv Yexus yog tus Tswv thajyeeb (Yaxayas 9:6), tiamsis ua cas Nws ho hais tias “kuv tsis coj kev thajyeeb los, tiamsis kuv coj rab ntaj los”? Tswv Yexus tab tom hais txog kev sib cav sib ceg, sib cais ntawm tus ntseeg thiab tus tsis ntseeg Yexus. Tswv Yexus kuj qhia ua ntej lawm hais tias, tej no yuav muaj loj heev, vim siv lo lus “coj ntaj los” yog hais txog kev ua tsov rog, yuav tsum tawm tsam thiaj tso tau cov uas yus hlub tseg los nrog tus Tswv mus. Lo lus “cais tawm” yog muab tshem rau ib cag, hais txog yuav muaj kev sib faib hauv lub tsev neeg ntawm tus ntseeg thiab tus tsis ntseeg, yuav raug poob ntau yam thaum los nrog tus Tswv mus. Tej zaum tus uas los ntseeg Yexus lawm, lawv tus yeebncuab yog lawv tsev neeg ntag, tsis yog yuav ua rau tus ntseeg tu siab xwb, tseem tsimtxom tus ntseeg Yexus sab nqaij tawv thiab.
Tswv Yexus xav pom Nws cov thwjtim ua ob yam li no: Tim ib, lawv yuav tsum hlub tus Tswv tas siab ntsws, tsis txhob pub ib yam dab tsi los txeeb tau lawv nplooj siab hlub tus Tswv thiab kev ua tej haujlwm uas tus Tswv txib (nqe 37). Tim ob, tas siab ntsws tiv kev txomnyem vim tus Tswv lub npe, tso tau txhua yam tseg mus ua tus Tswv haujlwm (nqe 38). Tiv kev txomnyem nrog tus Tswv tsis yog yoo tshaib yoo nqhis tsis muaj noj hnav xwb, tej zaum tseem raug tuag vim tus Tswv lub npe thiab. Peb yog cov uas nrog tus Tswv mus yuav tsum paub hais tias, yog peb vuag rau lub ntiajteb, peb yuav tsis tau txais tej yam zoo kawg nkaus uas tus Tswv muab pub rau peb tiam no thiab lwm tiam tom ntej (nqe 39).
Cov ntseeg niaj hnub nimno ib txhia tsis xav cais tawm ntawm lwm tus lossis lub ntiajteb tshai tsam tsis muaj phoojywg. Tej zaum yog los ntawm tej kev xav li no, peb thiaj ua tsis tau lub neej zoo puv ntoob pub rau tus Tswv. Thiab kuj vim tsis txiav txim siab cais tawm peb thiaj tsis tas siab ua tus Tswv haujlwm. Tej zaum peb ua tibneeg qia dub, xav ceev tej yam uas sib raug zoo hauv lub neej dhau los kom tau zoo rau yus sab nqaij tawv, thiab ceev kom yus txoj sia txhob tu. Tswv Yexus ceebtoom hais tias, yog tsis cais tawm ua rau peb mus kev tsis tus, thiab yeej tsis tau dab tsi hauv ntiajteb, kuj tsis tau dab tsi ntawm Vajtswv ib yam nkaus. Yog peb txiav txim siab ua neej cais tawm, tej zaum peb yuav ntsib kev tawm tsam, raug kev tsimtxom los ntawm peb tsev neeg, tiamsis peb yuav tau txais txojsia ib txhis. Thiab peb lub neej yuav muaj sijhawm pab tau peb tej txheeb ze thiab lwm tus. (Tes Haujlwm 16:31).
Thov Vajtswv,
Tus Tswv, nyuam yaus tas siab hlub Koj. Thov pab nyuam yaus txiav txim siab cais tawm ntawm txhua yam, ua lub neej tiv kev txomnyem nrog Koj mus thiab ua Koj tes haujlwm. Amees.
Peb puas ua lub neej cais tawm raws li tus qhia lawm tau?
Nyeem Vajluskub hauv peb lub xyoo: Pajlug 24
Kênh Youtube BHKTHN:
