Lukas 11:1-13
Nqe cim:
“Yexus hais rau nws cov thwjtim hais tias, “Thaum nej thov Vajtswv, nej hais li no:‘Leej Txiv: Thov kom sawvdaws hwm koj lub npe; thov koj los kav neeg lub siab.” (Lukas 11:2)
Lus nug rau sawvdaws xav:
– Tswv Yexus qhia Nws cov thwjtim thov Vajtswv los ntawm lub npe twg?
– Lub npe no muaj lub ntsiab dab tsi rau tus thov Vajtswv?
– Zaj kawm no pab peb hloov pauv dab tsi hauv kev thov Vajtswv?
Yam tseemceeb tshaj plaws thaum thov Vajtswv yog Tus uas peb yuav taij thov, tus uas peb tabtom thov yog leejtwg? Tseeb tiag yeej yog thov nrog Vajtswv. Tiamsis Vajtswv tus uas peb tabtom thov yog Tus zoo li cas?
Hauv zaj lus thov Vajtswv Tswv Yexus qhia (nqe 1-4), Yuav tau lees hu Vajtswv yog Leej Txiv, thiab hauv nqe 13, Tswv Yexus rov qhia meej qhov tseeb tseemceeb no dua ib zaug ntxiv. Tus neeg zej zog hauv zaj lus pivtxwv ntawd pub rau nws tus phoojywg txais ncuav vim raug nws tus phoojywg txob nws, tiamsis Vajtswv yog tus muaj kev hlub, Nws npaj txhij yuav muab yam zoo kawg nkaus pub rau Nws cov menyuam (nqe 11-13). Tus sau Ntawv Nkauj 116:2 hais tias: “Txhua zaus uas kuv thov nws, nws mloog kuv tej lus thov”. Leej Txiv tsis yog tsuas mloog peb tej lus thov xwb, tiamsis Nws tseem “tig pob ntseg los mloog” yog ib qho uas qhia tshwm Nws kev hmov tshua peb.
Vajtswv yog Leej Txiv ces tus thov Vajtswv yog Nws menyuam, vim li ntawd, kev thov Vajtswv yog tes haujlwm ib txwm muaj hauv lub tsev neeg sib txuas lus ntawm cov menyuam thiab Leej Txiv. Yog menyuam lawm yuavtsum tau thov Vajtswv uas yog Leej Txiv thiab nov yog yam uas Tswv Yexus nqua hu (Yauhas 16:24).
Vajtswv yog Leej Txiv muaj kev hlub vim li ntawd tsis muaj dab tsi yuav txhawj, yuav ntshai lossis yuav zais thaum mus thov Vajtswv. Tus uas mus txais ncuav nws paub tseeb nws cheemtsum dab tsi thiab mus txais nws phoojywg zej zog peb lub ncuav. Tus menyuam hauv zaj lus pivtxwv kuj mus thov leej txiv ncuav thiab ntses yog yam uas cheemtsum meej tseeb thiab tsimnyog (nqe 11-12). Peb txhua tus yuavtsum thov Vajtswv tej yam uas meej tseeb. Txawm li ntawd los lub ntsiab tsis tau hais tias taij Vajtswv teb kom tau yam uas yus thov, tiamsis vim Vajtswv yog Leej Txiv peb ntseeg hais tias Nws yuav pub yam uas zoo kawg nkaus rau peb.
Vim Vajtswv yog Leej Txiv peb yuavtsum thov tseeb tiag tiag thaum uas thov Vajtswv. Tus tswv tsev thov tus phoojywg zej zog peb lub ncuav vim ntawd yog kev cheemtsum tiag tiag, thiab nws tus cwjpwm ua siab ntev thov qhia pom hais tias nws ntshaw kom tau txais yam uas nws thov. Puas muaj tej thaum uas peb thov Vajtswv tiamsis peb yeej tsis muaj lub siab ntshaw kom Vajtswv pub tiag tiag qhov uas peb thov? Augustine yog ib tug tibneeg muaj koob nto npe hauv Koom Haum Kev Ntseeg, nws qhia paub hais tias thaum tseem hluas, thaum uas ua yam zoo, nws txawm ntshaw ua yam phem, thiab thaum ua yam phem, nws txawm ntshaw ua yam zoo! Nws piav qhov uas nws pheej thov Vajtswv: “Vajtswv, thov ntxuav kom nyuam yaus dawbhuv; thov ntxuav kom nyuam yaus dawbhuv”. Tiamsis nws txawm hais lus ntxhis hais tias: “tiamsis tsis yog lub sijhawm no, tsis tau yog!”. Augustine tabtom thov Vajtswv pab nws tiamsis tsis xav kom qhov ntawd tshwm kiag rau nws lub sijhawm ntawd. Peb txhua tus yuavtsum thov Vajtswv hloov peb lub siab, kom peb thiaj li muaj lub siab ntshaw ua raws li tej yam uas Nws xav kom peb ua.
Thov Vajtswv,
Vajtswv, nyuam yaus ua Koj tsaug uas tau pub nyuam yaus los ua Koj menyuam, Koj ibtxwm hlub thiab mloog nyuam yaus tej lus thov. Ua tsaug rau Koj yog Tus uas ibtxwm zoo thiab pub rau nyuam yaus tej yam uas zoo tshaj plaws raws li Koj lub siab nyiam. Nyuam yaus tuav Tswv Yexus Khetos lub npe thov, Amees.
Vajtswv yog leejtwg thiab tabtom muaj txoj kev sib txuas twg nrog peb?
Nyeem Vajluskub hauv peb lub xyoos: Yaxayas 32
Kênh Youtube BHKTHN:
