Klei Aê Diê Blŭ: Y-Luk 11:1-13
Êlan kliăng: “Yêsu lač kơ diñu, “Tơdah diih wah lač, lač snei: ‘Ơ Ama, brei anăn Ih mâo klei mpŭ. Brei ƀuôn ala mtao Ih truh.” (Y-Luk 11:2)
Klei êmuh ksiêm mĭn: Khua Yang Yêsu mtô phung ƀĭng kna wah lač kơ Aê Diê hŏng si Anăn iêô? Si klei mblang kơ Anăn iêô anei hŏng pô wah lač? Klei hriăm anei đru drei ya klei čiăng bi mlih hlăm klei drei wah lač?
Klei yuôm hĭn tơdah wah lač jing hŏng Pô drei wah lač, drei dôk wah lač hŏng hlei pô. Sĭt nik hŏng Aê Diê yơh. Ƀiădah Aê Diê drei dôk wah lač anăn, si Pô Ñu jing?
Hlăm klei wah lač Khua Yang Yêsu mtô (êlan 1-4), brei iêô Ama kơ Aê Diê, leh anăn hlăm êlan 13 Ñu lŏ bi klă sa blư̆ mơh klei sĭt nik yuôm bhăn anei. Pô riêng gah hlăm klei blŭ bi hriêng anei brei mah jiăng ñu čan klŏ kpŭng hŏng klei mgô̆ mơan, kyuadah gơ̆ bi kpăk ñu, ƀiădah Aê Diê jing Ama klei khăp kăp thiê brei klei jăk hĭn kơ phung anak Ñu (êlan 11-13). Pô čih Klei Mmuñ Hđăp 116:2 čih snei: “Kyuadah Ñu mđing leh knga Ñu kơ kâo, kâo srăng iêô wah lač kơ Ñu jih hruê kâo dôk hdĭp.”. Ama amâo knŏng hmư̆ klei kwưh akâo, ƀiădah wăt dôk “mđing knga”, sa mta bruă ngă bi êdah klei dôk uêñ mĭn.
Aê Diê jing Ama snăn pô wah lač jing phung anak Ñu yơh, kyuanăn wah lač jing sa mta bruă bhiăn ngă yơh hlăm gŏ sang hlăm klei bi mguôp Ama – anak. Jing leh anak Aê Diê snăn brei drei wah lač hŏng Ñu yơh, leh anăn anei jing klei Khua Yang Yêsu iêô mthưr (Y-Yôhan 16:24).
Aê Diê jing Ama klei khăp snăn drei amâo lŏ rŭng răng, huĭ hyưt amâodah mâo klei mdăp ôh tơdah wah lač hŏng Ñu. Pô čan klŏ kpŭng thâo klă ya klei ñu čiăng leh anăn nao akâo čan kơ mah jiăng ñu tlâo klŏ kpŭng. Anak hlăm klei blŭ bi hriêng ăt akâo kơ ama ñu klŏ kpŭng leh anăn kan msĕ mơh, jing klei čiăng sĭt êmĭt leh anăn năng (êlan 11-12). Brei grăp čô drei akâo mta klei sĭt êmĭt kơ Aê Diê. Ƀiădah lĕ, klei anăn amâo djŏ ôh brei Khua Yang wĭt lač djŏ tui si klei drei akâo, ƀiădah kyua Ñu jing Ama kyuanăn drei đăo kơ Ñu brei kơ drei klei jăk hĭn nanao.
Kyuadah Aê Diê jing Ama kyuanăn brei drei wah lač hŏng ai tiê sĭt kpă. Pô khua sang akâo kơ pô riêng gah brei čan tlâo klŏ kpŭng kyuadah anăn jing klei gơ̆ dôk čiăng sĭt , leh anăn klei gơ̆ dôk gĭr, bi êdah anei jing klei gơ̆ hmăng hmưi čiăng mâo klei wĭt lač. Drei tuôm mơ̆ wah lač ƀiădah amâo sĭt ai tiê hmăng hmưi Khua Yang brei klei drei akâo ôh? Augustine jing sa čô hing ang hlăm Phung Sang Aê Diê, ñu brei thâo êjai hlăk hđeh, tơdah ngă bruă jăk, ñu čiăng ngă klei jhat; leh anăn tơdah ngă klei jhat, ñu lŏ čiăng snăk ngă klei jăk! Ñu yăl klei ñu mưng wah lač snei: “Ơ Khua Yang, akâo Ih bi doh kâo; akâo kơ Ih brei kâo dưi jing doh jăk”. Ƀiădah ñu lŏ blŭ thiăm djơ djĕ: “ ƀiădah amâo djŏ ară anei ôh, ka ôh!” Augustine dôk akâo kơ Khua Yang đru ñu ƀiădah kăn čiăng mơh klei anăn truh mmông anăn. Grăp čô drei brei wah lač akâo kơ Khua Yang bi mlih ai tiê drei, čiăng mâo klei êpa mhao kơ klei Ñu čiăng kơ drei jing.
Hlei Pô Aê Diê jing, leh anăn si klei bi mguôp Ñu mâo hŏng drei?
Wah lač: Ơ Khua Yang, bi mni kơ Khua Yang brei kâo jing Anak Ih. Bi mni lač jăk kơ Khua Yang kyua khăp kơ kâo nanao leh anăn dôk mđing knga čiăng hmư̆ klei kâo wah lač. Bi mni lač kơ Khua Yang kyua Ih jing jăk leh anăn thiê brei kơ kâo klei jăk hĭn tui si klei Ih čiăng. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 32
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
