Klei Aê Diê Blŭ: Rôm 6:1-14
Êlan kliăng: “Snăn brei diih msĕ mơh yap diih pô djiê leh kơ klei soh, leh anăn dôk hdĭp kơ Aê Diê hlăm Krist Yêsu” (Rôm 6:11)
Klei êmuh ksiêm mĭn: Klei mĭn “Drei srăng ăt ngă klei soh čiăng dưi mâo klei pap lu êbeh” ti anôk soh? Si sa čô hdĭp tơdah dưi jing sa hŏng Khua Yang Yêsu ? Si ih hdĭp čiăng bi êdah Khua Yang kbiă lŏ hdĭp leh, leh anăn dôk hdĭp hlăm ih ?
Leh lač kơ klei pap Aê Diê êbeh dlai čiăng pap brei klei soh leh anăn brei klei hdĭp lă lar kơ phung đăo (Rôm 5:20-21), Khua ƀĭng kna Y-Pôl gang mkhư̆ klei mĭn “Drei srăng ăt ngă klei soh čiăng dưi mâo klei pap lu êbeh”. Mta phŭn kyua phung đăo kơ Aê Diê amâo lŏ jing hlŭn kơ klei soh ôh! Hlŭn hđăp djiê leh kyua klei ngă Ƀaptem hlăm Khua Yang Yêsu leh (êlan 2-3). Ară anei, phung đăo kơ Khua Yang dưi êngiê čiăng hdĭp kyua anăn đăm brei klei soh kiă kriê ôh (êlan 11-12).
Khua Yang Yêsu mtô hlăm Y-Yôhan 8:34-44 tơdah leh amĭ kkiêng drei jing LEH hlŭn kơ klei soh, leh anăn klă sĭt yang jhat mplư čiăng drei ngă soh. Ai ktang yang jhat prŏng tơl ktŭng arăng ngă soh, jing hlŭn kơ ñu leh anăn dleh dưi tlaih. Kyua anăn, đa đa phung đăo ti Rôm tuh lư kơ knuih jing hlŭn kơ klei soh leh anăn kyua klei pap êbeh dlai anăn… lŏ dơ̆ng ngă soh ! Ƀiădah Khua ƀĭng kna Y-Yôhan lač, klei sĭt nik jing Klei Aê Diê Blŭ, srăng bi mtlaih phung tui hlue Ñu kbiă mơ̆ng hlŭn kơ klei soh, “diih srăng thâo klei sĭt nik, leh anăn klei sĭt nik srăng bi êngiê diih” msĕ si Y-Ađam êlâo kơ lĕ hlăm klei soh (Y-Yôhan 8:31-32, 36).
Tinei, Khua ƀĭng kna Y-Pôl mblang, tơdah drei dưi jing sa hŏng klei djiê Khua Yang hlăm klei đăo leh anăn tŭ Ƀaptem snăn drei amâo lŏ mâo klei soh kiă kriê ôh ƀiădah jing êngiê leh! Amâo lŏ mâo mta phŭn lŏ tuh lư tơdah mâo klei soh ôh. Khua ƀĭng kna Y-Pôl tuôm lač kơ knuih hdĭp bi kdơ̆ng hŏng klei Khua Yang săn asei: “Kyuadah tui si kâo blŭ leh jêñ jêñ kơ diih, leh anăn lŏ blŭ ară anei hŏng klei hia, mâo lu phung hdĭp msĕ si phung roh hŏng kyâo bi kal Krist” (Philip 3:18). Hơăi! Drei jing leh sa hŏng Khua Yang Yêsu hlăm klei kbiă lŏ hdĭp leh anăn “jing msĕ si phung mnuih kbiă lŏ hdĭp” (êlan 13), klei hdĭp hlăk dưi “mdăp” hlăm Yang Krist (Kôlôs 3:3), jing drei mâo klei dưi hdĭp leh anăn brei hdĭp doh jăk kơ Khua Yang.
Tơdah drei yap drei pô dôk hdĭp kơ Khua Yang snăn tal sa, yap “diih pô djiê leh kơ klei soh, leh anăn dôk hdĭp kơ Aê Diê hlăm Krist Yêsu” (êlan 11)̆; tal dua, đăm “brei klei soh kiă kriê hlăm asei mlei thâo djiê diih ôh”, tal tlâo, đăm “čiăng mgô̆ diih gưt kơ klei ñu tluh” leh anăn “Đăm jao jơ̆ng kngan diih kơ klei soh jing mnơ̆ng klei wê yua ôh” (êlan 12-13)̆; tal pă, “ jao jơ̆ng kngan diih kơ Aê Diê jing mnơ̆ng klei kpă ênô yua” (êlan 13). Akâo kơ Khua Yang đru drei hdĭp kơ Ñu mphŭn mơ̆ng yan bi hdơr hruê Khua Yang Kbiă Lŏ Hdĭp thŭn anei.
Ya klei bi knăl brei ƀuh Khua Yang dôk hdĭp hlăm drei mơ̆?
Wah lač: Ơ Ama Doh Jăk! Kâo bi mni kơ Ih kyua Ih brei tŭ leh klei arăng pơ̆ng ti kyâo bi kal mnuih hđăp hlŭn kơ klei soh kâo leh anăn brei kơ kâo klei hdĭp mơ̆ng Khua Yang Yêsu Kbiă Lŏ Hdĭp. Kâo myơr jih jơ̆ng kngan kâo jing mnơ̆ng pioh yua kơ klei kpă ênô čiăng kơ pô mkăn ƀuh Khua Yang hdĭp hlăm kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Kbiă 37
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
