Gia-cơ 2:18-19
“Lu iĕm mơ’nah khan lui đĕch kư̆m klaih mơ̆n hă? Iĕm kư̆ kơ lui đei minh pôm Kră Yang ‘Bok Kei-Dei đĕch, trŏ boih, lu yang kơnê̆ kư̆m lui thoi noh mơ̆n, lu sư hli tơrơ kơ ‘Bok Kei-Dei tơpă.” (Yakơ 2:19)
Nơ̆r jet tơchĕng pơwao:
– Sơ̆p hla bơar ‘Bok Kei-Dei tơbăt kơ bơ̆n yang kơnê̆ noh bu?
– ‘Bok Yakơ đei tơbăt kơ bơ̆n yang kơnê̆ lu kơ ‘Bok Kei-Dei thoi yơ?
– Lu bơ̆n đei pơhrăm tơblŏk kơ bơ̆n gah tơdrong lui tơpăt sĭt?
Chih gah tơdrong lui kơ khul bơngai lui, ‘bok Yakơ đei tơbăt ăn kơ bơ̆n tơdrong hlĭch. Hơdrol kơ ‘noh, sư đei bơtho tơbăt ăn kơ bơ̆n ưh kơ đei tơdrong lui lei lăi, yua kơ đei đon lui nhen thoi lôch, ưh kơ đei gơh dŏng bơngai bu. Lăm Sơ̆p hla bơar ‘nâu, sư đei roi kơ bơ̆n tơdrong tơpă thoi âu dơ̆ng, noh jơ̆ yang kơnê̆ kŭm đei jơhngơ̆m lui. Anăn “yang kơnê̆” noh jơ̆ lu yang, đei tơdrong pran hloh kơ kon bơngai bơ̆n mă lei lu sư hơla kơ ‘Bok Kei-Dei. Yang kơnê̆ noh jơ̆ đơ̆ng lu linh jang pơ̆k huŏng, ayăt hăm ‘Bok Kei-Dei, pơrăm tơdrong jang ‘Bok Kei-Dei, wă pơhlŭ kon bơngai bơ̆n weh ataih đơ̆ng ‘Bok Kei-Dei. Sơ̆p hla bơar nơ̆r ‘Bok Kei-Dei tơbăt ăn kơ bơ̆n tuch luch kơ yang kơnê̆ ‘noh jơ̆ lăm dơnâu ŭnh ling lang (Tơbôh 20:10)
‘Bok Yakơ đei tơbăt ăn kơ bơ̆n yang kơnê̆ kŭm dai lui kơ đei “minh ‘Bok Kei-Dei”. Mă lei lăm teh đak âu đei lui kơ lơ yang phara pha, lu bơngai Israel đei bơtho lăp minh ‘Bok Kei-Dei đĕch păng a-năn sư noh Yêhôwa, đei chih lăm Bơtho Khôi Juăt 6:4 “’Ơ đĭ-đăng bơngai Isơrael mơ̆ng bĕ: Kră Yang ‘Bok Kei-Dei bơ̆n, Kră Yang minh đĕch, ưh kơ đei ‘bar”. Yang kơnê̆ băt kơ tơdrong âu hăm dôm tơdrong nai mă trŏ kơ Kră Yang ‘Bok Kei-Dei đei tơpă, lu sư băt kơ Kră Yang Yêsu noh jơ̆ Yang, băt kơ đei tơdrong sek tơlang tuch luch kơnh, Plei ‘lơ̆ng păng dơnâu ŭnh…’Bok Yakơ đei chih tơbăt yang kơnê̆ ưh kơ trŏ hơdrô̆ kơ tơdrong hlôh băt đĕch ôh, mă lei lu sư kŭm “hli tơrơ” hai mơ̆n. Wă khan yang kơnê̆ ưh kơ trŏ hơdrô̆ kơ băt đĕch mă lei kŭm mơn. Mă lei tơdrong băt lu yang kơnê̆ noh ưh kơ đei ba ăn tơdrong dŏng pơklaih ôh mă lu sư ning mônh ‘Bok Kei-Dei gô phak lu sư lăm dơnâu ŭnh yua kơ lu sư ling lang kơ ayăt hăm ‘Bok Kei-Dei.
Lu bơ̆n athei apinh lăng kơdih bơ̆n hăm lui kơ đei ‘Bok Kei-Dei thoi yang kơnê̆ ưh? Gah tơdrong hlôh băt, mă bơ̆n đei hŏk pơhrăm lơ tơdrong yang, lăm tơdrong lui tơm gĭt kăl, thuơk trong tơm lơ. Gah tơdrong băt mơn, rim wơ̆t bơ̆n tơblŏk kơ tơdrong Kră Yang chu pơmat chu lôch, lu bơ̆n đei lĕch đak măt, rim wơ̆t bơ̆n tơchĕng đei tơdrong pơmat ling lang lăm dơnâu ŭnh, lu bơ̆n đei kral, tơ chĕng tơtăm. Mă lei tơdrong arih bơ̆n thoi yơ? Hăm trŏ kơ bơ̆n arih tơƀôh kơ bơ̆n chăl arih hli yom, lei mă chăl arih bơ̆n ling lang kơ ayăt hăm Kră Yang? Lăm tơdrong oei kơ ƀah kơ đon lui lu yang kơnê̆ noh jơ̆ ưh kơ chu yom pơm kiơ̆ nơ̆r ‘Bok Kei-Dei. Noh jơ̆ hăm trŏ kơ tơdrong mă bơ̆n oei kơƀah păng tơ’bôh kơ lăm chăl arih bơ̆n rim năr ưh? Đon lui trŏ noh jơ̆ băt kơ Kră Yang lăm đon bơ̆n, jơhngơ̆m mêm kơ Kră Yang, păng arih yua kơ Kră Yang. Apinh Kră Yang tơgŭm bơ̆n đĭ jơhngơ̆m lui gơnang, pơm kiơ̆ nơ̆r ‘Bok Kei-Dei ưh kơ trŏ kơ mơ̆ng đĕch ôh.
Ơ Kră Yang, pơhrăm gah yang kơnê̆ tơgŭm inh lăng tơdrong lui inh kơdih. Apinh dŏng inh lăm đon lui inh ưh kơ trŏ minh tơdrong hlôh băt, mơn đĕch mă lei ăn kơ inh đei tơdrong chu yom, minh chăl arih trŏ hăm đon lui, minh tơdrong arih tơ’bôh kơ jơhngơ̆m ‘mêm kơ Kră Yang lăm tơdrong dŏng pơklaih mă Ih đei ăn bơih kơ inh. Yua anăn Kră Yang Yêsu Krsit, Amen!
Tơdrong tơ’bôh sĭt kiơ ăn kơ lu bơ̆n ưh kơ lui thoi yang kơnê̆ lui?
Đŏk Sơ̆p Hla bơar ‘Bok Kei-Dei lăm pêng sơnăm: Luka 18
Kênh Youtube BHKTHN:
https://www.youtube.com/c/bhkthn
