Klei Aê Diê Blŭ: Klei Mtô Mñă Klei Bhiăn 30:11-20
Êlan kliăng: “Kyuadah klei mtă anei kâo brei kơ diih hruê anei amâo jing dleh đei kơ diih ôh, kăn ñu jing kbưi rei. Ñu amâo dôk hlăm adiê ôh tơl diih lač, ‘Hlei srăng đĭ brei kơ drei kơ adiê leh anăn djă ba gơ̆ kơ drei, čiăng kơ drei dưi hmư̆ leh anăn tui hlue klei anăn?” (Klei Mtô Mñă Klei Bhiăn 30:11-12)
Klei êmuh ksiêm mĭn: Si Y-Môis mñă kơ phung ƀuôn sang Ñu brei hdĭp? Ñu brei thâo klei bi mklă hlue ngă amâodah hơăi srăng atăt kơ si klei mâo? Si ngă čiăng kơ drei dưi hdĭp hlue si Klei Aê Diê Blŭ mtô?
Mphŭn pŏk kdrêč 30, Y-Môis lač hŏng phung ƀuôn sang Aê Diê lač klei pap Aê Diê djăp prŏng čiăng jang kngan drông digơ̆ tơdah digơ̆ hƀlŏk leh anăn lăm lui êlan klei soh. Amâo djŏ ñu mtrŭt mjhar phung ƀuôn sang Aê Diê hdĭp soh nanao ôh kyua klei khăp Aê Diê brei kơ diñu jing hlŏng lar, ƀiădah, mphŭn mơ̆ng êlan 11, Y-Môis amâo mdei mñă kơ phung ƀuôn sang Israel brei hdĭp hlue si klei bhiăn Aê Diê. Ñu bi mklă klei Aê Diê Mtô amâo djŏ jing dleh đei ôh amâodah kbưi đei tơl phung ƀuôn sang Ñu amâo dưi hlue ngă ôh. Ƀiădah klei anăn giăm snăk, hlăm lam ƀăng êgei leh anăn hlăm ai tiê phung ƀuôn sang čiăng hlue ngă.
Y-Môis čiăng lač hŏng phung ƀuôn sang Aê Diê bruă hdĭp hlue si klei bhiăn Aê Diê amâo djŏ jing klei anăn êgao hnơ̆ng mơ̆ng phung ƀuôn sang ôh, ƀiădah dôk hlăm klei dưi diñu. Kyua anăn phung ƀuôn sang Israel gưt hlue si klei bhiăn Aê Diê mơ̆ amâodah hlue si klei mĭn grăp čô, ƀiădah grăp čô brei đua klam kơ klei pô ruah. Klei ruah hlue ngă amâodah tlaih srăng atăt kơ dua klei mdê mdê, mâo klei jăk mơak amâodah klei arăng tăm pah.
Klei mtô hlăm trăn Klei Aê Diê Blŭ anei mñă kơ grăp čô phung đăo snei, klei hdĭp leh anăn hlue ngă Klei Aê Diê Blŭ dôk hlăm kngan leh anăn klei dưi mơ̆ng grăp čô. Kyua anăn, bruă phŭn jing klei drei ruah amâo djŏ kyua Klei Aê Diê Blŭ dleh đei amâo mâo mnuih dưi hlue ngă ôh. Brei kăp dlăng anăn knŏng jing klei satan mplư čiăng kơ drei hmư̆ amâo hlue ngă ôh msĕ si mnuih mdơ̆ng sang ti dlông lăn čuah (Y-Mathiơ 7:24-27).
Ya klei Khua Yang mtă kơ phung ƀuôn sang Ñu amâo djŏ jing klei hriăm dleh hlue ngă ôh. Khua Yang thâo drei êdu awăt, ƀiădah knŏng čiăng drei mâo ai tiê myơr jih klei êdu awăt pô kơ Khua Yang, hưn hŏng Ñu drei čiăng hdĭp hlue si Klei Aê Diê Blŭ mtô, gưt hlue si Klei Aê Diê Blŭ ti anăp klei bi blah klei jăk hŏng klei jhat grăp hruê hlăm klei hdĭp, klă sĭt Khua Yang srăng thiăm ai ktang hlăm klei êdu awăt grăp čô čiăng drei mâo djăp klei đăo jhŏng hdĭp mdê hŏng hnơ̆ng čuăn lăn ala, tŭ ư kơ klei luč ti lăn ala, leh anăn đăo kơ klei ƀuăn sĭt suôr Khua Yang čiăng hdĭp leh anăn hlue ngă Klei Aê Diê Blŭ mtô. “Snăn ruah bĕ klei hdĭp, čiăng kơ diih leh anăn phung anak čô diih dưi dôk hdĭp” (êlan 19). Akâo kơ Khua Yang đru drei hưn hŏng Ñu snei, kâo gĭr hdĭp hlue si klei Khua Yang čiăng, wăt tơdah si klei mâo ăt kăn hmăi mơh kơ klei kâo ruah.
Hlăm ya boh klei drei khăng lač klei Khua Yang mtă dleh đei čiăng amâo hlue ngă?
Wah lač: Ơ Khua Yang, jing Pô brei Klei Blŭ Hdĭp kơ kâo hlue ngă. Akâo kơ Ih đru kâo wăt ya klei mâo ăt bi mklă hdĭp hlue si klei Ih čiăng. Akâo kơ Khua Yang đru kâo thâo kơ klei hriê kơ prŏng hlăm klei đăo hlăm thŭn mlan êbat hlăm êlan Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Phung Khua Phat Kđi 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
