2 Kevcai 30:11-20
Nqe cim:
“Tej kevcai uas hnub no kuv qhia rau nej, nej tsis txhob xav hais tias nyuaj thiab coj tsis tau. 12Tej kevcai no tsis yog nyob saum ntuj. Tsis tas nej yuav nug hais tias, ‘Leejtwg yuav nce mus muab los rau peb, kom peb thiaj hnov thiab coj raws li ntawd??” (2Kevcai 30:11-12)
Lus nug rau sawvdaws xav:
– Mauxes ntuas Vajtswv haivneeg yuav tsum ua neej zoo li cas?
– Nws qhia paub kev txiav txim siab ua raws thiab tsis ua mus txog thaum kawg yuav zoo li cas?
– Ua li cas kom peb thiaj yuav tau raws Vajtswv Txojlus qhia?
Qhib thawj hauv nqe 30, Mauxes hais rau Vajtswv haivneeg hais tias Vajtswv txoj kev hlub muaj txaus pub lawv, nws yeej cug tes rawv txais tos lawv, yog lawv tu siab thiab tso txoj kev ua txhaum tseg. Mauxes tsis tau txhawb lawv txeev ua txhaum vim Vajtswv kev hlub tsis muaj nrim, tiamsis pib rau nqe 11 mus, Mauxes yeej ntuas mus ntuas los rau haivneeg Yixalayees kom ua neej raws li Vajtswv tej kevcai. Nws qhia meej hais tias Vajtswv txoj kevcai yeej tsis khwv lossis siab txog qhov uas lawv yuav ua tsis tau. Tiamsis tej lus ntawd yeej nyob ze lawv, nyob hauv lawv lub qhov ncauj thiab nyob hauv lawv lub siab, mas lawv yeej ua raws li ntawd tau.
Mauxes xav qhia rau Vajtswv haivneeg hais tias, ua neej raws li Vajtswv Txoj Kevcai tsis yog ib yam dab tsis uas hnyav dhau lawv lub zog, tiamsis yeej nyob rau qhov uas lawv muaj peevxwm ua tau. Yog li ntawd haivneeg Yixalayees yuav ua raws li Vajtswv txoj kevcai lossis tsis ua nyob ntawm nyias tus kheej txiav txim siab, tiamsis nyias yuavtsum ris qhov uas nyias txiav txim siab ua ntawd. Kev txiav txim siab ua raws lossis tsis ua yuav coj mus txog ob qho kawg sib txawv, tau koob hmoov lossis raug foom tsis zoo.
Tej lus qhia hauv ntu Vajluskub no ntuas peb txhua tus ntseeg hais tias, ua neej raws li Vajtswv Txojlus puavleej nyob rau ntawm nyias muaj peevxwm ua tau. Yog li ntawd, qhov tseemceeb nyob hauv peb txhua tus kev txiav txim siab xwb, tsis yog Vajtswv Txojlus khwv qhov uas peb ua tsis tau. Ceevfaj tsam ntawd yog dab Ntxwgnyoog kev dag kom peb nrhiav kev hnov qab tiamsis tsis ua raws li Vajtswv Txojlus qhia zoo li tus ua tsev rau saum cov suabzeb (Mathais 7:24-27). Tej lus samhwm uas Vajtswv muab rau Nws cov menyuam tsis yog tej lus uas khwv ua tau. Vajtswv paub hais tias peb yeej ib txwm tsis muaj zog tiamsis yog peb txaus siab muab qhov ntawd tso rau Vajtswv, qhia rau Vajtswv hais tias Menyuam xav ua neej raws li Koj Txojlus qhia, ua raws li Vajtswv txoj lus thaum uas muaj ob txoj kev xaiv yam zoo thiab yam phem sib tawm tsam hauv peb lub neej txhua hnub, paub tseeb hais tias Vajtswv yuav ntxiv zog rau peb txhua tus kom peb muaj txaus kev ntseeg ua neej txawv tibneeg ntiajteb. Kam cia poob txhua yam uas peb qhovmuag pom thiab ntseeg Vajtswv tus ncaj ncees tej lus cogtseg thiab ua raws li Nws Txojlus qhia. “nej cia li xaiv yuav txojsia, kom nej thiab nej caj ces thiaj li muaj txojsia nyob” (nqe 19). Thov Vajtswv pab kom peb hais rau Vajtswv hais tias, nyuamyaus txiav txim siab ua raws li Koj siab nyiam, txawm lub neej yuav zoo li cas los xij yeej yuav tsis cuam tshuam nyuamyaus kev txiav txim.
Thov Vajtswv:
Vajtswv, Tus uas pub Txojlus ciaj sia rau nyuam yaus ua neej raws. Txawm lub neej yuav zoo li cas los xij, nyuam yaus yeej txiav txim siab ua raws li Koj lub siab nyiam. Thov pab kom nyuam yaus saj tau txoj kev loj hlob hauv kev ntseeg uas raws Koj qab hauv ntau lub xyoos. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Hauv tej yam dab tsis peb pheej nrhiav kev hais tias Vajtswv Txojlus qhia khwv dhau ua tsis tau?
Nyeem Vajluskub hauv peb lub xyoos: Cov Thawjtswj 5
Kênh Youtube BHKTHN:
