Klei Aê Diê Blŭ: Y-Yêrêmi 40:1-6.
Êlan kliăng: “Nĕ hruê anei kâo kleh săng đai ti kngan ih. Tơdah ih mĭn jăk nao mbĭt hŏng kâo kơ čar Ƀaƀilôn, nao bĕ, leh anăn kâo srăng kiă kriê ih bi jăk. Ƀiădah tơdah ih mĭn amâo jăk nao mbĭt hŏng kâo kơ čar Ƀaƀilôn, đăm nao ôh. Dlăng bĕ, jih čar dôk ti anăp ih; nao bĕ ti anôk ih mĭn jăk leh anăn djŏ.” ( Y – Yêrêmi 40:4)
Klei êmuh ksiêm mĭn: Ya dua mta klei Khua kahan Y-Nebusaradan brei Khua pô hưn êlâo Y-Yêrêmi čuăn ruah? Ya klei Khua pô hưn êlâo Y-Yêrêmi čuăn ruah? Ya ngă ñu ruah msĕ snăn? Ti anôk drei knang čiăng mâo klei ruah bi mơak kơ Khua Yang?
Tơdah leh ƀuôn Yêrusalem dlưh rai leh, mtao Y-Nêbukatnêtsar mtă kơ Y-Nêbusaradan, jing khua kahan kơ phung gak atăt ba jih jang phung mnă kơ čar Ƀaƀilôn, leh anăn mjing Y-Gêdalia jing khua kiă kriê phung ƀuôn sang ăt dôk hlăm čar Yuđa. Khua kahan Y-Nêbusaradan nao bi tuôm hŏng Khua pô hưn êlâo Y-Yêrêmi êjai arăng kă gơ̆ hŏng klei săng đai mbĭt hŏng phung ƀuôn sang arăng dơ̆ng atăt ba nao jing mnă. Leh anăn tinei, Y-Yêrêmi hmư̆ Y-Nêbusaradan lŏ bi hdơr kơ klei ñu tuôm mtô leh kơ phung ƀuôn sang: “Yêhôwa Aê Diê diih hưn leh klei jhat bi kdơ̆ng hŏng anôk anei; Yêhôwa bi truh klei anăn, leh anăn ngă leh tui si klei Ñu lač. Kyuadah diih soh leh hŏng Yêhôwa leh anăn amâo gưt asăp Ñu ôh, snăn klei anei truh leh kơ diih” (êlan 2-3). Sa čô mnuih amâo đăo kơ Aê Diê ôh ƀiădah săng hĕ kơ klei Aê Diê blŭ, bi phung ƀuôn sang amâo mâo thâo săng leh anăn amâo đăo ôh kyuanăn diñu mă tŭ boh jhat. Ti tluôn, ñu brei dua klei čuăn ruah kơ Khua pô hưn êlâo Y-Yêrêmi čuăn mă: Tơdah nao mbĭt hŏng diñu kơ čar Ƀaƀilôn, gơ̆ srăng mâo klei arăng ngă jăk leh anăn dưn klei hơĭt ênang; bi tơdah gơ̆ ƀuh klei anăn amâo jăk ôh snăn gơ̆ dưi dôk mbĭt hŏng phung ƀuôn sang ăt dôk hlăm čar gơ̆ pô, leh anăn gơ̆ ruah mă ti anôk jăk gơ̆ čiăng dôk. Ƀiădah năng ai ñu thâo êlâo leh kơ klei Khua pô hưn êlâo Y-Yêrêmi mĭn, snăn Khua kahan mtă brei ñu wĭt kơ khua kiă kriê mrâo jing Y-Gêdalia.
Tơdah Y-Yêrêmi ruah nao kơ čar Ƀaƀilôn, ñu srăng mâo klei Mtao Y-Nêbukatnêtsar mpŭ leh anăn brei kơ ñu mâo djăp mta mnơ̆ng yua hlăm klei hdĭp, ƀiădah tơdah ruah ăt dôk hlăm ƀuôn sang ñu pô snăn ñu srăng tŭ mbĭt hŏng phung ƀuôn sang ăt dôk jih klei knap mñai, klei dleh dlan leh anăn klei ƀun ƀin, wăt srăng ƀuh mơh klei rai răk kơ sa boh čar sa wưng tuôm mâo leh klei hing ang. Khua pô hưn êlâo Y-Yêrimi čuăn ăt dôk ti ƀuôn sang ñu pô, ñu nao kơ “Y-Gêdalia anak êkei Y-Ahikam,” jing sa čô huĭ mpŭ kơ Aê Diê mơh. Khua pô hưn êlâo Y-Yêrêmi amâo duah klei mơak mñai kơ ñu pô ôh, ƀiădah ñu săng klă kơ ñu pô dĭng buăl Aê Diê, ñu čiăng dôk dơ̆ng mbĭt hŏng phung ƀuôn sang Aê Diê.
Khua Yang Yêsu wah lač brei kơ phung ƀuôn sang Ñu snei: “Diñu amâo jing phung lăn ala ôh, msĕ si Kâo amâo jing phung lăn ala ôh. Bi doh jăk diñu hŏng klei sĭt nik; klei Ih blŭ jing klei sĭt nik” (Y-Yôhan 17:16-17). Tơdah khăp kơ lăn ala, drei srăng ruah mnơ̆ng hlăm lăn ala. Ƀiădah tơdah thâo kơ drei pô amâo jing dŏ lăn ala ôh, drei srăng jhŏng čuăn ruah ya klei bi mơak kơ Aê Diê.
Drei ruah ênoh yuôm kơ mngăt hĕ amâodah ruah klei bi hrăp kơ klei kđeh čiăng?
Ơ Aê Diê! Brei bĕ kơ kâo klei thâo mĭn mơ̆ng Ih pô čiăng jih jang klei čuăn ruah điêt prŏng hlăm klei hdĭp kâo bi mơak kơ Ih sơăi, leh anăn atăt kâo kơ klei thâo ƀuh myang yuôm bhăn tơdah kâo êbat hlăm klei Ih čiăng.
Dlăng Klei Aê Diê Blŭ hlăm tlâo thŭn: Y-Êskiêl 39:1-40:4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
https://www.youtube.com/c/bhkthn
