Yelemis 40:1-6
Nqe cim:
“Nimno kuv yuav daws txoj saw hlau uas khi koj ob txhais tes thiab tso koj. Yog koj xav nrog kuv mus rau tebchaws Npanpiloos los tau, kuv yuav saibxyuas koj. Tiamsis yog koj tsis xav nrog kuv mus los tau. Muab lub tebchaws no rau koj xaiv, koj yuav mus nyob qhov twg los tau raws li koj nyiam” (Yelemis 40: 4).
Lus nug rau sawvdaws xav:
- Tus thawj tubrog Nenpuxaladas muab ob txojkev twg rau Tus cevlus Yelemis xaiv?
- Tus cevlus Yelemis txiavtxim siab xaiv yam dabtsi?
- Vim licas nws xaiv li ntawd?
- Los ntawm yam dabtsi peb thiaj muaj kev xaiv haum tus Tswv siab?
Tomqab uas lub nroog Yeluxalees raug swb, tus thawj tubrog Nenpuxaladas tau Vajntxwv Nenpukajnexales samhwm kom ntes cov neeg hauv lub nroog coj mus ua qhev rau tim tebchaws Npanpiloos, thiab tsa Nkedaliyas ua tswvxeev kav cov neeg seem nyob hauv tebchaws Yudas. Tus thawj tubrog Nenpuxaladas los nrhiav Tus cevlus Yelemis uas tabtom raug khi nrog cov neeg raug ntes mus ua cev qhev. Nyob ntawm no, Tus cevlus Yelemis tau hnov Nenpuxaladas rov hais txog tej uas Yelemis tau qhia rau cov pejxeem: “Tus TSWV uas yog koj tus Vajtswv ua rau lub tebchaws no puastsuaj tas, nimno nws ua raws li nws tau hais tseg lawm. Tej no tshwmsim twb yog vim koj cov neeg ua txhaum rau tus TSWV thiab tsis mloog nws lus” (nqe 2-3). Ib tug uas yog lwm haivneeg ho totaub tus Tswv tej lus, tiamsis tus Tswv haivneeg ho tsis totaub thiab tsis ntseeg, lawv thiaj raug teebmeem. Txuas ntxiv, Nenpuxaladas muab ob txojkev rau Tus cevlus Yelemis xaiv: yuav nrog mus lawm tim Npanpiloos, kom tau lubneej zoo, muaj txhij muaj txhua; lossis yuav nyob nrog cov neeg seem hauv tebchaws Yudas; yuav mus, yuav nyob ces nyob ntawm Yelemis xaiv. Tiamsis tej zaum paub ua ntej txog Tus cevlus Yelemis kev xaiv, tus thawj tubrog thiaj hais kom Yelemis mus nrog tus tswvxeev tshiab uas yog Nkedaliyas nyob ua ke.
Yog hais tias Tus cevlus Yelemis xaiv mus lawm tim Npanpiloos, nws yuav tau Vajntxwv Nenpukajnexales muab tsa ua tus loj thiab tau txhua yam zoo hauv lubneej; tiamsis yog xaiv nyob hauv tebchaws Yudas, ces Yelemis yuav nrog cov neeg seem nyob tiv kev nyuaj siab, kev khwv thiab kev txomnyem hauv lub tebchaws uas raug puastsuaj tas. Tus cevlus Yelemis txiavtxim siab xaiv nyob hauv tebchaws Yudas, nws thiaj mus nrog “Ahikas tus tub Nkedaliyas uas yog Safas tus xeebntxwv” uas yog ib tug neeg hwm Vajtswv nyob ua ke. Tus cevlus Yelemis tsis nrhiav kev tau zoo rau tus kheej, tiamsis nws paub hais tias tus kheej yog Vajtswv tus tubtxib, nws xav nrog nws haivneeg nyob ua ke.
Tswv Yexus thov Leej Txiv rau Nws haivneeg hais tias: “Lawv tsis yog ntiajteb li ib yam li kuv tsis yog ntiajteb li. Koj Txojlus yog lus tseeb; thov muab koj txojlus tseeb ntxuav kom lawv huv” (Yauhas 17:16-17). Yog peb lub siab tig mus rau lub ntiajteb, ces peb yuav xaiv tej uas yog ntiajteb li. Tiamsis thaum zeem paub hais tias peb tsis yog ntiajteb li, ces peb yuav ua ib siab xaiv tej yam uas haum Vajtswv siab.
Thov Vajtswv,
Vajtswv! Thov pub tswvyim rau nyuam yaus, kom txhua yam kev txiavtxim siab hauv nyuam yaus lubneej haum Koj siab, thiab pub nyuam yaus tau txais tej yam muaj nqis sab ntsujplig thaum mus raws Koj lub siabnyiam. Amees.
Peb yuav xaiv tej uas muaj nqis rau sab ntsujplig lossis yuav xaiv ua raws sab cev nqaij daim tawv kev ntshaw?
Nyeem Vajluskub hauv peb lub xyoo: Exekees 39:1-40:4
Kênh Youtube BHKTHN:
