Klei Aê Diê Blŭ: Klei Yap 11:10-20
Êlan kliăng: “Kyuadah wăt tơdah sa čô mnuih kpă lĕ buh kjuh blư̆, ñu ăt lŏ kgŭ mơh” (Klei Bi Hriêng 24:16a).
Klei êmuh ksiêm mĭn: Klei truh anei truh hlăm ya mta klei mâo? Si ngă Y-Môis ngă tơdah tlă anăp hŏng klei lông dlăng? Hŏng ya êlan Aê Diê lŏ bi kơrŭ ñu? Ya ih khăng ngă tơdah klei hdĭp ih tuôm hŏng klei lông dlăng?
Pluh kdrêč tal êlâo hlăm hdruôm hră Klei Yap čih yăl dliê kơ klei mâo, leh Aê Diê bi mtlaih phung Israel mơ̆ng klei jing hlŭn ti čar Êjip, digơ̆ nao mdơ̆ng sang čhiăm ti gŭ čư̆ Sinai. Ară anei jing thŭn tal dua, digơ̆ dơ̆ng êbat nao kơ Lăn Aê Diê Ƀuăn. Diñu mrâo êbat knŏng tlâo hruê mơ̆ng kdrăn tač Sinai truh ti kdrăn tač Paran,
Phung tue dơ̆ng blŭ duñ duñ kơ mnơ̆ng ƀơ̆ng huă. Phung tue anei amâo djŏ phung Israel ôh, ƀiădah diñu kbiă nao mbĭt hŏng phung Israel mơ̆ng čar Êjip. Sa thŭn êgao, hrăp leh diñu ƀơ̆ng kpŭng mana Aê Diê brei mơ̆ng adiê (Klei Kbiă 16). Diñu mhao kơ čĭm leh anăn mnơ̆ng ƀơ̆ng huă čar Êjip. Klei blŭ duñ duñ anei bi ktuê kơ jih jang phung ƀuôn sang. Dôk ti anăp klei phung ƀuôn sang tluh mhao, Y-Môis thâo ñu pô amâo dưi bi hrăp kơ phung ƀuôn sang ôh, kyuanăn ñu mâo klei êdu ai snăk. Y-Môis dôk bi ktlă anăp hŏng klei lông dlăng prŏng hlăm bruă gai gĭt phung ƀuôn sang Aê Diê, bi klei dưi ñu pô ăt mâo knhal mơh, kyuanăn ñu êdu ai leh anăn akâo kơ Aê Diê bi mdjiê ñu: “Tơdah Ih ngă snei hŏng kâo, bi mdjiê bĕ kâo ară anei mtam, tơdah kâo mâo klei pap ti anăp ală Ih, čiăng đăm kâo ƀuh ôh klei knap mñai kâo” (êlan 15).
Aê Diê amâo bi mdjiê Y-Môis ôh, ƀiădah Aê Diê msir mkra klei dleh dlan gơ̆ hlăm dua mta klei: Tal sa, Aê Diê brei kơ ñu phung đru klam klei ktrŏ phung ƀuôn sang mbĭt hŏng ñu. Aê Diê mtă kơ Y-Môis ruah kjuh pluh čô phung êkei khua mduôn, Mngăt Myang Aê Diê srăng trŭn dôk ti dlông digơ̆ čiăng kơ digơ̆ đru gai gĭt phung ƀuôn sang mbĭt hŏng Y-Môis. Tal dua, Aê Diê brei mnơ̆ng ƀơ̆ng kơ phung ƀuôn sang tui si klei digơ̆ tluh mhao. Aê Diê lač Ñu srăng brei čĭm ƀơ̆ng kơ phung ƀuôn sang jih sa mlan. Wăt tơdah Y-Môis amâo thâo săng ôh si ngă Aê Diê dưi brei čĭm ƀơ̆ng kơ phung ƀuôn sang lu lĭn msĕ snăn dưn mơh, ƀiădah ñu ăt hưn kơ phung ƀuôn sang thâo klei Aê Diê lač leh. Aê Diê ngă sĭt klei Y-Môis amâo thâo săng ôh, Ñu brei mâo sa angĭn thut mơ̆ng êa ksĭ ba lu čĭm wăt lĕ jŭm wăl phung Israel (Klei Yap 11:31).
Aê Diê đru leh Y-Môis dưi hŏng klei lông dlăng, leh anăn đru lŏ bi kjăp klei gơ̆ đăo kơ Aê Diê, Pô Mâo Jih Klei Myang. Mâo lu blư̆ phung anak čô Aê Diê mâo klei rŭng răng, êdu ai msĕ si Y-Môis mơh tơdah tuôm hŏng klei lông dlăng. Brei drei đăo hŏng jih ai tiê leh anăn jao jih klei dleh dlan drei kơ Pô Mâo Jih Klei Myang. Si ngă Aê Diê đru Y-Môis dưi leh hŏng klei lông dlăng bŏ hŏng klei yuôm bhăn, snăn mơh Ñu srăng đru drei dưi hŏng klei lông dlăng. Đăo bĕ kơ Aê Diê kluôm ênŭm msĕ si Klei Ñu Blŭ mtă leh: “Lưh klei ktrŏ ih kơ Yêhôwa, leh anăn Ñu srăng krơ̆ng ih” (Klei Mmuñ Hđăp 55:22a).
Drei knang kjăp kơ Aê Diê Pô Mâo Jih Klei Myang mơ̆ tơdah tuôm hŏng klei lông dlăng hlăm klei hdĭp?
Wah lač: Ơ Ama, tơdah kâo tuôm hŏng klei bi kgăn, klei dleh dlan truh kơ klei êdu ai, lŏ mñă kơ kâo jhŏng jao jih kơ Ih jing Aê Diê Pô Mâo Jih Klei Myang, kyuadah “kngan Ih amâo jing đŭt ôh”. Ih yơh srăng đru kâo dưi hŏng klei lông dlăng hlăm klei hdĭp. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 44
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
