Teev Npe 11:10-20
Nqe cim
“Tus neeg ncaj ncees ntog pestsawg zaus los nws yeej sawv taus” (Pajlug 24:16a).
Lus nug rau sawvdaws xav:
– Zaj xwm no tshwm muaj lub tsamthawj twg?
– Mauxes ua licas thaum ntsib kev sim siab? Tus Tswv txhawb nws zog licas?
– Peb kheev ua dabtsi thaum ntsib tej kev sim siab hauv lubneej?
Kaum tshooj xubthawj ntawm phau Teev Npe sau txog zaj xwm tomqab tus Tswv cawm cov Yixalayees dim kev ua cev qhev nram tebchaws Iziv los, lawv los tsuam yeej rau ntawm taw roob Xinais. Nimno yog lub xyoo thib ob, lawv pib sawv kev mus rau hauv Tebchaws Coglus Tseg. Nyuam qhuav sawv kev kiag tau peb hnub ntawm tiaj mojsab qhua Xinais mus rau tiaj mojsab qhua Palas xwb, cov neeg txawv tebchaws uas nrog lawv los uake pib yws, taij zaub mov noj. Cov neeg txawv tebchaws no tsis yog haivneeg Yixalayees, tiamsis lawv taug kev nrog cov Yixalayees uake tawm hauv tebchaws Iziv los. Lawv dhuav noj manas, uas tus Tswv tso poob saum ntuj ib lub xyoos dhau los (Khiavdim 16). Lawv ntshaw noj nqaij thiab cov Iziv tej zaub mov. Tej uas lawv yws kis mus thoobplaws cov pejxeem. Thaum hnov cov pejxeem tej lus taij thov, Mauxes paub hais tias nws yuav ua tsis tau kom txaus lawv siab, nws qaug zog kawg li. Nws tabtom ntsib tej kev sim siab loj heev txog lub nra coj tus Tswv haivneeg, nws muaj tsis txaus peevxwm, vim li ntawd nws thiaj qaug zog thiab thov kom tau tuag hais tias: “Yog koj pheej yuav sim kuv li no, thov koj cia li muab kuv tua povtseg tamsim no, kom kuv thiaj tsis tau tiv koj tej kev nruj tsiv no ntxiv lawm” (nqe 15).
Tus Tswv tsis tua Mauxes, tiamsis Nws daws Mauxes tej teebmeem raws li ob phab. Xubthawj, tus Tswv pub lwm tus los nrog nws pab ris nra coj tus Tswv haivneeg. Tus Tswv hais kom Mauxes xaiv 70 leej txwjlaug, tus Tswv yuav muab Nws tus ntsujplig rau lawv kom lawv pab Mauxes coj tus Tswv haivneeg. Thib ob, tus Tswv ua raws li cov pejxeem tej lus thov. Tus Tswv yuav pub lawv tau noj nqaij kom txaus tsheej hli. Txawm yog Mauxes tsis totaub hais tias tus Tswv yuav ua cas nrhiav txaus nqaij rau cov neeg coob coob npaum ntawd, tiamsis nws mus qhia cov pejxeem raws li tus Tswv tej lus. Tus Tswv tau ua tshwm tej yam uas Mauxes tsis totaub txog, Nws ua rau cua ntsawj noog ncuab ya ua npoj ntws nram hiavtxwv los tsaws ua npoj ntws rau ntawm ntug yeej (Teev Npe 11:31).
Tus Tswv tau pab Mauxes hla dhau tej kev sim siab, thiab pab Mauxes rov muaj kev ntseeg ruaj khov rau ntawm tus Tswv yog tus uas muaj hwjchim ua tau txhua yam. Tus Tswv cov menyuam kuj muaj tej lub sijhawm qaug zog, poob siab zoo li Mauxes thaum ntsib tej kev sim siab hauv lubneej. Peb yuav tsum cia siab ntsoov thiab qhia peb tej teebmeem rau tus Tswv uas muaj hwjchim. Tus Tswv twb pab Mauxes hla dhau kev sim siab zoo licas, ces Nws kuj yuav pab peb hla dhau kev sim siab ib yam li ntawd thiab. Cia li cia siab ntsoov rau tus Tswv li Nws Txojlus qhia tseg hais tias: “Cia li muab nej tej kev nyuaj siab tso rau tus Tswv, nws yuav tsomkwm nej” (Ntawv Nkauj 55:22a).
Thov Vajtswv
Tus Tswv uas yog nyuam yaus Leej Txiv, thaum ntsib teebmeem, kev khwv, thov qhia nyuam yaus paub qhia txhua yam rau Koj yog tus uas muaj hwjchim. Koj yuav pab nyuam yaus hla dhau tej kev sim siab hauv lubneej. Nyuam yaus tuav Cawmseej Yexus lub npe thov, Amees.
Peb puas cia siab ntsoov rau tus Tswv uas muaj hwjchim thaum ntsib kev sim siab hauv lubneej?
Nyeem Vajluskub hauv peb lub xyoo: Chivkeeb 44
Kênh Youtube BHKTHN:
