Klei Aê Diê Blŭ: Y‑Luk 2:20
Êlan Kliăng: “Phung mgăt biăp lŏ wĭt, mmuñ mpŭ mni kơ Aê Diê kyua jih klei diñu hmư̆ leh anăn ƀuh, tui si klei phung dĭng buăl jăk hưn leh kơ diñu.” (Y‑Luk 2:20)
Klei êmuh ksiêm mĭn: Leh bi tuôm hŏng Khua Yang mrâo kkiêng, ya klei phung mgăt biăp ngă leh? Ya ngă diñu ngă snăn? Si drei srăng ngă leh yan Noel thŭn anei?
Ƀuh klei yuôm bhăn hlăk phung dĭng buăl jăk hưn Anak Aê Diê hriê ti lăn ala, leh anăn dưi bi tuôm hŏng Hđeh Điêt Doh Jăk ti anôk arăng kkiêng kơ Ñu, snăn phung mgăt biăp mơak snăk. Hĭn kơ jih jang, năng ai diñu čang hmăng mmăt hruê anăn amâo ruĕ ôh. Amâo mâo ôh klei jăk mơak hĭn hŏng bruă mđing hmư̆ êpul kưt mmuñ prŏng hĭn hlăm jih jang ênuk – êpul mmuñ mơ̆ng klăk klai dĭng buăl jăk. Amâo mâo ôh klei jăk hĭn hŏng bruă dưi tuôm hŏng pô phŭn hlăm Hruê Noel jing hđeh điêt Yêsu hŏng kđeh asăr. Ƀiădah klei yuôm bhăn prŏng snăk dưn mơh ăt srăng mjưh ruê̆. Klei bi tuôm yuôm bhăn anăn jăk êdimi dưn mơh ăt srăng truh mmông bi ktlah. Phung mgăt biăp lŏ wĭt hŏng klei hdĭp aguah tlam.
Klei năng mđing jing diñu amâo wĭt hŏng klei hơưi ôh ƀiădah hŏng klei hơ̆k mơak êdimima: “Phung mgăt biăp lŏ wĭt, mmuñ mpŭ mni kơ Aê Diê kyua jih klei diñu hmư̆ leh anăn ƀuh, tui si klei phung dĭng buăl jăk hưn leh kơ diñu” (Y‑Luk 2:20). Klei bi tuôm hŏng Khua Yang Yêsu wăt tơdah bhiâo dưn mơh ƀiădah boh tŭ jing klei hdĭp diñu mâo klei bi mlih. Diñu thâo săng bruă klam klei hdĭp diñu ya jing leh anăn diñu dưi hdĭp hŏng bruă klam anăn hlăm klei hdĭp pô grăp hruê. Kyua anăn, diñu wĭt hŏng bruă mgăt biăp msĕ si aguah tlam êlâo anăn ƀiădah hŏng bruă klam yuôm bhăn, “mmuñ mpŭ mni kơ Aê Diê kyua jih klei diñu hmư̆ leh anăn ƀuh”. Phung mgăt biăp wĭt leh hlăm klei hdĭp aguah tlam hŏng bruă pô ka tuôm ngă ôh!
Yan Noel jih ruê̆ ăt jing hlăk drei mprăp êmiêt mnơ̆ng dhơ̆ng bi msiam, ba sang kkuh mpŭ leh anăn sang pô lŏ wĭt hŏng klei dăp dưm grăp hruê. Leh anăn klei hdĭp ăt lŏ wĭt hŏng bruă mưng leh. Năng ai drei ƀuh klei amâo jăk kyua ai êwa hơ̆k mơak, klei lu bruă knuă hlăm yan Noel amâo lŏ adôk ôh. Khădah snăn, msĕ si phung mgăt biăp leh bi tuôm hŏng Khua Yang mrâo kkiêng, drei srăng wĭt hŏng klei hdĭp yuôm bhăn mơ̆ng klei mơak Noel. Bi tuôm hŏng Khua Yang hriê ti lăn ala jing tur knơ̆ng mđĭ klei hdĭp kkuh mpŭ leh anăn hưn bi sĭt hlăm phung drei hur har hĭn. Grăp čô phung đăo brei bi guh kơang Anăn Aê Diê kơ jih jang klei drei hmư̆ leh, leh anăn ƀuh leh hlăm yan Noel thŭn anei.
Si drei srăng hdĭp kkuh mpŭ leh anăn hưn bi sĭt hlăm klei hdĭp pô aguah tlam?
Wah lač: Ơ Khua Yang, kâo bi mni kơ Ih kyua klei mơak leh anăn klei jăk mơak hlăm yan bi hdơr Hruê Khua Yang hriê ti lăn ala. Akâo kơ Ih đru kâo tui hlue phung mgăt biăp mphŭn dô, wĭt hŏng klei hdĭp leh anăn bruă knuă grăp hruê hŏng knuih hdĭp kkuh mpŭ leh anăn hưn bi sĭt. Akâo kơ Ih mtô kâo thâo grăp hruê kâo hdĭp jing klei găl čiăng hơ̆k mơak hlăm klei Ih kiă kriê, čiăng mpŭ mni kơ Ih leh anăn hiu hưn Klei Mrâo Mrang Jăk. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y‑Samuel 25
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
