Lukas 2:20
Nqe cim:
“Thaum cov yug yaj rov qab mus, lawv hu nkauj qhuas Vajtswv, rau qhov lawv hnov thiab pom raws li tus timtswv tau qhia rau lawv lawm.” (Lukas 2:20)
Lus nug rau sawvdaws xav:
– Tomqab uas pom Tswv Yexus los yug, cov neeg yug yaj tau ua li cas?
– Vim li cas lawv ua li ntawd?
– Peb yuav ua dabtsi tomqab uas ua koob tsheej nco txog Tswv Yexus los yug xyoo no?
Tau hnov qhov uas cov timtswv ceebtsheej tshaj qhia Vajtswv tus Tub los yug hauv ntiajteb, thiab tau pom kiag tus metub Yexus qhov chaw yug, tej zaum cov neeg yug yaj zoo siab kawg nkaus li. Txawv li lwm tus, tej zaum lawv xav kom hmo ntawd nyob ntev ntev mus li. Tsis muaj ib yam dabtsi zoo npaum qhov uas hnov zaj nkauj cov timtswv hu qhuas Vajtswv. Tsis muaj ib yam zoo npaum qhov uas tau pom kiag tus Tswv los yug ua neeg. Tiamsis txawm yog qhov xwmtxheej yuav muaj nqis npaum twg los kuj txawj xaus. Qhov uas tau mus saib tseemceeb npaum twg los kuj txog lub sijhawm sib ncaim. Cov neeg yug yaj yuav tau rov qab mus ua lawv tes haujlwm li qub.
Qhov uas tsimnyog paub yog lawv tsis rov los ua ntsejmuag ntshaus ntsho, tiamsis lawv los muaj kev zoo siab heev: “Thaum cov yug yaj rov qab mus, lawv hu nkauj qhuas Vajtswv, rau qhov lawv hnov thiab pom raws li tus timtswv tau qhia rau lawv lawm.” (Lukas 2:20). Lub sijhawm mus pom tus Tswv Yexus txawm yog luv luv xwb los lawv lub neej tau txais kev hloov tshiab. Lawv paub tej lus qhia rau lawv lub neej yog dabtsi, thiab lawv yuav ua neej kom raws li tej lus qhia ntawd txhua hnub. Yog li ntawd, lawv thiaj rov mus tsev ua tes haujlwm yug yaj li qub tiamsis lawv tau txais ua feem xyuam loj dua, “lawv hu nkauj qhuas Vajtswv.” Cov neeg yug yaj rov qab mus ua neej txawv qub!
Lub caij ua koobtsheej nco txog Tswv Yexus los yug xaus, kuj yog lub sijhawm peb npaj ntsaig tej chaw, cuabyeej ua koobtsheej nyob hauv tuamtsev thiab hauv peb tej tsev mus. Thiab peb kev ua neej los kuj rov mus pib ua tej haujlwm ibtxwm ua. Qee zaus peb yuav pom tias qaug zog vim tej lub caij nyoog ua koobtsheej muaj neeg coob tib pliag xwb dhau lawm. Kuj zoo li cov neeg yug yaj tau mus pom Tswv Yexus los yug, lawv rov qab los ua lub neej zoo li ibtxwm ua tiamsis totaub lub ntsiab qhov uas Tswv Yexus los yug. Ntsib Tswv Yexus los yug yog lub hauvpaus rhaub kom peb lub neej pehawm thiab ua timkhawv rau tus Tswv kub siab dua. Txhua tus ntseeg Yexus cia li ua kom tus Tswv lub npe tau koobmeej dhau los ntawm tej uas peb hnov thiab pom hauv lub caij ua koob tsheej nco txog Tswv Yexus los yug xyoo no.
Thov Vajtswv,
Tus Tswv, nyuam yaus ua Koj tsaug vim Koj pub muaj kev zoo siab thiab kaj siab rau lub caij ua koobtsheej nco txog Yexus los yug. Thov Koj pab kom nyuam yaus xyaum tau cov neeg yug yaj tus qauv hnub thaud, rov los ua tes haujlwm qub tiamsis muaj lub neej pehawm thiab ua timkhawv qhia Koj zaj. Thov Koj qhia kom nyuam yaus paub hais tias txhua hnub puavleej yog lub sijhawm muaj Koj, qhuas Koj thiab qhia tawm Txojmoo Zoo. Nyuam yaus tuav Tswv Yexus lub npe thov, Amees.
Peb yuav pehawm thiab ua timkhawv qhia tus Tswv zoo li cas nyob hauv peb kev ua neej?
Nyeem Vajluskub hauv peb lub xyoo: I Xamuyees 25
Kênh Youtube BHKTHN:
