Klei Aê Diê Blŭ: Y‑Mathiơ 6:12-13a
Êlan kliăng: “Pap brei kơ klei soh hmei, msĕ si hmei pap brei mơh kơ mnuih bi msoh kơ hmei leh. Đăm atăt ba hmei hlăm klei mplư ôh, ƀiădah bi mtlaih hmei mơ̆ng Pô Jhat.” (Y‑Mathiơ 6:12-13a).
Klei êmuh ksiêm mĭn: Khua Yang Yêsu mtô drei brei wah lač kơ ya mta klei kơ klei hdĭp mngăt drei pô? Klei wah lač anei brei drei thâo kơ ya mta klei brei dưm êlâo hĭn hlăm klei hdĭp drei? Ya mta klei đru drei brei thâo huĭ kơ klei soh leh anăn weh đuê̆ kbưi mơ̆ng klei jhat ƀai?
Lu phung đăo knŏng uêñ mĭn “Brei kơ hmei mnơ̆ng ƀơ̆ng huă bi djăp kơ grăp hruê”, leh anăn amâo ƀuh ôh klei hdĭp mngăt pô jing yuôm hĭn kơ klei hdĭp kđeh. Kyuanăn yơh Khua Yang Yêsu mtô drei brei wah lač kơ mngăt drei pô: “Pap brei kơ klei soh hmei”, hlăm klei mblang phŭn jing: “Pap brei kơ hmei kơ nư hmei”. Drei ngă soh amâodah đuôm nư kơ hlei pô? Kơ Khua Yang wăt kơ mnuih, lač djŏ hĭn, wăt tơdah drei ngă soh hŏng hlei pô dưn ăt jing ngă soh leh anăn đuôm nư kơ Khua Yang mơh. Klei wah lač anei mñă kơ drei snei, klei soh jing mta klei kjham snăk, jing ngă soh hŏng Aê Diê pô, leh anăn amâo dưi ngă ya mta klei ôh čiăng dưi tla hĕ nư klei soh ƀiădah knŏng hjăn akâo kơ klei pap mơ̆ng Aê Diê yơh!
Ƀiădah ai tiê pô thâo kral klei soh leh anăn thâo kmhal sĭt brei bi êdah hŏng knhuah ñu hdĭp hŏng phung mnuih soh mkăn, “msĕ si hmei pap brei mơh kơ mnuih bi msoh kơ hmei leh”. Amâo djŏ ôh klei Aê Diê pap brei, ngă hlue tui si klei drei pap brei kơ pô mkăn, ƀiădah tơdah drei amâo pap brei ôh kơ arăng jing klei hưn sĭt êmĭt kơ drei amâo thâo kral klei soh drei ngă hŏng Aê Diê leh anăn amâo kmhal sĭt ôh, kyuanăn drei kăn dưi mă tŭ klei pap brei mơ̆ng Aê Diê rei. Snăn, amâo mâo klei Aê Diê pap brei amâo djŏ ôh kyua klei pap Aê Diê jing điêt đei ƀiădah kyua drei ka sĭt thâo kral klei soh pô leh ka kmhal sĭt ôh.
Kdlưn hĭn mơh, sa čô jing anak Aê Diê sĭt srăng huĭ kơ klei soh leh anăn čiăng đuê̆ kbưi mơ̆ng klei jhat ƀai, “Đăm atăt ba hmei hlăm klei mplư ôh, ƀiădah bi mtlaih hmei mơ̆ng Pô Jhat!” Klei wah lač anei bi êdah pô mâo ai tiê huĭ kơ klei soh leh anăn thâo kral kơ klei êdu awăt ñu pô. Anei jing klei sa čô mnuih mâo klei thâo săng yap yuôm klei bi mguôp hŏng Aê Diê, huĭ bi ênguôt kơ Khua Yang, huĭ bi ktlah hŏng Khua Yang. Lu phung đăo mĭndah Khua Yang čoh čuăn lu đei snăn êmăn êmik hlăm klei bi mguôp hŏng Khua Yang. Ƀiădah sa čô pô đăo khăp sĭt kơ Khua Yang srăng ƀuh ñu čiăng mâo Khua Yang nanao, dlăng Khua Yang jing mrô sa, leh anăn amâo čiăng bi ênguôt kơ Khua Yang ôh.
Klei hdĭp anei mâo lu klei jhat ƀai leh anăn lu mnuih jhat ƀai: blŭ jhat, lhiăr, luar, mplư… Ƀiădah brei drei wah lač bĕ akâo kơ Khua Yang răng kriê drei đăm ngă soh ôh, đăm bi wĭt klei jhat kơ klei jhat arăng (Rôm 12:17; I Y‑Pêtrôs 3:9). Blŭ mdê hĭn, grăp hruê kwưh akâo kơ Khua Yang bi mtlaih drei mơ̆ng klei jhat ƀai, leh anăn msĕ mơh bi mtlaih drei amâo ngă klei jhat kơ arăng ôh.
Si ngă drei wah lač lu hĭn kơ klei hdĭp kđeh amâodah kơ klei hdĭp mngăt?
Wah lač: Ơ Khua Yang, akâo kơ Ih đru kâo grăp hruê hdĭp doh jăk hĭn, hmăr thâo kral klei soh čiăng weh đuê̆ kbưi mơ̆ng klei soh, hdĭp bi mơak leh anăn bi guh kơang kơ Khua Yang.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 14:2 – 15:19
Kênh Youtube BHKTHN:
