Mathais 6:12-13a
12 Thov Koj zaj txim rau peb ib yam li peb twb zam txim rau cov uas ua txhaum rau peb lawm.
13 Thov Koj tsis txhob cia tej kev sim siab ntxias tau peb, tiamsis thov Koj pab kom peb dim ntawm dab Ntxwgnyoog txhais tes!
Lus nug rau sawvdaws xav:
- Tswv Yexus qhia kom peb thov Vajtswv pab peb sab ntsujplig li cas?
- Nqe lus thov ntawd qhia paub yam muab saib hlob hauv peb lub neej yog dab tsi?
- Yam dab tsi ua rau peb paub qaij deb kev txhaum thiab kev ua phem?
Muaj ib txhia ntseeg Yexus tsuas paub hais tias “thov Koj pub mov rau peb muaj noj hnub no”, tiamsis tsis pom txog lub neej sab ntsujplig tseemceeb thiab muaj nqis dua sab nqaij tawv. Yog li ntawd Tswv Yexus thiaj qhia peb thov Vajtswv rau sab ntsujplig hais tias: “thov Koj zam txim rau peb”, raws li cov lus xub thawj yog hais tias; “thov Koj zam tej nuj nqis uas peb tshuav rau peb”. Peb tau ua txhaum lossis tshuav leejtwg nuj nqis? Peb tau ua tej ntawd rau Vajtswv thiab rau tibneeg lawm, lossis hais tau hais tias, yog peb ua txhaum rau leejtwg lawm los puavleej yog peb tshuav nuj nqis ntawm tus Tswv. Nqe lus thov no ua rau peb nco ntsoov hais tias, kev txhaum yog yam tseemceeb uas ua mus dawm txog Vajtswv, thiab peb ua tsis dab tsi mus them tus nqi ntawm kev txhaum, tsuas thov Vajtswv ua siab hlub zam txim pub dawb xwb.
Tus uas muaj lub siab lees txim thiab tso kev txhaum tseg lawm tiag, qhia tshwm los ntawm nws tes haujlwm uas ua pub rau lwm tus neeg txhaum, “ib yam li peb twb zam txim rau cov uas ua txhaum rau peb lawm”. Qhov ntawd tsis tau txhais hais tias, Vajtswv tsuas zam txim rau peb li uas peb zam txim rau lwm tus lawm xwb. Tiamsis tsis zam txim rau lwm tus yog tim khawv tseeb meej txog qhov uas peb tsis lees peb tej kev txhaum rau Vajtswv thiab tsis tso kev txhaum tseg tiag tiag, thiaj tsis tau txais kev zam txim ntawm Vajtswv. Yog li ntawd, tsis tau txais kev zam txim ntawm Vajtswv tsis yog Vajtswv kev hlub pub rau peb muaj tsawg, tiamsis yog vim peb tsis lees paub peb tej kev txhaum thiab muab kev txhaum tso tseg.
Heev tshaj ntawd, thaum peb yog Vajtswv ib tus me nyuam lawm, peb ntshai kev txhaum thiab qaij deb yam phem “thov Koj tsis txhob cia tej kev sim siab ntxhias tau peb, tiamsis thov Koj pab kom peb dim ntawm dab Ntxwgnyoog txhais tes!” Cov lus thov no qhia tawm lub siab ntshai kev txhaum thiab zeem paub yus kev tsis muaj zog. Qhov ntawd kuj qhia tshwm txog tus ntseeg uas saib hlob kev sib txuas nrog Vajtswv, ntshai tsam ua rau tus Tswv tus siab, ntshai ua rau sib quas nrog tus Tswv. Muaj ib txhia ntseeg hais tias, tus Tswv yuam kom cov ntseeg ua ntau yam heev, lawv qaug zog rau kev sib txuas nrog tus Tswv. Tiamsis yog ib tus ntseeg tseeb, nws yuav pom hais tias, yus cheemtsum tus Tswv, siab tus Tswv yog thawj hauv lub neej thiab tsis xav ua rau tus Tswv tu siab.
Ua neej nyob, muaj ntau yam phem thiab ntau tus tibneeg phem; hais lus nkaug lwm tus, ntxeev siab, ua tsis tseeb, dag noj…tiamsis peb thov Vajtswv pab kom peb txhob poob mus ua txhaum, tsis ua yam phem thiab tsis ua phem pauj phem (Loos 12:17; I-Petus 3:9). Lossis hais tias, txhua hnub peb yuav tsum thov Vajtswv pab peb dim ntawm kev phem, thiab thov pab peb tsis txhob ua phem rau lwm tus.
Peb kheev thov Vajtswv pab peb sab nqaij tawv lossis thov pab peb sab ntsujplig ntau dua?
Thov Vajtswv,
Tus Tswv, thov pab nyuam yaus ua lub neej dawb huv heev ntxiv, zeem paub kev txhaum kom qaij deb kev txhaum, ua neej haum tus Tswv Koj siab, Koj tau ntsejmuag. Amees.
T Nyeem Vajluskub hauv peb lub xyoo: II.Xwmtxheej Vajntxwv 14:2-15:19
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
